भांगरभूंय | प्रतिनिधी
उत्तर प्रदेशाचे मंत्री दारा सिंह चौहान हांचे कडल्यान मुख्यमंत्र्यांक आमंत्रण
पणजीः अंदूंच्या महाकुंभ मेळाव्याक 45 कोटी भक्तगण वांटेकार जावपाचे आसात अशी आमकां आस्त आसा. ह्या मेळाव्याक गोंयचे मुख्यमंत्री डॉ. प्रमोद सावंत हांणी वाटेकार जावपाक इत्सा उक्तायल्या. मुख्यमंत्र्यां बरोबरच समेस्त गोंयकारांनी 12 वर्सांत एकदा येवपी महाकुंभ मेळव्यांत उत्तर प्रदेशांतल्या प्रयागराजांत वांटेकार जावचें असो उलो उत्तर प्रदेशाचे बंदखण मंत्री दारा सिंह चौहान हांणी मारलाे.
12 वर्सांत एकदा येवपी अंदूंचो महाकुंभ मेळावो 13 जानेवारी ते 16 फेब्रुवारी मजगतीं गंगा, यमुना आनी सरस्वती न्हंयेच्या त्रिवेणी संगमाचेर प्रयागराज हांगासर जातलो. ह्या महाकुंभ मेळाव्याक वांटेकार जावचे म्हूण उत्तर प्रदेश सरकाराचे प्रतिनिधित्व करपी बंदखण मंत्री दारा सिंह चौहान हांणी मुख्यमंत्री डॉ. प्रमोद सावंत हांकां आंमत्रण भेटयलें. उपरांत हे विशीं म्हायती दिवपा खातीर चौहान हांणी दोना पावलच्या ताज सिदाद दे गोवा ह्या रिसोर्टांत पत्रकार परिशद आपयली. पत्रकार परिशदेंत केंद्रीय जल शक्ती राज्यमंत्री रामकेश निशध आनी वैभव श्रीवास्तव बंदखण सचीव हाजीर आशिल्ले.
उत्तर प्रदेशाचे मुख्यमंत्री योगी आदित्यनाथ हांचे वतीन गोंयचे मुख्यमंत्री डॉ. प्रमोद सावंत हांकां आमी महाकुंभ मेळाव्याचे निमंत्रण भेटयलां आनी मुख्यमंत्री सावंत महाकुंभांत वांटेकार जावप ही आमचे खातीर अभिमानाची गजाल आसा, अशें दारा सिंह हांणी सांगलें.
आमकां खात्री आसा मुख्यमंत्री सावंत हे प्रयागराज कुंभ मेळाव्यांत वांटेकार जातले आनी तांणी हे विशीं आपली इत्सा लेगीत उक्तायल्या. तांणी आमच्या कर्मचाऱ्यांक हे विशीं सुचोवणी दिल्यात तशेंच आयोजकांचेय नंबर लेगीत घेतल्यात. आमी तांकां सांगलां की प्रयागराजांत उत्तर प्रदेशाचे मुख्यमंत्री योगी आदित्यनाथ तांकां विशेश रुपांत येवकारतले, अशें दारा सिंह हांणी सांगलें.
मुख्यमंत्री प्रमोद सावंत हांचे भेटी खातीर दरेक गजालींचेर पुराय लक्ष दितले. म्हाका विस्वास आसा की फक्त मुख्यमंत्री प्रमोद सावंत एकलेच येवचेनात तांचे मंत्रीमडळाचे वांगडी आनी आमदारय महाकुंभांत वाटेकार जातले. तांचे वांगडा समेस्त गोंयच्या जनतेनय ह्या महाकुंभांत व्हड संख्येन वांटेकार जावचे असो उलो सिंह हांणी मारलाे.
प्रधानमंत्री नरेंद्र मोदी हांच्या मार्गरदर्शना खाला आनी मुख्यमंत्री योगी आदित्यनाथ हांच्या फुडारपणा खाला अंदूंचो महाकुंभ जानेवारी 13 ते फेब्रुवारी 26 मजगतीं गंगा, यमुना आनी सरस्वती न्हंयेच्या त्रिवेणी संगम घांटार जातलो. 12 वर्सांत एक फावटी जावपी महाकुंभ उत्सवाक युनेस्कोन सांस्कृतीक दायज म्हूण मान्यताय दिल्या, अशें सिंह हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
