भांगरभूंय | प्रतिनिधी
हे पिराये भायल्या लोकांक रेल्वेंत चडल्यार जातलो दंड
पणजी : महाकुंभ खातीर प्रयागराज वचपी फुकट रेल्वे सेवेचो लाव १८ ते ६० वर्सां पिरायेच्याच गोंयकारांक मेळटलो. १८ वर्सां सकयल्या आनी ६० वर्सां वयले पिरायेच्या कोणेंय रेल्वेंत पांय दवरल्यार तांकां तालांव दितले आनी तांकां लागसारच्या रेल्वे स्टेशनाचेर देंवयतले. समाजकल्याण खात्या वतीन दिवपी वळखपत्र सक्तीचें आशिल्ल्यान दरेकल्यान स्वताचे जापसालदारकेचेर मुफत रेल्वे सेवेचो लाव घेवचो, अशें समाज कल्याण मंत्री सुभाष फळदेसाय हांणी स्पश्ट केलें. १३ फेब्रुवारीक दुसरी रेल्वे गेले उपरांत २१ फेब्रुवारीक तिसरी रेल्वे वतली अशी म्हायती तांणी दिली.
मजगतीं, ६ फेब्रुवारीक प्रयागराजाक गेल्ले ११९१ प्रवासी बरे भशेन गोंयांत पावल्यात.
प्रयागराजाक वचपी दुसरी रेल्वे १३ फेब्रुवारीक सांजेवेळार ४.४० वरांचेर मडगांव रेल्वे स्टेशनावेल्यान सुट्टली. १३०० प्रवाशांक घेवन ही रेल्वे प्रयागराज वतली. ही रेल्वे १५ फेब्रुवारीक सकाळीं ६.२५ वरांचेर प्रयागराज पावतली. ही रेल्वे १८ फेब्रुवारीक सकाळीं ११.५० वरांचेर परत मडगांव रेल्वे स्टेशनाचेर पावतली. नांव आनी हेर म्हायती आशिल्ले वळखपत्र समाज कल्याण खात्या वतीन दितले. वळखपत्र नाशिल्ल्यांक रेल्वेंत प्रवेश दिवचे नात.
शीं खूब आशिल्ल्यान स्वेटर तशेंच हेर सामान भाविकांनी हाडपाचें. परतीच्या प्रवासा वेळार १८ फेब्रुवारीक एक जेवण दिवपाक रेल्वेन असमर्थताय दाखयल्या. ह्या जेवणाची वेवस्था भाविकांक करची पडटली. वतना रेल्वेंत फकत जेवण दितात. प्रयागराज ते संगम घाटा मेरेन वचपाक आनी येवपाक मेळून ३० किमी अंतर आसा. हें अंतर चलत वचपाची तयारी भाविकांनी दवरपाक जाय. प्रयागराजाक पावले उपरांत जेवण तशेंच हेर खर्च भाविकांक करचो पडटलो. भाविकांची सुरक्षा, सामान तशेंच भलायकेची जापसालदारकी सरकार घेवचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
