भांगरभूंय | प्रतिनिधी
त्रिची, खबरां संस्था: एके ६५ वर्सां पिरायेचे जाण्टे बायलेची भलायकी इबाडिल्ल्यान मरण आयलें. मरणा उपरांत तिची कूड निमाण्या संस्कारां खातीर व्हेली. मसंडभूंयेंत हे बायलेची कूड व्हेली. हे बायलेचे कुडीक उजो लावपाच्या कांय वेळा पयलीं तिचे कुडीची हालचाल जावपाक लागली. हें पळोवन थंय आशिल्ले सगळे जाण भियेले. तेन्ना ती बायल अचकीत उठून उबी रावली. हें पळोवन सगळ्यांक अजाप जालें. ती बायल जिवी आशिल्ल्याचें समजतांच तिच्या कुटुंबियांक खोस भोगली.
तामिळनाडूच्या त्रिचींतली ही घडणूक
मनाप्पराईच्या मारुंगापुरीच्या करुमलाई सुरंगमपट्टी गांवांतली ही खबर. पम्पैयान (७२) आनी चिन्नाम्मल (६५) हें जोडपें वांगडा रावता. तांच्या कुटुंबांतले हेर वांगडीय आशिकुशीक रावतात. १६ नोव्हेंबराक दनपरां जेवतना चिन्नामल हांची भलायकी अचकीत इबाडली. घोव पम्पैयान भियेलो. त्या कुटुंबांतल्या हेर वांगड्यांचे मजतीन चिन्नाम्माक हॉस्पिटलांत व्हेली. रस्त्यार तिची भलायकी आनीक इबाडली. तिच्या शरीराची हालचाल बंद जाली. कुटुंबांतले सगळे भियेले. तांणी हाताची नस तपासली. ती बंद जाल्ली. बायल स्वास घेनाशिल्ली. कुटुंबांतल्या सगळ्यांक तिका मरण आयलें अशें दिसलें. म्हणून ते तिका परत घरा घेवन आयले.
ते बायलेच्या निमण्या संस्काराची तयारी सुरु आशिल्ली. सरणाची लाकडां मांडलीं, केंस कापले. भटाक आपयलो. सगळ्यो विधी पुराय जाल्यो. उपरांत तिची कूड घेवन मसंडभूंयेंत गेले. सोयर्यां वांगडा गांवचे लोकूय मसंडभूंयेंत आयले. सरणाचेर कूड दवरतांच तिचे भितर हालचाल दिसून आयली. तें पळोवन लोक भियेले. तिणें हात- पांय हालयले. सरणावेली उठून बसली. मुखारचें चित्र पळोवन ती बायल लेगीत भियेली. उपरांत लोकांनी तिका सगळें सांगलें. ही घडणूक आतां चर्चेचो विशय जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
