भांगरभूंय | प्रतिनिधी
अर्जुनाकूय ह्या निमतान हें कळ्ळें की ताचें धोणुर्विद्येचें ज्ञान अजून पूर्ण जावंक ना. एकल्यव्याची कुशळटाय ताका अजून साध्य जावंक ना, हें ताच्या लक्षांत आयलें. (आतां फुडें….)
आदि पर्व १४ –
कर्णाची धडपड
कौरव – पांडव विद्येच्या प्रदर्शना वेळार अर्जुनान दाखयल्ल्या धोणू विद्येंतल्यो सगल्यो करामती कर्णानूय करुन दाखयल्यो. ताचे वयल्यान कर्ण अर्जुना इतलोच श्रेश्ठ धोणूर्विर आसा हे सगल्यांक कळिल्लें. पूण, कर्णाक तो अर्जुना परस व्हड धोणूर्विर आसा हें लोकांक दाखोवंक जाय आशिल्लें. ते खातीरूच ताणें अर्जुना आड द्वंद्वझूज करपाक द्रोणा कडल्यान संमती मागिल्ली. पूण ते जालें ना आनी कर्णाची ती इत्सा ताच्या मनांतूच उरली.
द्रुपदा आड जाल्ले लडायेंत दुर्योधन आनी कर्णाक कौरव सैन्या सयत पळून आपल्या तळार येवचे पडिल्लें. पूण कर्णाक जें काम जमूंक ना तेंच काम अर्जुनान द्रुपदाक बंदी करून दाखयल्लें. अर्जुनाचे तुळेन तो स्वता खंय आसा हे कर्णाक कळ्ळें. ताका देशांतलो सगळ्यांत श्रेश्ठ धोणूर्विर म्हणून नामना जाय आशिल्ली. ताणें खूब विचार केलो आनी धोणूर्विद्येचे आनीक चड ज्ञान मेळोवपा खातीर भीष्माच्या गुरु कडेन वचपाचे थारायलें.
मागीर एक दीस तो अचकीत उठलो आनी हिमालयाचे दिकेन गेलो. भीष्माच्या गुरुचो आश्रम सोदून काडून कर्ण ताका मेळ्ळो. धोणूर्विद्या शिकपाक आपूण ताचे कडेन आयला अशें कर्णान गुरुक सांगलें. अंबेच्या प्रकरणा वेळार भीष्माची आनी ताच्या गुरुची लडाय जाल्ली तेन्ना भीष्मान आपल्या गुरुक हारयल्लो. ती जाल्ली लज ताका याद आसली. भीष्म क्षत्रीय आशिल्ल्यान हाचे फुडे क्षत्रियांक शिश्य करप ना, अशें गुरून थारायल्लें. ताणें कर्णाक विचारले, ‘हें पळय, हांव फकत ब्राह्मणांक शिकयता. क्षत्रियांक शिकोवपाचें हांवें सोडून दिलां. तूं क्षत्रीय न्ही मरे?’ कर्णान तो सारथ्याचो पूत म्हणल्यार सूतपुत्र आशिल्ल्यान ‘न्ही’ अशी जाप दिली. पूण आपूण ब्राह्मण न्हय हे सांगूक ना. भीष्माच्या गुरून मागीर कर्णाक आपलो शिश्य म्हणून स्विकारलो आनी ताणें कर्णाक धोणूर्विद्येचें सगलें ज्ञान दिलें. कर्णाक ताणें जें जें शिकयलें तें सगलें ज्ञान कर्णान आत्मसात केले. कर्णाची शिकपाची खर इत्सा पळोवन ताच्या गुरुक ताचें खूब कवतूक दिसलें. कर्णा सारको शिश्य आपणांक अजून मेरेन मेळूंक नाशिल्लो अशें खूबदा ताचो गुरु उलोवन दाखयतालो. तें आयकून आपूण इतले पयस शिकपाक आयलो ताचे सार्थक जाले अशें दिसले. पूण कर्णाचें नशीबच फुटकें आशिल्लें.
एक दीस कर्णाचो गुरू कर्णाक घेवन धोणूर्विद्देचो सराव करपाक रानांत गेल्लो. सराव जाल्या उपरांत विसव घेवपाक ते दोगूयजाण एका तळ्याचे कुशीक झाडाचे सावळेंत बसले, जाण्टो गुरू थकिल्लो. ताका बसला थंय न्हीद येवपाक लागली. तो थंयच खोलप्यांनी आड पडलो. कर्णान बेगी-बेगीन आपल्या गुरूची तकली आपले मांडयेर घेतली. गुरूक रोखडीच सुस्त न्हीद लागली. कर्ण बशिल्लो थंय ताचे मांडयेक खोलप्यांनी आशिल्ली जळू लागली आनी ती ताचें रगत चोखूंक लागली. कर्णाक खूब त्रास जावंक लागलो, पूण आपूण हाल्लो जाल्यार आपल्या गुरुची न्हीद मोडतली म्हणून ते त्रास सोशीत तो तसोच बसून रावलो. ताका ती जळू हळूहळू ताचे रगत चोखून व्हड जातना दिसताली, पूण तो कांयच करूंक शकनासलो. पोटभर रगत चोखले उपरांत ती जळू आपसूक सकयल पडली. ते जळून केल्या घायातल्यांन रगत व्हावूंक लागलें. घावो जाल्ले सुवातेर सोंसूक जायना इतलें चुरचुरतालें, पूण बशिल्ले सुवाते वयल्यान कर्ण हाल्लो ना.
कांय वेळान गुरु जागो जालो. कर्णाचे मांडयेतल्यान रगत व्हावता तें ताणें पळयलें आनी कर्णाक कितें जालें काय म्हणून विचारलें. तेन्ना कर्णान ताका कितें घडलें तें सगलें सांगलें. तें आयकून गुरूक खूप अजाप जालें. ताणें कर्णाक म्हणलें ‘इतलो वगत इतली दूक सोंसपाक तसोच मनीस आसचो पडटा. म्हाका एक सांग तू खरेलो कोण?’ ते सरशी कर्णान गुरुचे पाय धरले आनी ताची क्षमा मागली. आपूण धृतराष्ट्राचो सारथी अधिरथ हाचो पूत कर्ण, ब्राह्मण न्हय. धोणूर्विद्या मेळोवपा खातीर आपणे सत्य लिपोवन दवरलें हेंय कर्णान गुरुक सांगलें. सगलें आयकल्या उपरांत कर्णाच्या गुरून कर्णाक म्हणले, “हें पळय, तुजी ज्ञान मेळोवपाची लालसा पळोवन म्हाका खूब बरे दिसता. हांवेन, तुका धोणूविद्येचे सगळे ज्ञान दिला, हांव फकत ब्राह्मणांकूच शिकयतां हें हांवें तुका पयलींच सांगिल्लें, पूण तुवेन सत्य लिपयलें. म्हज्या अणभवा वयल्यान हांव तुका सांगता की चुकीच्या मार्गान मेळयल्ली विद्या केन्नाच उपकाराक पडना. फुडें तुजे नशीब! म्हजो आश्रम सोडून तू आतां तुज्या घरा वच, आनी परत म्हजे कडेन येवं नाका.’ अशें म्हणून कर्णाचो गुरु आपल्या आश्रमा वटेन चलत रावलो. कर्ण आपली शस्त्रां घेवन थंय सावनूच हस्तिनापूराक परत आयलो. धडपड करून ताणें धोणूर्विद्येचे खूब ज्ञान मेळयल्ले, पूण तो अर्जुना परस श्रेश्ठ धोणूर्विर आसा काय ना तें आता फुडलो काळूच सांगूक शकतालो.
–
अनील नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
