भांगरभूंय | प्रतिनिधी
पणजी : मराठी वयल्यान विधानसभेंत बोवाळ जालो. मराठीक राजभाशेचो दर्जो दिवचो असो प्रस्ताव जीत आरोलकार हांणी शुन्य वरा वेळार मांडलो. तो राजभास कायद्या आड असो आरोप विरोधकांनी करून आक्षेप घेतलो. बोवाळा मजगतीं आरोलकार हांणी प्रस्ताव मांडलो.
मराठी भाशेचो राजभास कायद्यांत आस्पाव करूंक नाशिल्ल्यान मराठीचेर अन्याय जाला, असो आरोप मांद्रेंचे आमदार जीत आरोलकार हांणी शुन्य वरा वेळार प्रस्ताव मांडटना केलो.
ह्या प्रस्तावाचेर विरोधी पक्ष फुडारी युरी आलेमांव, गोवा फॉरर्वडचे आमदार विजय सरदेसाय, आम आदमी पक्षाचे आमदार वेन्झी व्हिएगस हांणी आक्षेप घेतलो.
मराठींत भजनां जातात, मराठींत लग्नाची पत्रिका छापतात आनी ते भायर पुराय उत्तर गोंयांत चडशीं मराठी दिसाळीं वतात, ते खातीर मराठीक राजभाशेची मान्यताय दिवची, असो युक्तिवाद आरोलकार हांणी केलो.
हाचेर विजय सरदेसाय हांणी आक्षेप घेत सांगलें, घटनेच्या आठव्या परिशिश्टांत कोंकणीचो आस्पाव करपा खातीर राजभास कायदो चालीक लायल्लो. मराठीक राजभास दर्जो दिवप हें कायद्याक आव्हान दिवपा सारकें. जर तांकां हो विशय मांडपाक जाय जाल्यार कायदो सुदारणा करपा खातीर आरोलकार हांणी विधीमंडळ थाराव मांडचो, अशें विजय सरदेसाय हांणी सांगलें.
मराठी भाशेक राजभास कायद्यांत दुसरे सुवातेची मागणी करपी हो प्रस्ताव आसा आनी तातूंत वायट कांय ना हें स्पश्ट केलें. ह्या प्रस्तावाचेर वीज मंत्री सुदीन ढवळीकार हांणी जीत हांकां तेंको जाहीर केलो. मुख्यमंत्री डॉ. प्रमोद सावंत हांणी स्पश्ट करतना सांगलें, एका कायद्या संबंदांत शुन्य वराक प्रस्ताव मांडपाक मेळटा, तातूंत कसलीच हरकत ना. उपरांत आरोलकार हांणी बोवाळा मजगतीं आपलो प्रस्ताव मांडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
