मराठी चित्रपट महोत्सव आनी गोंय

भांगरभूंय | प्रतिनिधी

गोंयांत प्रतिभावान गुणी कलाकार आसात हें अमान्य करपाचो प्रस्नूच ना, देखून अशा रत्नांक आकार दिवपाचो यत्न कोण करता जाल्यार….

गोंयांत मराठी चित्रपट महोत्सव घडोवन हाडप हें आतां तशें एक नवेंपण उरूंक ना. फाटल्या देड दशकांतलो असलो चवदावो उत्सव हालीं पणजे जालो. वास्कोच्या संजय आनी श्रीपाद ह्या शेट्ये भावांच्या कश्टान आनी प्रसंगार पदरमोड करून हें आयोजन जाता. हो मराठी चित्रपट महोत्सव नेमान चवदा वर्सां येसस्वीपणान घडोवन हाडप हें सोंपें काम न्हय. दर वर्सा कांय नव्या चित्रपटांचे प्रीमियर शो दाखोवपा वांगडाच शेट्ये भावांनी तातूंत हेर कांय लोकप्रीय चित्रपटांचोय आस्पाव करून मराठी रसिकांची तान भागोवपाचें काम शेट्ये भावांचें विन्सन वर्ल्ड करता आनी ह्या वर्साय तातूंत खंड पडपाचें कारण नाशिल्लें. ताचे खातीर शेट्ये भाव आनी तांच्या पंगडाक तोखणायेक पात्र आसात, हातूंत दुबाव ना, पूण कितेंय सकारात्मक घडटा वा घडपाची शक्यताय आसा हाचेर विचार करतना समाधानकारक जाप मेळना.
मराठी चित्रपट महोत्सव आतां सोंपला. राज्य पांवड्यावेले कोंकणी आनी मराठी चित्रपट महोत्सवूय फुडल्या दोन दिसांनी आयोजन जावपाचें आसा आनी भारतीय आंतरराष्ट्रीय चित्रपट महोत्सवाक फकत तीन म्हयने उरल्यात, देखून गोंयचे चित्रपट मोगीय ताची आतुरतेन वाट पळयतात. हे फाटभुंयेर मराठी चित्रपट महोत्सवाच्या संघटनेन आमकां कितें मेळ्ळां वा अजून उल्लेख करपा सारको मराठी चित्रपट कित्याक दिवंक शकलो ना असो प्रस्न सामान्य मराठी प्रेक्षकाक पडलो जाल्यार तो सहजसुलभ म्हणचो पडटलो.
गोवा मराठी फिल्म महोत्सवांत महाराष्ट्राच्या फिल्म इंडस्ट्रींतल्या व्हड व्यक्तींच्या हाजिरी आशिल्ली. तांच्या हाजिरेंतल्यान ह्या महोत्सवाक एक खाशेली प्रतिश्ठा मेळ्ळ्या हें सांगपाची गरज ना. अशे मानेस्त आनी कांय दर्जेदार चित्रपट हाजीर आशिल्ल्यान महोत्सवाक यश मेळटा आनी ते साध्य करपाक आयोजकांनी आपलो जीव ओततात. शेट्ये भावांचें यश हातूंतच आसा. हे खेपेय नामनेचे नट-कलाकार, निर्माते-दिग्दर्शक हांचे हाजिरेचें आकर्शण कायम आशिल्लें आनी महोत्सव रंगलो. महेश मांजरेकाराच्या ‘निरावधी’ फिल्माचो संवसारीक प्रीमियर करून महोत्सवाचो उक्तावण जालो, जाल्यार हेर कांय चित्रपटांचोय प्रीमियर जालो. मराठी आनी हिंदींतय आपली सुवात निर्माण केल्ल्या दिग्गज अभिनेतो मोहन आगशेक कृतज्ञताय पुरस्कार दिवन भोवमान करून ह्या सुवाळ्याक वेगळी किनार मेळ्ळी. महेश मांजरेकर, रोहिणी हट्टांगडी, मृणाल कुलकर्णी, सुबोध भावे, अजिंक्य देव, गजेंद्र अहिरे, सिद्धार्थ जाधव. अनिता दाते सारकिल्या जायत्या दिग्गजांक एकठांय हाडप सोंपें न्हय, पूण हे खेपेय आयोजकांनी उणाव पडपाक दिलो ना. मोहन आगाशे, महेश मांजरेकार आदी हांणीय आयोजकांची तोखणाय केली, पूण फाटलीं जायतीं वर्सां गोंय फिल्म महोत्सवांत गोंयचो असो एकूय चित्रपट नाशिल्ल्याची खंत मात आमच्या मराठी रसिकांक लागून उरल्या, हें मात स्पश्ट जाणवतालें.
गोंयांत ‘इफ्फी’न आपलें घर केल्ल्याक दोन दशकां परस चड काळ जाला, पूण आमी अपेक्षा केल्लें तें कांय प्रमाणांत साध्य केलां काय ना हाची जाप नकारात्मकूच उरल्या. भारताच्या आंतरराष्ट्रीय चित्रपट महोत्सवाचो पर्यटनाचे नदरेन ह्या वाठाराक फायदो जाला हें खरें, पूण ‘इफ्फी’ लागून फिल्म संस्कृताय व्हड प्रमाणांत पातळटली अशी अपेक्षा कितले मेरेन पुराय जाल्या हो प्रस्न आसा. दरवर्सा आमी इफ्फींत मराठी, हिंदी आनी हेर प्रादेशिक भाशांतले दर्जेदार चित्रपट पळयतात, पूण फाटल्या कांय वर्सांत आमी ह्या मळार खंय आसात हाचो विचार करचो पडटा. दोन- तीन दिसां भितर गोंय राज्य कोंकणी- मराठी फिल्म महोत्सव आयोजीत जाता आनी ह्या महोत्सवांत कोंकणी फिल्मांचो वाडिल्लो आंकडो सगळ्यांचें समाधानकारक आसलो तरी मराठी विभागांत एकूच सिनेमा आसचो हें मनाक पटपा सारकें ना. कोंकणी फिल्मांक हांगा व्हड प्रेक्षक आसा आनी मराठी फिल्मांक मेळना अशें कोणेंय म्हणलें जाल्यार तें चुकीचें थारतलें. पूण कोंकणी चित्रपट तयार करपाक व्हड प्रमाणांत तरणाटे मुखार येतात हें आयज जें चित्र दिसता तें गोंयच्या चित्रपट उद्देगाच्या फुडारा खातीर थाकाय दिवपी आसा. राज्य फिल्म महोत्सवांत ‘चोपडी’ हो एकमेव मराठी चित्रपट आसुंये, जाका लागून जायते प्रस्न कोणाच्याय मनांत रेंगाळत रावले तर, तांकां जाप मेळप कठीण.
गोंयांत पयलीं दर दोन वर्सांनी सरकारी पांवड्यार राज्य चित्रपट महोत्सव घडोवन हाडटाले. आतां 2020 उपरांत पयलेच खेपे ताचें आयोजन जावपाक लागला म्हणून फिल्मांची गर्दी आसतली अशी अपेक्षा आशिल्ली, पूण तशें ना. कोंकणीन आपलो ध्वज उबयत दवरला हें बरें, पूण मराठी फिल्मां कित्याक तयार जायनात हाचे फाटलीं कारणां आमकां सोदून काडचीं पडटलीं. हांगा मराठी फिल्मां बरी चलनात हें कारण चुकीचें दिसता. पुराय महाराष्ट्र राज्य दर्जेदार मराठी फिल्मांची वाट पळयता. आयज दोन हजार युट्युब चॅनल लेगीत अशा फिल्मांचे गिरायक आसात, देखून समस्या खंय आसा तें आमकां कळना. दर वर्सा महाराष्ट्रांतले चारशें चित्रपट सेंसर प्रमाणपत्रा खातीर वतात, मागीर गोंयचे निर्माते फाटीं कित्याक? ह्या प्रस्नाची जाप मेळना. राज्य सरकाराचें धोरण फिल्म निर्मिती खातीर फायदेशीर आसा, पूण हें चित्र अपेक्षीत नाशिल्लें. ताचे खातीर मुख्यमंत्री डॉ. प्रमोद सावंत हांणीय महाराष्ट्राच्या फिल्म निर्मात्यांक संकेत दिला हें बरें. तीस टक्के थळावे कलाकार आनी तंत्रज्ञ आसल्यार अशा उत्पादकांक अनुदान मेळपाक पात्र करपाचें धोरण आसल्यार मागीर ताका कोणे आक्षेप घेवपाचें कारण ना. गोंयांत प्रतिभावान गुणी कलाकार आसात हें अमान्य करपाचो प्रस्नूच ना, देखून अशा रत्नांक आकार दिवपाचो यत्न कोण करता जाल्यार ताचे खातीर हात सदळ केल्ल्यार मळब कोसळचें ना. गोंयच्या कलाकाराचो सहभागान एखादो बीग बजेट मराठी चित्रपट गोंयच्या चित्रपट उद्देगाची बरी बुन्याद घालूंक शकता. प्रतापसिंह राणे – लुईझिन फालेरो हांच्या काळा सावन आमी फिल्म सिटी बांदपाची गजाल उलयतात, पूण आमचें सोबीत गोंय हेंच मुळांत एक फिल्म सिटी आसा. ते बाबतींत आमी खूब भाग्यवान आसात. जिद्दीनूच ह्या मळाचेर मुखार वचपाची गरज आसा. तेन्नाच आमी कितें तरी साध्य करपाची आस्त बाळगूंक शकतले.

वामन प्रभू
9823196359