भांगरभूंय | प्रतिनिधी
उद्देग पर्व- 1
इंद्रप्रस्थाची मागणी
–
(कर्णान मागीर आपलें तोंड उगडलें, दुर्योधना तूं कांय भियेवं नाका. आमी इंद्रप्रस्थ पांडवांक कशेंच परत दिवचें न्ही. झूज जालें जाल्यार जावं. त्या पांडवांक बुद्द शिकोवपाक हांव एकलोच पुरो…. आतां मुखार…)
ते आयकून भीष्म मोट्यान हांसलो आनी ताणें म्हणलें, “कर्णा, तुजें फकत नेट आयकुपाचे. तूं कितलो पराक्रमी आसा तें आमी सगल्यांनी पळयलां. पांडव द्वैतवनांत आसतना तुमी तांकां हिणोवपाक गेल्ले तेन्ना गंधर्वा आड जाल्ले लडायेंत दुर्योधनाक थंयच सांडून पळून गेल्लो तो तूंच न्हय? आनी द्रुपदाच्यो गायो तुमी चोरुंक गेल्ले तेन्ना अर्जुना आड लडाय करताना हार खावची पडिल्यान रथांतल्यात पळून गेल्लो तो कोण रे? तूंच मरे? तुवें फकत तोंडांनूच नेट सांगपाचे.’ सगल्या मुखार भीष्मान लज केली हे कर्णाक सोंसूं नज जालें. ताणें दुर्योधनाक तिडकीन म्हणलें, ‘दुर्योधना, हो तुजो आजो भीष्म आससर हांव तुजे खंयचेच सभेंत भाग घेवचो ना आनी झूज करपाकूय येवचो ना.’ अशें सांगून कर्ण दरबारांतल्यान भायर सरलो. ताका समजावपाक दुर्योधनूय ताचे फाटोफाट गेलो. धृतराष्ट्रान मागीर पांडवाच्या दुताक कौरवांक कितें सांगपाचें आसा तें दूत धाडून युधिश्टीराक कळयतां असो निरोप दी म्हूण सांगलें.
द्रुपदाच्या पुरयतान धृतराष्ट्राचो निरोप पांडवांच्या कानार घालो. दुर्योधनान दरबारांत कितें म्हणलें तेंय सांगलें. ताचे वयल्यान दुर्योधन झुजाची तयारी करता हाचो अदमास पांडवांक आयलो. मागीर तांणीय झुजाची तयारी करपाक सुरवात केली. झुजाचीं कुपां हस्तिनापूर आनी एकप्लव्य नगराच्या मळबांत एकठांय जावंक लागलीं. कांय दिसांनी धृतराष्ट्राचो निरोप घेवन संजय पांडवां कडेन आयलो. ताणें सांगलें, “झूज ही सामकी वायट गजाल. शाण्या मनशान ताचो विचार केन्नाच करचो न्ही. झुजांत आख्ख्या कुळाचो नाश जाता. राज्यांतले तरणाटे मनीस बळ उणें जाता. ते खातीर झूज करचें न्ही.’ संजयान मागीर फुडें म्हणलें, “युधिश्टीरा, तेरा वर्सां पयलींचो दुर्योधन आनी आतांचो दुर्योधन हांच्यांत खूब फरक आसा. ह्या तेरा वर्सांत ताणें नवे इश्ट राजा एकठांय केल्यात. ताचें बळ आनीक वाडलां. तेन्ना हो सगलो विचार करून ताचें आड झूज करपाचें तुमी साहस करचें न्ही.’
संजयान हाडिल्ल्या निरोपांत इंद्रप्रस्थ राज्य परत पांडवांक दिवपा विशीं कांयच नाशिल्लें. ते खातीर संजय जेन्ना हस्तिनापूराक वचपाक भायर सरलो तेन्ना युधिश्टीरान ताका, ‘इंद्रप्रस्थ दिवंक जायना जाल्यार कुरूच्या राज्यांतली पांच गांवां तरी पांडवांक दिवचीं,’ अशें धृतराष्ट्राक सांगपाक सांगलें. ते प्रमाण हस्तिनापूराक पावल्या उपरांत संजयान युधिश्टीराचो निरोप धृतराष्ट्राक सांगलो.
मुखार चलता…
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
