भांगरभूंय | प्रतिनिधी
प्रधानमंत्र्यांच्या विधाना उपरांत राजकी वातावरण तापपाची शक्यताय
महात्मा गांधी हांचेर जेन्ना पयलो चित्रपट तयार जालो तेन्ना संवसार भर गांधी विशीं एके तरेची उमळशीक निर्माण जाली. ताचे पयलीं तांकां कोणूच वळखनाशिल्लो अशें प्रधानमंत्री नरेंद्र मोदी हांणी म्हणलें. गांधींच्या विचारांक संवसारभर पावोवपा खातीर आमी ७५ वर्सांत कांयच करूंक ना अशेंय तांणी सांगलें. प्रधानमंत्र्याच्या ह्या विधाना उपरांत राजकी वातावरण परत एक फावट तापपाची शक्यताय आसा.
नरेंद्र मोदी हांणी नेमकें कितें सांगलें?
प्रधानमंत्री नरेंद्र मोदी हांणी हालींच एका चॅनलाक मुलाखत दिली. हे मुलाखतींत तांणी वेगवेगळ्या विशयांचेर आपलें मत स्पश्ट केलें.
तांणी म्हणलें, महात्मा गांधी एक व्हड व्यक्तीमत्व आशिल्लें. आमी संवसारभर तांची वळख निर्माण करपाक जाय आशिल्ली. ही आमची जापसालदारकी आशिल्ली. पूण तातूंत आमकां अपेस आयलें. तांकां कोणूच वळखनाशिल्ले. महात्मा गांधीचेर पयलेच खेपे चित्रपट तयार जालो तेन्ना संवसारभर महात्मा गांधी कोण आशिल्ले? हे विशीं जाणून घेवपाची उमळशीक वाडली. तांची वळख निर्माण करपा खातीर आमी ७५ वर्सांत कांयच करूंक ना अशें मोदी हांणी सांगलें.
गांधीच्या विचारांतल्या जायत्या समस्यांचेर उपाय
मार्टीन ल्यूथर किंग आनी नेन्सन मंडेला हांकां संवसारभर वळखतात. पूण महात्मा गांधी तांचेपरस खंयच उणे नाशिल्ले. हांवें संवसारभर भोंवडी केल्या. पूण गांधी वा गांधी वरवीं भारताक जी वळख मेळपाक जाय आशिल्ली ती मेळूंक ना. आयज संवसारांतल्या जायत्या समस्यांचो उपाय गांधींच्या विचारांत आसा. आमकां खूब लुकसाण जालां, अशें तांणी सांगलें.
… आमी ताचें मार्केटिंग करीनात
सर्वोच्च न्यायालयान रामाच्या देवळा विशीं निवाडो दिलो तेन्ना देशांत खंयच हिंसाचाराची घडणूक घडूंक ना. सगळे कडेन शांतताय आशिल्ली. ही शांतताय एके वटेनची नाशिल्ली. हाचें श्रेय सगळ्यांक वता. राममंदिर समर्पण सुवाळो जालो तेन्ना बाबरी मस्जिद आंदोलनात झुजपी इकबाल अंसारी हाजीर आशिल्लो. हो आमचो भारत. पूण आमी ताचें मार्केटिंग करीनात अशें तांणी सांगलें.
भारत आघाडीचेरूय टिका केली
फुडें उलयतना तांणी कॉंग्रेस आनी इंडिया अलायन्साचेरूय टिका केली. पयलीं कॉंग्रेस आनी अखिल भारतीय फुडारी वेंचणुके वेळार देवळांत वताले. पूण आतां ते देवळांत वतना दिसनात. इतलेंच न्हय, हे वेंचणुके वेळार एकूय फुडारी इफ्तार पार्टीक वचूंक ना. कारण आमी अशी परिस्थिती निर्माण केल्ली. आमकां लागून तांचेर चेंपण आयलें. आतां तांकां कळ्ळें की मतां खातीर अशे तरेचें राजकारण काम करचें ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
