भांगरभूंय | प्रतिनिधी
नांव नोंद करपा खातीर 915, नांव वगळपा खातीर आयले 60 अर्ज
पणजी: गोंयांतल्या मतदारांची खाशेली खोलायेन तपासणी जाले उपरांत (एसआयआर) मुखेल वेंचणूक अधिकारी कचेरेन मसुदो मतदार वळेरी जाहीर केल्ली. हे वळेरी विशीं 7 ते 26 डिसेंबर (दनपारां 12 मेरेन) 975 आक्षेप नोंद केल्यात. हातूंत वळेरेंत नांव नोंद करपा खातीर 915 जाल्यार नांव वगळपा खातीर 60 अर्ज आयल्यात. वळेरी विशीं राजकी पक्षां कडल्यान एकूय आक्षेप नोंद केल्लो ना. मसुदो वळेरेंत नांव घालप वा वगळपा खातीरची निमाणी मुजत 15 जानेवारी 2026 मेरेन आसतली.
एसआयआर उपरांत आयोगान मतदार वळेरेंतल्यान 1 लाख 42 मतदारांचीं नांवां वगळ्ळ्यांत. जाल्यार 1 लाख 82 हजार 403 मतदार मॅप जाल्ले नात. आयोगान मॅपींग जावंक नाशिल्ल्या मतदारांचीं नांवां मसुदो वळेरेंत आस्पावीत केल्यात. पूण अशा मतदारांचीं वा तांच्या आवय-बापायचें नांव 2002चे मतदार वळेरेंत नाशिल्लें.
ह्या मतदारांक ते भारतीय नागरीक आशिल्ल्याचो पुरावो दिवचो पडटलो. हे खातीर तांकां विशिश्ट कागदपत्रां आयोगाक सादर करचीं पडटलीं. ह्या मतदारांक आयोगान हाचे पयलीं नोटिसो धाडल्यात. हाचेर सुनावणेची तारीख आनी वेळ दिला. ह्यो सुनावण्यो जाता तितले बेगीन पुराय करप ही आयोगाची मोख आसा.
तशेंच मरण आयिल्ले मतदार सोडून नांवां वगळिल्ल्या हेर मतदारांक लेगीत संद दिल्या. आपलें नांव चुकीचे पद्दतीन काडलां अशें दिसत आसल्यार अशे मतदार अर्ज 6 भरूंक शकतात. सगलीं कागदपत्रां योग्य आसत जाल्यार तांचें नांव निमाणें मतदार वळेरेंत येतलें. आक्षेपां विशींच्यो सुनावण्यो 7 फेब्रुवारी 2026 मेरेन निकलांत काडटले. जाल्यार 14 फेब्रुवारी 2026 मेरेन निमाणी मतदार वळेरी जाहीर जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
