भांगरभूंय | प्रतिनिधी
बंगळुरू, खबरां संस्था: मशिदींत ‘जय श्री राम’ अशी घोशणा केल्यार कोणाच्योच धर्मीक भावना दुखवनात अशी टिप्पणी कर्नाटक उच्च न्यायालयान केल्या. तशेंच ह्या प्रकरणांत आरोपी आड चालू आशिल्ली गुन्यांवकारी कार्यवाही रद्द करपाचे निर्देश न्यायालयान दिल्यात, ह्या वेळार न्यायालयान ही टिप्पणी केल्ली. फाटल्या म्हयन्यांत ह्या प्रकरणाची सुनावणी जाली. ह्या प्रकरणाचे सविस्तर आदेश मंगळारा न्यायालयाचे वेबसायटीचेर अपलोड जाले. मजगतीं, न्यायालयाच्या ह्या निर्णया उपरांत वेगवेगळी चर्चा जावपाची शक्यताय आसा.
नेमकें कितें प्रकरण
फाटल्या वर्सा सप्टेंबरांत दक्षीण कन्नड जिल्ह्यांतल्या एके मशिदींत दोग जाणांनी प्रवेश केल्लो. भितर सरतांच त्या दोगांयनी ‘जय श्री राम’ घोशणा दिवपाक सुरवात केली. तेन्ना थळाव्यांनी हे विशीं पुलिसांक म्हायती दिली. रोखडेंच पुलिसांनी थंय पावून त्या दोगांकूय अटक केली. तशेंच भारतीय दंड संहितेचे कलम २९५ (अ), कलम ४४७ आनी कलम ५०६ खाला ताचे आड गुन्यांव नोंद जाल्लो.
वकिलांनी कितें युक्तीवाद केलो?
पुलिसांनी ही केस नोंद करतकच आरोपी कर्नाटक उच्च न्यायालयांत गेले. ह्या प्रकरणाचे सुनावणे वेळार मशीद भौशीक सुवात आशिल्ल्यान कलम ४४७ लागू जायना असो युक्तिवाद आरोपीच्या वकिलांनी केलो. तशेंच कलम २९५ (अ) हो धर्मीक भावनांक दुखोवपा संबंदीत कलम आसा. तर फकत जय श्री रामाची घोशणा केल्यार कोणाचीय भावना कशी दुखता? हें समजून घेवपा भायलें आसा, हो वाद आरोपीच्या वकिलांनीय दिल्लो. हाचे भायर हिंदू आनी मुसलमान नागरीक ह्या वाठारांत एकवटान रावतात असोय उल्लेख तांणी केला.
उच्च न्यायालयान नेमकें कितें म्हणलें?
मजगतीं, दुबावित मनशान मशिदींत घोशणा दिवपा फाटलो हेतू कितें आशिल्लो? हें तपासचें पडटलें. देखून आरोपी पुलिसांच्या ताब्यांत आसचे, अशी मागणी पुलीस वकिलांनी केली. पूण जय श्री राम जाहीर करून भौशीक सुरक्षिततायेक कसलोच धोको ना अशें सांगून न्यायालयान ही याचिका न्हयकारली. सर्वोच्च न्यायालयाच्या निर्णया प्रमाण दरेक कृती आयपीसीच्या कलम २९५ (अ) मोडपाक शकना, जो मेरेन भौशीक सुरक्षिततायेक धोको निर्माण जायना. ह्या प्ररणांत खंयच भौशीक सुरक्षिततायेक धोको आशिल्ल्याचें दिसना. देखून आरोपी आड फुडली कारवाय करपाचो आदेश दिवप म्हणल्यार एके तरेन कायदो मोडप जातलें अशी टिपणी न्हयायालयान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
