भांगरभूंय | प्रतिनिधी
पणजीः गोंयांत मलेरियाचेर नियंत्रण दवरपाक बेगिनूच भलायकी कायद्यांत बदल करतले. ते प्रमाण भलायकी खात्याक सगळ्या स्थलांतरीत कामगारांची तपासणी करपाचो तशेंच तांचे कडेन भलायकी कार्ड नासत जाल्यार दंड दिवपाचे अधिकार मेळटले. ते खातीर भलायकी खात्यान कायदो खात्याक शिफारस केल्या. कायदो खाते हाचेर विचार करता, अशी माहायती राष्ट्रीय वेक्टर बोर्न दुयेंस नियंत्रण कार्यावळीची उपसंचालक डॉ. कल्पना महात्मे हांणी दिली.
डॉ. महात्मे हांणी सांगलें, गोंयांत मलेरियाची थळावी प्रकरणां सांपडनात. सगळीं प्रकरणां ही स्थलांतरीत कामगारां मदीं मेळ्ळ्यांत. चडशे कामगार मलेरियाचो रॅड अलर्ट आशिल्ल्या शेजारच्या राज्यांतल्या विवीध जिल्ह्यांतल्यान येतात. भलायकी कायद्या प्रमाण सध्या फक्त बांदकाम प्रकल्पांचेर काम करपी कामगारांची तपासणी करतात. ते उपरांत तांकां मलेरिया मुक्त आशिल्ल्याचें हॅल्थ कार्ड दितात. हॅल्थ कार्ड नाशिल्ल्या कामगारांच्या कंत्राटदारांक दंड दिवपाचो अधिकार लेगीत खात्याक आसा, अशें डॉ. महात्मे हांणी सांगलें.
कांय कडेन बांदकाम कंत्राटदारां कडल्यान कामगारांची रावपाची वेवस्था योग्य पद्दतीन करिनात. अश्या सुवातांचेर उदक सांचून दवरतात. त्या उदकांत जळारांची पैदास जावन मलेरिया पातळपाची शक्यताय आसता. अश्या वेळार लेगीत कंत्राटदारांक भलायकी खात्या कडल्यान दंड लेगीत दितात. अशें आसलें तरीय गोंयांत बांदकाम सोडून हेर मळार लेगीत स्थलांतरीत कामगारांची तपासणी करपाचे अधिकार भलायकी खात्या कडेन नात. अश्या सुवातांचेर मरेलिया वाडपाक शकता. हेच खातीर आमी कायदो खात्याक भलायकी कायद्यांत बदल करपाची शिफारस केल्या, अशें डॉ. महात्मे हांणी सांगलें. कायद्यांतले नवे तजविजे प्रमाण भलायकी खात्याक हॉटेल, ट्रॉलर, दीसवड्याचेर काम करपी वा हेर खंयूय काम करपी स्थलांतरीत कामगारांची तपासणी करपाक मेळटली. कामगारां कडेन हॅल्थ कार्ड नासत जाल्यार दंड करपाचो अधिकार भलायकी खात्याक मेळटलो. ह्या नव्या बदलाक लागून गोंयांतलो मरेलिया नियंत्रणांत उरपाक मजत जातली, अशें डॉ. महात्मे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
