भांगरभूंय | प्रतिनिधी
उद्देग पर्व २
हस्तिनापूरांत कृष्ण
(ते प्रमाण हस्तिनापूराक पावल्या उपरांत संजयान युधिश्टीराचो निरोप धृतराष्ट्राक सांगलो…. आतां मुखार…)
संजय गेल्ल्याक खूब दीस जावन गेले, पूण हस्तिनापूरांतल्यान कांयच वार्ता येवंक ना. दुर्योधनाच्या मनात झुजाची सुरवात पांडवांनी करची अशें आसलें. तशें जालें म्हणटकच कौरवांक झूज करपाचें नाशिल्लेंच, पांडवांनीय झुजाक सुरवात केली, अशें मागीर लोकांक सांगपाक मेळपाचें. लोकांनी तसो बोल लावचो न्हय म्हणून कितें करचें हें थारावपाक पांडव परतून एक फावट हेर इश्ट राजां वांगडा फुडली येवजण करपाक बसले. त्या वेळार एक निमाणो उपाय म्हणून कृष्णान आपूण स्वता हस्तिनापूरांत वतां, पांडवांचें म्हणणें धृतराष्ट्रा मुखार मांडटां आनी तो कितें म्हणटा तें आयकून येतां अशें सांगलें. तशें जाल्यार, कृष्ण परतून आयल्या उपरांत झुजाचो निर्णय घेवचो अशें पांडवांनी थारायलें. दुसऱ्या दिसा कृष्ण, कांय यादव सैनीक आनी सात्यकीक वांगडा घेवन हस्तिनापूराक गेलो.
पांडवांचो दूत म्हणून कृष्ण हस्तिनापूरांत येता हें कळना फुडें धृतराष्ट्राचेर आनी दुर्योधनाचेर आकांत आयलो. कृष्ण केन्ना कितें करीत हाचो अदमास कोणूच करूंक शकनासलो. ते खातीर सगल्यांक ताचो भंय दिसतालो. पांडवांच्या राजसूय यज्ञा वेळार सगल्यांनी ताचो अणभव घेतिल्लो. यज्ञाक जमिल्ल्या सगल्या राजा मुखार कृष्णान सुदर्शन सोडून शिशूपालाचो जीव घेतिल्लो. तो राग दुर्याधनाच्या काळजात अजून घुंवतालो. कृष्ण हस्तिनापूरांत पावतकच संद मेळ्ळ्या उपरांत ताका अटक करची अशी येवजण दुर्योधनान केली. कृष्णाक धरलो जाल्यार ताका सोडवपा खातीर पांडव आपलें म्हणणें आपसूक सोडून दितले असो विचार ते येवजणे फाटल्यान आशिल्लो.
हस्तिनापूराच्या प्रवेशदारार कृष्णाक येवकार दिवपाक दुर्योधन सोडल्यार सगलेजाण आशिल्ले. त्या वेळार भीष्म, द्रोण, कृप या तिगांयनी कृष्णाक आपले कडेन जेवणाचें निमंत्रण दिलें. पूण कृष्णान तांकां, दुर्योधनान केल्ल्या वायट कर्मांनी तांचोय वांटो आशिल्ल्या कारणान, तो तांचे कडेन अन्न घेवंक शकना अशें तांच्या तोंडारूच सांगलें. कृष्णान जें उलयलें तें फट नाशिल्ल्यान ते तिगुय जाण तोंड धापून ओगी रावले. कृष्ण मागीर दुर्योधनाक मेळपाक गेलो आनी ताणें कौरव- पांडवा भीतर झूज जावचे न्ही ह्या उद्देशान आपूण पांडवांचो दूत म्हणून आयला अशें सांगलें. दुर्योधनान ताका पांडवांचे म्हणणें कितें तें आपणाक सांग अशें म्हणलें. पूण आपणाक कितें सांगपाचें आसा तें दुसऱ्या दिसा दरबारांत सगल्या मुखार सांगता अशी कृष्णान ताका जाप दिली. कृष्ण जेन्ना थंयच्यान वचपाक लागलो तेन्ना दुर्योधनान ताका जेव आनी चल अशें म्हणलें. त्या वेळार कृष्णान दुर्योधनाक सांगलें, हें पळय दुर्योधना, खंयचोय मनीस जेन्ना दुसऱ्या कडेन जेवता तेन्ना दोन कारणां आसतात. एकतर तो ताचो इश्ट आसता ना जाल्यार तो दळिद्री तरी आसता. अशें म्हणून कृष्ण दुर्योधनाच्या म्हालांतत्यान भायर सरलो आनी विदूरा कडेन जेवपाक गेलो. कुंती विदुरा कडेन रावताली. ह्या निमतान कृष्णाक आपले आते कडेन बऱ्यो, वायट गजाली करपाची एक संदूच मेळिल्ली. त्याच दिसांनी कृतवर्मा हो यादव फुडारीय हस्तिनापूरांत आशिल्लो. ह्या कृतवर्माचो ओडो बलरामा भशेनूच दुर्योधना वटेन आशिल्लो. दुर्योधनाचे कृष्णाक अटक करपाचे येवजणीचो वास ताका लागलो. कृतवर्मा कृष्णाक खूब मानतालो. ते खातीर ताणें सात्यकिक तें विशीं शिटकावणी दिली. ते कळना फुडें सात्यकीन तांच्या वांगडा आयिल्ल्या यादव सैनिकांक कृष्णाचें रक्षण करपा खातीर धृतराष्ट्राच्या सभाघराच्या भायर दवरपाचें थारायलें. कृतवर्मानूय धृतराष्ट्राच्या दरबारांत कृष्णाक अटक जावपाक दिवपाची ना, हाची जापसालदारकी आपल्या आंगार घेतली.
फुडें चलता
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
