भांगरभूंय | प्रतिनिधी
पणजीः मराठी वयल्यान विधानसभेंत बोवाळ जालो. मराठीक राजभाशेचो दर्जो दिवचो असो प्रस्ताव मांद्रेंचे आमदार जीत आरोलकार हांणी शुन्य प्रहरा वेळार मांडलो. तो राजभास कायद्या आड असो आरोप विरोधकांनी करुन आक्षेप घेतलो. बोवाळा मजगतीं आरोलकार हांणी प्रस्ताव मांडलो.
मराठी भाशेचो राजभास कायद्यांत आस्पाव करुंक नाशिल्ल्यान मराठीचेर अन्याय जाला, असो आरोप जीत आरोलकार हांणी शुन्य प्रहरा वेळार प्रस्ताव मांडटना केलो. ताचेर विरोधी पक्ष फुडारी युरी आलेमाव, गोवा फॉरर्वडचे आमदार विजय सरदेसाय, आम आदमी पक्षाचे आमदार वेन्झी व्हिएगस हांणी आक्षेप घेतलो.
मराठींत भजनां जातात, मराठींत लग्नाची पत्रिका छापतात आनी ते भायर पुराय उत्तर गोंयांत चडशी मराठी दिसाळीं खपतात देखून मराठीक राजभाशा म्हूण मान्यताय दिवची, असो युक्तीवाद आरोलकार हांणी केलो.
हाचेर विजय सरदेसाय हांणी आक्षेप घेत सांगलें, शुन्य प्रहर हे कायद्याचे आड घालपाक मेळना. घटनेच्या आठवे परिश्टितांत कोंकणीचो आस्पाव करपा खातीर राजभास कायदो चालीक लायिल्लो. मराठीक राजभास दर्जो दिवप हें कायद्याक आव्हान दिवपा सारकें. जर तांकां हो विशय मांडपाक जाय जाल्यार कायद्यांत सुदारणा करपा खातीर आरोलकारान विधी मंडळ थाराव मांडचो, अशें सरदेसाय हांणी सांगलें.
मुख्यमंत्री डॉ. प्रमोद सावंत हांणी एका कायद्या संबंदांत शुन्य प्रहराक प्रस्ताव मांडपाक मेळटा, तातूंत कसलीच हरकत ना हें स्पश्ट केलें. उपरांत आरोलकार हांणी बोवाळा मजगतीं आपलो प्रस्ताव मांडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
