भांगरभूंय | प्रतिनिधी
दुबय, खबरां संस्था ः महादेव ऑनलायन सट्टेबाजी अॅपाचो सहसंस्थापक रवी उप्पल हाका दुबयंत अटक केली. अंमलबजावणी संचालनालयाच्या (ईडी) विनवणे प्रमाण इंटरपोलान रवि उप्पला आड पयलींच रेड कॉर्नर नोटीस जारी केल्ली. भारतीय एजन्सीच्या सुचोवणेचेर कारवाय करुन दुबय थळाव्या पुलिसांनी रवी उप्पलाक ताब्यांत घेतला. हाचे उपरांत सौरभ चंद्रकाराकय बेगीन अटक जावपाची शक्यताय आसा.
रवि उप्पला आड मनी लाँड्रिंगचे प्रकरण
छत्तीसगड आनी मुंबय पुलीस सोडल्यार बेकायदेशीर सट्टे संबंदीत पयशे लुटपाच्या प्रकरणांत रवि उप्पलाची चवकशी ईडी करता. तपास एजन्सी कडल्यान ऑक्टोबरांत रायपूरांतल्या खासा मनी लांड्रिंग प्रतिबंध कायदो (पीएमएलए) न्यायालयांत उप्पल आनी ताचो वांगडी सौरभ चंद्रकार हांचे आड मनी लॉन्ड्रिंगचे आरोपपत्र दाखल केल्ले.
417 कोटींची मालमत्ता जप्त
महादेव ऑनलायन सट्टेबाजी अॅप प्रकरणांत ईडीन दोन म्हयन्यां आदीं मुंबय, कोलकाता आनी भोपाळांतल्या 39 सुवातींनी धाड घालून 417 कोटी रुपयांची मालमत्ता जप्त केल्ली. रवि उप्पल हो सौरभ चंद्रकार हांचे वांगडा दुबयंत रावतालो. म्हयन्या आदीं केंद्र सरकारान महादेव सट्टेबाजी अॅप सयत 22 बेकायदेशीर सट्टेचे अॅप आनी वेबसायटी ब्लॉक करपाचो आदेश जारी केल्लो.
2017 वर्सा रवी आनी सौरभ हांणी ऑनलायन सट्टे वरवीं पयशे जोडपा खातीर एक वेबसायट तयार केली. पूण सुरवेक हे संकेतथळाचे वापरपी उणे आशिल्ले आनी तातूंतल्यान खूब उणी येणावळ मेळटाली. 2019 वर्सा सौरभ नोकरे खातीर दुबय गेलो. कांय काळा उपरांत सौरभान आपलो इश्ट रवीकय दुबय आपयलो.
रवी दुबय पावचे पयलीं सौरभान सट्टेची वेबसायटी वरवीं पयशे जोडपाची पुराय येवजण तयार केल्ली. हाचे उपरांत ह्या दोगांयनी महादेव बुक ऑनलायन नांवाची सट्टेची वेबसायट आनी अॅप तयार केलो. सोशल मिडिया आनी हेर माध्यमांतल्यान ताचो प्रचार करपाक सुरु केले. महादेव कंपनीचो वेवसाय वाडोवपाखातीर सौरभान दोन मार्ग आपणायले. सोशल मिडिया मार्केटींग आनी प्रभावशाली लोकां वरवीं अॅपाचो प्रचार करप आनी हेर सट्टेचे अॅप्स आनी वेबसायटी विकतीं घेतल्यो.
सौरभ चंद्रकार आनी रवी उप्पल हांणी ऑनलायन सट्टेबाजी अॅपा वरवीं देशांतल्या सुमार 4 हजार पॅनल ऑपरेटरांचें नेटवर्क तयार केल्लें. दर एका पॅनल ऑपरेटराक 200 गिरायक आशिल्ले आनी तांणी बेट लायले. अशे तरेन दोगय दिसाक 200 कोटी रुपया मेळयताले अशें म्हण्टात. ह्या बेकायदेशीर पयशांनी ताणी दुबयंत आपलें साम्राज्य स्थापन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
