भांगरभूंय | प्रतिनिधी
महात्मा फुले हे एक व्हड समाजसुदारक आशिल्ले. तांच्या यत्नांतल्यानच आयज समाजांत एकवट आनी भावपण दिसता. महात्मा जोतीबा फुले हांचो जल्म 11 एप्रिल 1827 दिसा सातारा जिल्ह्यांतल्या कटगुण गांवांत जालो. ल्हानपणारूच तांचे मदीं समाजसुदारणेची तळमळ आशिल्ली. हाकाच लागून आयज महात्मा फुले भारतभर समाजसुदारक म्हणून वळखतात. महात्मा फुले हे कर्तृत्ववान मनीस आशिल्ले. एक समाज प्रबोधनकार, समाजसेवक, व्हड विचारवंत, समाजसुदारक, लेखक, बायलांक आनी लोकांक शिक्षीत करपी, जाती वेवस्था ना करपी ह्या कार्या खातीर ताका पुराय देश वळखता. तांच्या वावरा मुखार नतमस्तक जाता.
महात्मा ज्योतिबा फुले हाच्या दर एका कार्यांत तांची बायल सावित्रीबाय फुले वांगडा आसताली. समाजीक वावरांत तांची भुमिका दिसता. आयज शिक्षणांत दिसपी सगळ्यो सुदारणां, बदल आनी विवीधतायेचें श्रय महात्मा ज्योतिबा फुले आनी सावित्रीबाई फुले हांकां वता.
ज्योतिबा फुले हांणी 1869 वर्सा रायगडा वयली शिवाजी महाराजांची समाधी सोदून काडली. तांच्या जिविताचेर पयलो पोवडो बरयलो. तांणीच 1870 त शिवाजी महाराजांचो वावर लोकां मेरेन पावचो म्हूण शिव जयंतीची सुरवात केली. उपरांत लोकमान्य बाल गंगाधर टिळकान शिवजयंती वरवीं लोकांक एकठांय हाडपाचो वावर केलो. विसाव्या शेंकड्यांत डॉ. बाबासाहेब आंबेडकर हांणीय शिवजयंती मनयली. दोन फावटीं शिवजयंती कार्यावळीचें अध्यक्षपद सांबाळ्ळें. मागीर पुराय महाराष्ट्रांत शिवजयंती सुरू जाली. आयज तर प्रत्येका गांवांत व्हडा प्रमाणात ती आयोजीत करतात. म्हणल्यार महात्मा ज्योतिबा फुले हे समाजसुदारक आशिल्लेच, पूण शिवाजी महाराजांची समाधी सोदून तांणी इतिहासाच्या मळाचेरुय काम केलां. अश्या समाजसुदारक ज्योतिबा फुले हांकां नमन. तांणी समाज सुदारणेच्या कामाक एक दिका दिली.
महात्मा फुले लिखाणूय करताले. तांची एक कविता खूब प्रसिद्ध आसा. तातूंत तांणी शिक्षणाचें म्हत्व पटोवन दिलां.
विद्येविना मती गेली ।
मतिविना नीती गेली।
नितीविना गती गेली ।
गतिविना वित्त गेले ।
वित्ताविना शूद्र खचले ।
इतके अनर्थ एका अविद्येने केले ।।
फक्त कविता बरोवन ते ओगी रावंक ना. तांणी बायलां शिकल्यार कुटुंब शिकता अशें बरोवन स्वताचे बायलेक पयलीं शिक्षण दिलें. मागीर 1948 त पुण्याच्या भिडे वाड्यांत बायलांची पयली शाळा काडली. सावित्रीबाई हे शाळेची मुख्याध्यापक आशिल्ली. हे काम करपी ती देशांतली पयली बायल. बायलां खातीर शाळा काडपी महात्मा फुले हे पयले भारतीय. अस्पृशां खातीर तांणी वेताळ पेठेंत 1852 त शाळा काडली. ह्या कार्याक सनातनी लोकांक खर विरोध केलो. फुले हांकां जिवेशीं मारपाक रामोशीय धाडले. पूण महात्मा फुले भियेंवक नात. तांणी आपलें कार्य चालूच दवरलें.
तांच्या पावलांचेर पावल दवरून आयज सैमाक वाचोवप ही आमची जापसालदारकी. महात्मा फुलेच्या जल्मदिसा निमतान देशभर व्हड प्रमाणांत झाडां रोवपाची गरज आसा. कारण आयज समाज आधुनीक युगा कडेन वाटचाल करीत आसा. पूण दिसान दीस सैमाचो नाश जावपाक लागला. ताका वाटावप ही आमच्या सगळ्यांची जापसालदारकी. फुलेंच्या जल्मदिसा निमतान वृक्षारोपण जावप खूब गरजेचें. हातूंत आमकां ज्योतिबा फुलेंचें आचार- विचार नक्कीच दिसतले आनी झाडांच्या पानां- फळांत, फुलांत महात्मा फुलेंचें दर्शन जातलें. जय हिंद.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
