भांगरभूंय | प्रतिनिधी
सद्याक परतून एकदां मराठीच्या नांवांन कांय लोक शिगमो खेळूंक लागल्यात. गोंय सरकारान सरकारी नोकऱ्यो गोंयकार भुरग्यांक मेळच्यो म्हणून कोंकणी पेपर सक्तीचो केलो. कांय जाणांक हें नाकसुरें गेलें . तांकां हो मराठीचेर केल्लो अन्याय कसो दिसलो आनी तांणी बोवाळ घालपाक सुरवात केली. आमचे मुख्यमंत्री बाब प्रमोद सावंतान कोंकणी कित्याक केल्या आनी ताचो गोंयकार भुरग्यांक कसो फायदो जाता हें सांगून लेगीत कांय असंतुश्ट लोकांचें समाधान जालें ना. खरें म्हणल्यार सगल्या गोंयकारांनी मुख्यमंत्र्यांचें समर्थन करूंक जाय आसलें, तांची तोखणाय करूंक जाय आसली. सरकार चुकता तेन्ना आमी सरकाराचेर टिका करतात. आमचो अधिकार तो. पूण जेन्ना सरकार कितें तरी बरें पावल उबारता, गोंयच्या भुरग्यांच्या हिताचो विचार करता तेन्ना सरकाराची तोखणाय करप आनी सरकाराक पुराय तेंको दिवप आमचें कर्तव्य थारता. फक्त विरोधा खातीर विरोध करप समा न्हय. मुख्यमंत्री प्रमोद सावंतान गोंयकार भुरग्यांच्या हिताचो विचार करून कोंकणीची सक्ती करपाचो निर्णय घेतला आनी ते तोखणायेक पात्र थारल्यात.
ते तोखणायेक पात्र थारल्यात अशें जरी आमी म्हणलें तरी कांय घाडी-भगतांक तें उस्तुरें गेलां आनी ते खुदूंक लागल्यात. गोंय सरकार मराठीचेर अन्याय करता म्हणपाचो साक्षात्कार तांकां जाला. जे लोक विस्मृतींत गेल्यात तांकां आपूण आसात म्हणपाचें दाखोवंक कितें तरी करचेंच पडटा. पूण कितें करप हेंच तांकां कळना. आपूण एका बऱ्या निर्णयाक विरोध करतात आनी हाचो आमच्याच भुरग्यांक त्रास जावं येता हाचो ते विचार करिनात. अशे वेळार आमी आनी चड करून गोंयकार तरणाट्यांनी, जे नोकरेचे प्रतिक्षेंत आसात तांणी सरकारचें समर्थन करूंक उबे रावंक जाय आनी जे कोण ह्या सरकारी निर्णयाक विरोध करतात तांकां तांचो जागो दाखोवन दिवंक जाय. आमचो कोंकणीक विरोध ना म्हणप आनी जें जें कोंकणीक मेळटा तितलेंय मराठीक जायच म्हणपाचो अट्टाहास करून कोंकणीक नखलामी करप हें सदचेंच जालां. सद्याक हे लोक फक्त कोंकणीक न्हय जाल्यार अप्रत्यक्षपणान गोंयच्या तरणाट्यांक विरोध करूंक लागल्यात. सरकारान हांच्या दडपणाक बळी पडूंक जायना. भावने परस पोट महत्वाचें म्हणपाचें सगल्यांनी समजून घेवंक जाय.
आमचो मराठीक विरोध ना. गोंयची मराठी आसा त्याच जाग्यार आसतली. किर्तनां, भजनां, आरती, पुजा-पाठ सगलें मराठीनूच जातलें. पूण हें सगलें केलें म्हणून गोंयकार भुरग्यांचें पोट भरचें ना. ताचे खातीर तांकां काम करचेंच पडटलें आनी तें काम मेळटलें तर कोंकणीची सक्ती करचीच पडटली. आमी जेन्ना आमचें सगलें देव देवस्पण मराठींत चलता म्हणटात तेन्ना सत कितें तें आमी पळेच नात. आमी फक्त भावनेच्या भरांत हें उलयतात. एक काळ आशिल्लो जेन्ना आमचें देवस्पण मराठींत जातालें. कारण आमच्या देवळांनी देशस्थ वा कोकणस्थ पुरयत आसले. ते मराठी आशिल्ल्यान मराठी पुस्तकांतले पाठ वाचून आमकां कोंकणीत अणकारून सांगताले. देवाक मराठींतल्यान गाराणें घालताले आनी आमचो समज देवाची भास मराठी असोच जातालो.
पूण आयज परिस्थिती बदल्ल्या. आयज ह्या पुरयतांच्या भुरग्यांनी पुरयतपण सोडलां आनी ते दुसऱ्या वेवसायांत गेल्यात. आयज देवळांनी जे पुरयत येतात ते कर्नाटकांतले. तांकां मराठी कळना. ते कानडी पुस्तकां वाचून देवाची पुजा करतात. देवाक सांगणें मात कोंकणींतल्यान करतात. आतां कांय दिसांनी आमचे लोक देवाची भास कानडी समजना जातकूच जालें. आतां देव देवस्पण खंयचेय भाशेंत जालें म्हणून कोण ताका विरोध करचो ना. कारण भौसाक काय देवळांतली नोकरी मेळची ना. थंय विशिश्ट समाजांतलोच मनीस पुरयत म्हूण लागतलो आनी आमचे भुरगे काय ती नोकरी धरचो ना. म्हणटकूच जेन्ना पोटाचो प्रस्न येतलो आनी चड करून सरकारी नोकरेचो तेन्ना ती आपणाक मेळची अशें खंयच्याय भुरग्याक दिसतलें. आतां जागो रिकामो आसा हें समजतकूच जायते भुरगे थंय धांवतले. तांकां आडावप शक्य आसा? ना! ते खातीर एक उपाय म्हणटा तो कोंकणी सक्तीचो आनी सरकारान तेंच तर केलां. गोंयकार भुरग्याचें हीत पळेलां. मागीर ताका विरोध कित्याक?
आतां समजुंया सरकारान कोंकणी वांगडा मराठीय म्हणलें तर कितें जातलें?
मात्शे पोस्टांत वचून पळेयात. गोंयचीं पोस्टां महाराष्ट्र सर्कलांत येतात. थंय मराठीच चलता आनी गोंयच्या भुरग्यां खातीर राखीव अशे जागे नात. सद्याक गोंयच्या पोस्टांनी गोंयकार दिसता व्हय? एकलोय ना. लोकांच्या दारांनी भोंवून पत्रां वांटपी पोस्टमन लेगीत भायले. खरें म्हणल्यार जांचो संबंध आम जनते कडेन येता त्या ऑफिसांनी थंयच्या लोकांक कळटा ते थळावे भाशेंतले मनीस कामाक घेवंक जाय. पूण गोंयांत सद्याक कितें दिसता? पोस्ट आसूं वा बँक कोंकणी जाणा जाल्ले दिसच नात. सगलेच हिंदी भाशीक. गोंयच्या भुरग्यांक पोटा खातीर गोंय सोडून वचचें पडटा. आनी जांकां भायर वचप शक्य जायना ते बेकार भोंवतना दिसतात. आमी फक्त भावनीक विचार करतले काय ह्या भुरग्यांचोय विचार करतले? पयरूच वास्को एका ओव्हर ब्रीज रेंपाक लागून बोवाळ जालो. थंय उलयतना लोकांनी मार्मगोवा पोर्ट आनी गोवा शिपयार्ड थळाव्यांक कामार घेना म्हणपाचो शीण उक्तायलो आनी थळाव्यांक काम मेळचे खातीर सरकारान कोंकणीची सक्ती करची म्हणपाची मागणी केली. लोकांक आतां कळूंक लागलां कोंकणीची सक्तीच आमच्या भुरग्यांचो फुडार सांबाळटली. भावनीक नदरेन विचार करिनासतना थळाव्यांच्या पोटाचो विचार जावंक जाय. सरकारान ते नदरेन योग्य पावल उबारलां अशेंच म्हणचें पडटलें.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
