भांगरभूंय | प्रतिनिधी
फुडल्या शुक्रारा महाशिवरात्री. जीण, जगांतलो काळोख आनी अज्ञान पयस करपाक महादेवाची आराधना करपाचें पर्व. शिवआराधनेंतल्यान नीतिमत्ता, सुविचार, गुण, क्षमा, धर्मदाय आपणावन हेरांक दुख्ख, क्लेश, यातना ना दिवपाचो संकल्प घेवपाचो दीस. अमृतमंथनांत उत्पन्न जाल्लें वीख पियेवन विश्व, सृश्टी वाटावपी आनी समस्त जगांतल्यान न्हयकारात्मकताय, भिरांत, काळोख सोंपोवपी नीलकंठ शिवाची उपासना करपाची ही रात.
आयज जगांत युक्रेन आनी गाझा पट्टींतल्या झुजांत निश्पाप बायलां, भुरग्यांचे बळी पडतात तेन्ना आनी देशांत कट्टर धर्मवादी शक्ती समाजांत वीख कालोवन हत्या, दंगे, स्फोट, मारामारी घडोवन हाडटात तेन्ना महाशिवरात्रीच्या साजरीकरणांतल्यान समाजमनांत सद्गुण, बऱ्यो भावना रूजोवपाची, जागोवपाची चड गरज आसा. वर्तमानांत भगवे वस्त्रधारी महंत, योगी सत्तासनांचेर आरूढ जावन सत्तालोलुप जाल्ले आसात. वेंचणुकां वेळार निश्पाप, अशिक्षित, उणे शिक्षितां मुखार दिसरात देव– देव करत तांचे मुखार देवळांचो खेळ मांडत इतर धर्म, संस्कृतायें विशीं विखारी भावनांचो उन्माद रूजोवन, जागोवन ध्रुवीकरणांतल्यान वेंचणुकांत जैत मेळोवन सत्ता हातासपाचें राजकारण सरभोंवतणी दिसपाक लागलां.
मंदीर बांदप सरकारचें काम न्हय, पूण राममंदीर बांदलें हाचें पुराय स्रय घेत सरकार, सत्तापक्षांतले फुडले वेंचणुकेंत आपणाक सत्तेंत दवरपाचें आवाहन मतदारांक करतना दिसतात. आतां महाशिवरात्रीचो म्हूर्त सादून काशी कायाकल्प बदलाचे मतां खातीर मार्केटींग जातलें हें निश्चित.
काशी ही महादेवाची नगरी आनी त्या मतदारसंघा खातीर प्रधानमंत्र्यांची उमेदवारी जाहीर जाल्या. म्हूण वेंचणुकांचे फाटभूयेंचेर हे खेपो काशींत आनी देशभर राजकी पक्ष नेते, सरकारी बाबा- गुरू- सद्गुरू- योगी चॅनलांचेर जनता जनार्दनाक डिझायनर तांडव आनी उच्चभ्रूंचें ध्यान- चिंतनाचें दर्शन घडोवन देशांतलें वातावरण शिवमय करतले, हातूंत दुबाव ना. रजिस्ट्रेशन, बुकिंगा सुरू जाल्लीं आसात. राजकी शिवभक्त शिवलिंगाचो अभिशेक करतात ते चॅनल लायव्ह दाखयतले. अशा वेळार सुरक्षेच्या कारणांक लागून खऱ्या भक्तांक देवा मुखार प्रवेश वर्ज्य आसतलो. शिवाच्या खऱ्या भक्तांक मरणाची भिरांत आसना. उरफाटो तांकां मोक्ष मेळोवपाची ताकतीक आसता. हाच्या उरफाटें सत्तासुख, मायाजालांत गुरफटिल्ल्या राजकारण्यांक फुडलीं बरींच वर्सां सत्ता भोगपाची इत्सा आशिल्ले कारणान मरणाचें भंय सतयता आनी आपलो जीव वाटावपा खातीर झेड, वाय सुरक्षेची ‘गॅरंटी’ लागता.
शिव आनी शिवभक्तांचें जग विंगड आसता. पयस निर्जन न्हंयेचे देगेर, रानांत, मसंडभूंयेंत, दोंगरार बसून नीरव शांततेत निर्विकार मनान शक्तीच्या पुजेंतल्यान आपली आराधना करपी भक्तगणांक महादेव वळखता. ज्या सुवातींनी इंटरनेट, वीज पावना तसल्या सुवातींचेरूय खऱ्या भक्तांक महादेव आपलो ‘लिंक’ पावयता. शिव आनी महाकाल ही एकाच शक्तीचीं दोन असीम रूपां. भक्तगणान ध्यान केंद्रीत करपा सारके शिवाक रूप आसा तर महाकाल हो विनाआकार आनी अमर्याद. तो काळाचो देव आनी काळाच्याय पलतडीं पावता. काळ ही संकल्पना फकत मर्त्य म्हळ्यार नश्वर जिणेक लागू पडटा. शिव ही एक मुळावी– ओरीजिनल- म्हणटात तशी सुरवात आनी अंत नाशिल्ली आद्य शक्ती. ताका आद्य, आत्मा, वैश्विक आत्मा, पुरूश, पूर्ण सत्य म्हणू येता. शिव आनी महाकाल ह्यो एकाच नाण्याच्यो दोन बाजू.
आपलो धगधग उणावपाक शिवाचें वास्तव्य बर्फमय कैलासाचेर आसता खरें, पूण मसंडभूय हो शिवाचो प्रिय वाठार. काशी ही देशांतली आनी जगांतली सगळ्यांक व्हड मसंडभूंय म्हूण हें शिवाचें प्रिय स्थान. थंय मणिकर्णिका मसंडभूयेंत अनादी काळा सावन उजो न पालयता दिसाचीं चोवीस वरां आनी वर्साचे बाराय म्हयने मडीं जळत आसतात. थंय व्हड- ल्हान, गिरेस्त- गरीब असो भेदभाव केल्लो दिसना. शेठजीच्या मड्या कुशीक शेतकाराचें मडें लासतना दिसता. शिव माया, मोहाच्या पाशांच्या पलतडीन पावन सतत समाधिस्थ आसता. शिवाचे समाधीक निश्ठो म्हणटात. हे वैश्विक समाधींत समरस आसतनाय भवतालच्या घडणुकांची ताका खबर आसता. मायाजालांत गुरफटिल्ल्या सादारण मनशाच्या नातलग, इश्ट, लागींची व्यक्तीची जीण महाकाल जेन्ना सोंपयता तेन्ना तो दुख्खी जावन दुकां व्हांवयता. लोकांक रडोवपी, रूदन करपाक लावपी म्हूण शिवाक रूद्र म्हणटात. सभ्य समाज जांचो तिरस्कार करता त्या भूत, प्रेत, वेताळ, पिशाच्य, यक्ष, डाकिनी, कुश्मांडा ह्या गणांच्या सहवासात शिव सहजपणान मसंडभूंयेंत प्रेतांचो गोबोर कुडीचेर माखून ध्यानमग्न बशिल्लो आसता. बरें- वायट, स्वच्छ- घाणयारे हातूंत शिवाक फरक दिसना. 1194 वर्सा मुहम्मद घोरीन काशी विश्वनाथ देवूळ उडोवप आनी 1585 वर्सा राजा मानसिंग आनी राजा तोडरमलां करवी मुगल सम्राट अकबरान तें बांदून घेवप. उपरांत 1669 वर्सा अकबराचो पणतू औरंगजेबान ते ध्वस्थ करप आनी 1780 वर्सा परतून एकदां राणी अहिल्याबाई होळकरान तें बांदून घेवप आनी हालीं काशी शाराचो विकास आनी सुशोभिकरणाच्या नांवार मोदी सरकारान काशी विश्वनाथ कॉरिडोर करपा खातीर वाटेर येवपी देवळां घुमट्यांतलीं 286 शिवलिंगां कावलांत उडोवन काशीचो मॉल करप वा गोंयांत पुर्तुगेज राजवटींत ताच्या देवळांची इगर्ज करप हाचें तांडव करून विनाश करपी शिवाक सोयर- सुतक आसना.
शिवाक भोळो सांब म्हळें तरी आपले खरे भक्त आनी सवंग- भक्तांक वळखूपाचे बाबतींत तो फटवना. खऱ्या भक्तां खातीर तो नेम घालिना. परमभक्त कण्णन (कणप्पा) शिकाऱ्यान आपणे मारिल्ल्या सवणीं- जनावरांच्या मांसाचो ताका दिल्लो निवेद्य महादेवाक वर्ज्य नासता तर दुसरो परमभक्त तेलंग स्वामीन स्वमूत्रान केल्लो लिंगाभिशेक ताका मान्य आसता. मसंडभूंयेंत शिवदर्शनाक न्हावन धुवन कद- पितांबर न्हेसून सोवळ्यांत वचपाची परंपरा ना. देशभर मंदिरात वर्सुकी जात्रेंत, मूर्ती न्हाणोवप, तांकां रथांत बसोवन ह्या इव्हेंटा खातीर सजून आयिल्ले महाजन, कमिटी सभासदांनी रथ भोंवडावप हें खरे तर पुरोहितांनी लायिल्ले खेळ. तो खऱ्या शिव आराधनेचो भाग जायना.
काशींतल्या अशीर गल्लींतलीं तीं देवळां, घुमट्यो ह्यो आमच्या प्राचीन दायज, संस्कृतीचें अभिन्न आंग जावन आशिल्लीं. औरंगजेबान फोडली त्या परस चड देवळां, घुमट्यो सोबितकरणाच्या नांवा खाला काशींत वर्तमानांत नश्ट जाल्यात. राजकी फायद्या खातीर काल अयोध्येंत जय श्रीराम उद्घोश करपी राजकारणी आयज हर हर महादेव करत काशींत तर फाल्यां जय श्रीकृश्ण करत मथुरेंत पावतले. शिवाचो अंश डी.एन.एत घेवन जल्म घेतिल्ले स्मार्त शिवा कडल्यान कसलीय अपेक्षा बाळगी नासतना फकत ताकाच एकनिश्ट रावन निस्पृहपणान- फेसबुक, व्हाॅट्सअॅपाचेर देखावो करनासतना – ताची आजीवन आराधना करत एक निर्भेळ आनंद उपभोगतात. हांगा शिवाचें वर्णन केलां ते पुराणांतल्या मान्यतेनुसार. आधुनिक धर्मगुरूंनी गरजे नुसार, काळा नुसार ताचें व्यक्तिमत्व सौम्य केलां.
दीपक लाड
पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
