भांगरभूंय | प्रतिनिधी
जालौन, खबरां संस्था: दोन इश्टांनी विखारी जिन्नस खावन आत्महत्त्या केली. मरणा पयलीं तांणी नामनेचे तत्त्ववेत्ते ओशो हांचें प्रवचन आयकल्लें. ‘मरण हेंच निमाणें सत’ असो स्टेटस दवरून ह्या दोगांयनी आत्महत्त्या केली. हे विशीं म्हायती मेळटांच पुलीस घडणुके सुवातेर पावले. तांच्यो कुडी ताब्यांत घेवन त्या पोस्टमार्टेमा खातीर धाडल्यो.
खंय घडली ही घडणूक?
दोन इश्टांचे आत्महत्त्येची ही घडणूक उत्तर प्रदेशांतल्या जालौन हांगा घडली. अमन वर्मा आनी बालेंद्र पाल अशीं ह्या दोगांयचीं नांवां आसात. ह्या दोगांयनी जीण सोंपोवचे पयलीं ओशोंचें प्रवचन आयकल्लें. ह्या दोगांयनी विखारी जिन्नस खालो. उपरांत तांकां मरण आयलें. बालेंद्र हाका जाग्यारूच मरण आयलें. जाल्यार अमनची भलायकी इबाडल्या उपरांत ताणे ताच्या घरच्यांक फोन करून विखारी जिन्नस खाल्ल्याची म्हायती दिल्ली. अमनाच्या घरच्यांनी अमन आनी बालेंद्र हांकां रोखडेच हॉस्पिटलांत व्हेले. मात बालेंद्र हाका घरांत मरण आयिल्ल्याचें दोतोरांनी सांगलें. अमनाचेर उपचार सुरु जावचे पयलीं ताकाय मरण आयलें.
पुलीस चवकशी चलता
हे घडणुकेची म्हायती मेळटांच पुलीस घडणुके सुवातेर पावले. तांणी हे विशीं चवकशी सुरू केली. चवकशे मजगतीं समजलें, अमन आनी बालेंद्र हे दोगूय सामके घट्ट इश्ट आशिल्ले. अमन मेडिकल स्टोअर चलयतालो आनी ताचें लग्नूय जाल्लें. मात बालेंद्रचें लग्न जावंक नाशिल्लें. बालेंद्र अमनाक मेळपाक येतालो. हे दोगूय ओशोंची प्रवचनां आयकताले. ओशोंच्या विचारांचो ह्या दोगांयचेर खूब प्रभाव आशिल्लो. ‘मरण हेंच सत’ असो स्टेटस ह्या दोगांयनी दवरिल्लो. तशेंच जळपी चिता, प्रेतयात्रा अशे वट्ट तीन फोटो तांणी स्टेटसाचेर दवरिल्ले. ताका लागून ह्या दोगांयनी ओशोंचें प्रवचन आयकुनच आत्महत्त्या केल्ल्याचो अदमास पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
