भांगरभूंय | प्रतिनिधी
श्रीस्थळ काणकोणां 1947 वर्सा मंडळ जाल्लें स्थापन
काणकाण: श्रीस्थळ काणकोणां 1947 वर्सा मल्लिकार्जून सेवक मंडळ स्थापन जाल्लें. उपरांत ताचें श्रीमल्लिकार्जून कला खेळां भजनी मंडळ हातूंत रुपांतर जालें. काणकोण म्हालांतले हे पोरणे संस्थेक जिल्हो ग्रामीण विकास येवजणेन बांदून दिल्ल्या सभाघराचें विवीध मानेस्तांचें हस्तुकीं उक्तावण जालें.
हे कार्यावळीक श्रीस्थळ पंचायतीची सरपंच सेजल गांवकार, उत्तर गोंयचे आर.डी.एचे प्रकल्प संचालक भूषण सावयकार, दक्षीण गोंया संचालक दीपाली नायक, श्रीमल्लिकार्जून देवस्थान समितीचे अध्यक्ष विठोबा देसाय, डी.आर.डी.ए.चे कार्यकारी अभियंते नितीन नेरुलकार, अभियंतो उल्हास गांवकार, थळाले पंच वांगडी दशरथ गांवकार, संस्थेचे अध्यक्ष प्रसाद गायक आनी मयूर म्हाळशी हाजीर आशिल्ले. मानेस्तांचे हाजिरेंत ह्या सभाघराचें उक्तावण जालें. तशेंच नांवतकट्याचेंय अनावरण केलें.
सुरवातेक पार्वती महिला मंडळाच्या 18 ते 80 पिराये गटांतल्या वांगड्यांनी येवकारगीत सादर केलें. ह्या वेळार ज्येश्ठ लोककलाकार कमलाकर म्हाळशी हांणी संस्थेची वळख करून दिली, आनी संस्था कशी कार्यरत आसा ताची म्हायती दिली.
ह्या सभाघराची वेवस्था राखपाची जापसालदारकी थळावे संस्थेन घेवची अशें भूषण सावयकार हांणी सांगलें. 1947 वर्सा स्थापन जाल्ली संस्था आयजूय 76 वर्सां मेरेन कार्यरत आशिल्ल्यान तांणी संस्था चालकांची तोखणाय केली.
ह्या वेळार उलयतना दीपाली नायक हांणी बायलांनी सक्षम जावचें अशें सांगतनाच तांकां कुटुंबांनी प्रोत्साहन दिवचें. बायलांनी बायलां खातीर काम करचें आनी मुखार येवचें अशें आवाहन केलें.
हे संस्थेक हाचे मुखारूय सगले तरेचें सहकार्य करतले अशें विठोबा देसाय हांणी सांगलें.
श्रीस्थळ पंचायत वाठारांत सभाघर जाल्ल्यान आनी मल्लिकार्जून कला खेळां मंडळाक ताची सामकी गरज आशिल्ली. अशें सांगून संस्था चालकांनी घेतिल्ल्या कश्टा खातीर सरपंच सेजल गांवकार हांणी संस्थां चालकांचें अभिनंदन केलें.
ह्या वेळार सभाघर बांदकाम कंत्राटदार देवेंद्र नायक, कार्यकारी अभियंते नितीन नेरूलकार, अभियंतो उल्हास गांवकार आनी सभाघरा खातीर कश्ट घेतिल्ले सौरभ गायक हांचो मानेस्तां हस्तुकीं शाल, श्रीफळ, यादस्तीक भेटोवन भोवमान केलो.
ह्या सभाघराच्या बांदकामा खातीर काणकोणचे आदले आमदार इजिदोर फर्नांडीस हांणी खूब कश्ट घेतिल्ल्याचो उल्लेख ह्या वेळार संस्थेचे सचीव अरवींद गायक हांणी केलो. सौरभ गायक आनी इजिदोर फर्नांडीस हांच्या सहकार्याक लागूनच हें सभाघर उबें राविल्ल्याचें सांगून फर्नांडीस हांचे उपकार मानले.
सुरवातेक संस्थेचे अध्यक्ष प्रसाद गायक हांणी येवकार दिलो. हे कार्यावळीक देवस्थान समितीचे आदले अध्यक्ष राजेंद्र देसाय हाजीर आशिल्ले. मानस्तांक जतीन काळे, विकास म्हाळशी, महेंद्र गायक, अभिषेक म्हाळशी, अरविंद गायक, सुधाकर म्हाळशी हांणी फुलांतुरे भेटयले. गिरीजा नायक हांणी सुत्रसंचालन केलें. अरविंद गायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
