महाभारत : म्हजे कल्पनेंतल्यान

भांगरभूंय | प्रतिनिधी

ताणें देवव्रताक घट्ट वेंग मारली आनी तो रडूंक लागलो. देवव्रतानूच ताका समजायलो आनी शांत केलो. कांय दिसांनी पुतान आपल्या बापायचें लग्न लायलें.

आदल्या भागांत पराशर आनी सत्यवती विशीं वाचलें. आतां मुखार….

आदि पर्व – 3.  शंतनू आनी सत्यवती

शंतनू आपल्या पुताक देवव्रताक घेवन हस्तिनापूरांत आयले उपरांत सुमार चार- पांच वर्सां जाल्यां आसतलीं. शंतनू असोच भोंवपाक म्हणून आपल्या मंत्र्या बाराबर यमुना न्हंयेचे देगेर गेल्लो. बरें वारें व्हांवतालें. त्या वाऱ्या वांगडा एक बरो सुवास शंतनूच्या नाकांत रिगलो. इतलो बरो सुगंध खंय सावन येता काय असो विचार करीत आनी त्या वासाचो माग काडीत- काडीत तो व्हड्यांत बशिल्ले सत्यवती मेरेन पावलो. इतलो बरो सुगंध एके बायलेच्या आंगाक येता हें लक्षात येतकच ताका अजाप जालें. सत्यवतीची सोबीत काय पळोवन ताच्या मनांत तिका आपली बायल करून घेवची अशें दिसलें. आपल्या मंत्र्याक सत्यवती कडेन धाडून ताणें तिचें नांव, बापूय कोण, खंय रावता ही सगली चवकशी केली आनी मागीर तो तिचे सयत दाशराजा कडेन आयलो.

शंतनून दाशराजाक आपली वळख करुन दिली आनी सत्यवती कडेन लग्न जावपाची आपली इत्सा आसा अशें सांगलें. दाशराजान शंतनूक पयलींच वळखल्लो. आपली धूव हस्तिनापूराची सम्राज्ञी जावं येता हें लक्षांत घेवन तो सामको भुरकुटलो. आपल्या सात पिळग्यांचे कल्याण करून घेवपाची संद मुखार आयल्या हें ताच्या लक्षांत आयलें. ताणें शंतनूक म्हणले, ‘राजा, म्हजी धूव तुका दिवपाक म्हाका खूप खोस जातली. पूण म्हजी एक अट आसा. तुजो चलो देवव्रत युवराज आशिल्ल्या कारणान फुडाराक तो हस्तिनापूराचो राजा जातलो, हें हांव जाणा. पूण, सत्यवतीक चलो जालो जाल्यार ताका तुवें हस्तिनापूराच्या शिंवासनार बसोवपाक जाय, म्हज्या नातवान हस्तिनापुराचेर राज्य करपाक जाय, हें तुका मान्य असल्यार सत्यवतीक आतांच तुजे वांगडा घेवन चल.’ दाशराजाचे उलोवप आयकून शंतनू विचारांत पडलो. हस्तिनापूराचो युवराज म्हणून देवव्रताक ताणें अभिशेक केल्लो. अशे आसतना दाशराजांचे म्हणणें कशें खरें जावंक पावतले हें ताका कळना जालें. देवव्रताचो ताका खूब मोग आशिल्लो. ताचेर तो अन्याय करूंक तयार नाशिल्लो. ताणें दाशराजाक कांयच सांगूक ना. थंय उबे आशिल्ले सत्यवतीचेर ताणें एकदां नदर घाली आनी आपल्या मंत्र्या सयत तो परत राजवाड्यांत आयलो.

त्या दिसा सावन शंतनूचे चित्त थाऱ्यार रावना जाले. जेवणा-खाणां वयलें ताचें लक्ष उडलें. ताका परत परत सत्यवती दोळ्यां मुखार दिसूंक लागली. तिच्या आंगाचो कस्तुरीचो सुगंध ताका याद जावंक लागलो. आपल्या बापायंत जाल्लो बदल देवव्रताच्या लक्षांत आयलो. ताणें शंतनूक तरांतरांनी विचारून पळयलें. पूण, शंतनून देवव्रताक कांयच पत्तो लागूंक दिलो ना. देवव्रतान मागीर राजवाड्यांतल्या दरेक मनशा कडेन चवकशी केली. शेवटाक जो मंत्री शंतनू वांगडा दाशराजा कडेन गेल्लो ताणें देवव्रताक शंतनू असो कित्याक थाऱ्यार नाशिल्ल्या भशेन जाला हाचो अदमास सांगलो.

आपल्या बापायक असो दुख्खांत पळोवं नज जावन देवव्रत त्या मंत्र्याक घेवन दाशराजा कडेन गेलो. ताणें दाशराजाक आपल्या वांगडा सत्यवतीक धाड म्हणून सांगलें. दाशराजान देवव्रताक वळखलो आनी ताणे शंतनूक घातिल्ली अट देवव्रताक सांगली. तेन्ना देवव्रतान म्हणलें, ‘हांव तुका वचन दिता. सत्यवतीचोच चलो हस्तिनापूराचो फुडाराचो राजा आसतलो. ते खातीर हांव म्हजे युवराज- पद सोडून दितां. जालें? आता धाड सत्यवतीक म्हजे वांगडा!’ पूण दाशराजाचे इतल्यार समाधान जालें ना. ताणें म्हणलें ‘म्हजो नातू शिंवासनाचेर बसल्या उपरांत तुजी भुरगीं मागीर ताचे आड शिंवासना खातीर झगडलीं जाल्यार? हें आयकून देवव्रतान ताका म्हणलें, ‘हें पळय, म्हज्या बापायचे खोशे खातीर हांव कितेंय करुंक तयार आसा. तुका तसो भंय दिसता जाल्यार हांव प्रतिज्ञा करतां, हांव अख्खी जीण ब्रह्मचारी रावतलों, म्हजें लग्नूच जालें ना जाल्यार, तुजो नातू हस्तिनापूराच्या शिंवासनार बसून बिनधास्त राज्य करूंक शकतलो. खरें न्ही?’ देवव्रताची प्रतिज्ञा आयकून दाशराज सामको चाट पडलो. एक पूत आपल्या बापायच्या सुखा खातीर अशी प्रतिज्ञा करूंक शकता, हें ताणें चिंतुकूच नाशिल्ले. ताची ताकाच लज दिसली आनी ताणें आपली मान सकयल घाली. देवव्रत मागीर सत्यवतीक घेवन हस्तिनापूरांत परत आयलो. ताणें केल्ले खर प्रतिज्ञेक लागून त्या दिसा सावन लोक देवव्रताक भीष्म म्हणूंक लागले.

देवव्रतान आपल्या वांगडा हाडिल्ले सत्यवतीक पळोवन शंतनूक खूब अजाप जालें. आपल्या सुखा खातीर पुतान शिंवासना वयलो हक्क सोडला. इतलेंच न्हय, जाल्यार सत्यवतीच्या भुरग्यांक फुडें त्रास जावचो न्ही म्हणून सबंद जीण आंकवार रावपाचो निर्णय घेतला, हें ताच्या मंत्र्या कडल्यान कळटकच शंतनूचे दोळे दुकांनी भरुन आयले. ताणें देवव्रताक घट्ट वेंग मारली आनी तो रडूंक लागलो. देवव्रतानूच ताका समजायलो आनी शांत केलो. कांय दिसांनी पुतान आपल्या बापायचें लग्न लायलें. शंतनू आनी सत्यवती हांचो मागीर नवीन संवसार सुरु जालो.

अनिल नायक

9049079789