भांगरभूंय | प्रतिनिधी
लोखडांच्या पायपां वरवीं भौशीक रस्त्याचेर अतिक्रमण
भांगरभूंय । प्रतिनिधी
म्हापशें : मरड- म्हापश्यां बेकायदो गजाली चालूच आसात. बेकायदो खाजगी पे पार्कींग आनी शेत जमनीचें सपाटीकरण केले उपरांत आतां सरकारी मालमत्ता आशिल्लो रस्तो खणून थंय पायपां घालून भौशीक रस्त्याचेर अतिक्रमण केलां.
म्हापशेंच्या हळदोणें प्रासार ते मरड सावन बोडगिणी वटेन वचपी रस्तो कॉलमॉस दर्श हे इमारती मुखार खणूक केला. रस्तो खणपाक वा रस्त्याचेर आडखळ करपाक सरकारान बंदी घातल्या. तरी लेगीत वयले इमारती मुखार गटारा पसून सुमार देड मिटर रूंद आनी 20 मिटर मेरेन लांबायेचो हो रस्तो लोखंडाचीं पायपां घालून आडयला. रस्तो खणून हीं पायपां उबीं पुरल्यांत.
हे इमारतीच्या फुडले वटेन आशिल्ल्या रस्त्याचे कुशीक गाडयो पार्क करताले. ताका लागून येरादारी पुलिसांनी थंय बॅरिकेड्स दवरिल्ले. हे बॅरिकेड्स कुशीक काडून हो रस्तो आडायला. हे इमारतीच्या तळमाळ्यार एक खाजगी आस्थापन सुरू जातलें. ह्या आस्थापनाच्या कर्मचाऱ्यांक आनी गिरायकांक येवपाक- वचपाक बऱ्याक पडचें हे खातीर हो रस्तो जबरदस्तीन आडायला. ह्या बेकायदो प्रकाराचेर उपजिल्होधिकारी, नगरपालिका, भौशीक बांदकाम खात्याचो रस्तो विभाग आनी येरादारी पुलिसां कडल्यान तत्काल कारवाय अपेक्षीत आशिल्ली. पूण ह्या सगल्यांनीच हे सरकारी मालमत्ते वयल्या अतिक्रमणा कडेन आडनदर केल्या.
हो प्रकार बेकायदो गजालींक उर्बा दिवपी : अॅड. राणे
हो बेकायदो प्रकार येरादारीक आडखळ थारतलो. तशेंच शारांत बेकायदो प्रकारांक उर्बा दिवपी आनी प्रसासकीय यंत्रणेक आव्हान दिवपी आसा. ते खातीर अश्या प्रकारांक पालिका आनी भौशीक बांदकाम खात्यान आळाबंद घालचो, अशी मागणी समाज कार्यकर्ते अॅड. महेश राणे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
