भांगरभूंय | प्रतिनिधी
प्रयागराज, खबरां संस्था: महाकुंभच्या संगम घांटार बुधवारा सकाळीं संगमाचेर खेटाखेटीची परिस्थिती निर्माण जाल्ल्यान बोवाळ निर्माण जालो. हे खेटाखेटींत १४ जाणांक मरण आयलें, जाल्यार जायते जाण जखमी जाल्यात. मौनी अमाशेच्या पवित्र स्नाना खातीर लाखांनी भाविकांनी गर्दी केले उपरांत ही घडणूक घडली.
मेळ्याची अधिकारी आकांक्षा राणा हांणी सांगलें, जखमींक हॉस्पिटलांत दाखल केल्यात. संगम घांटार बॅरिकेट्स तुटिल्ल्यान कांय लोक जखमी जाल्यात. सध्या १४ जाणांक मरण आयलां. जखमींचो नेमको आंकडो सध्या आमचे कडेन ना.
घडणुके सुवातेर ऍम्बुलन्सी आयल्यात. जखमींक कुंभच्या सेक्टर २ तल्या तात्पुरत्या हॉस्पिटलांत हालयल्यात. खेटाखेटी उपरांत आयचें अमृत स्नान रद्द केल्ल्याचें आखाडा परिशदेन जाहीर केलें. अधिकार्यांनी भाविकांक संगमांत स्नान केले उपरांत ती सुवात खाली करपाचो उलो मारला. तशेंच, संगम घांटार वचून स्नान करचें न्हय आनी लागसारच्या हेर घाटांचेर स्नान करपाचो उलो मारला.
जखमी लोकांचे संख्येची आजूनय म्हायती मेळूंक नासली तरी इंडिया टुडेच्या सुत्रांनी दिल्ले म्हायती प्रमाण, १४ जाणांक मरण आयलें आनी ३० ते ४० भावीक जखमी आसात. मरण आयिल्ल्यांचो आंकडो वाडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
