भांगरभूंय | प्रतिनिधी
दिवचल: मयें सरपंच कनिवी कवठणकार आनी उपसरपंच वर्षा गडेकार हांचे आड सात वांगड्यांनी दाखल केल्लो अविस्वास थाराव आयज मंजूर केलो. हाका लागून हें सरपंच पद फकत सात दिसांचें थारलें.
मयें पंचायतींत फाटल्या सप्तकांत कनिवी कवठणकार हांकां सरपंच पदाची लॉटरी लागिल्ली. सरपंच पदा खातीर वासुदेव गांवकार आनी कनिवी कवठणकार हांणी अर्ज दाखल केल्ले. ह्या वेळार जाल्ल्या मतदानांत दोनूय उमेदवारांक दरेकी पांच पांच मतां मेळ्ळीं. जाल्यार एक मत तांत्रीक कारणाक लागून बाद थारिल्ल्यान लॉट्सचे मजतीन सरपंच पदाची निवड करतना कनिवी हिका येस मेळिल्लें.
हाचे उपरांत दोनूच वरांनी सात पंच वांगड्यांनी कनिवी हांचे आड अविस्वास थारावाची नोटीस आयकयिल्ली. तशेंच त्याच दिसा उपसरपंच गडेकार हांचे आडूय अविश्वास थाराव दाखल केल्लो.
मयें पंचायतींत वट्ट ११ पंचायत वांगडी आशिल्ल्यान सीमा आरोंदेंकार, विद्यानंद कारबोटकार, वासुदेव गांवकार, विशांत पेडणेंकार ,विनिता पोळे, कृष्णा चोडणकार, वर्षा गडेकार, कनिवी कवठणकार, सुवर्णा चोडणकार, दिलीप शेट, सुफला चोपडेंकार हे ११ वांगडी हजर आशिल्ले.
थाराव आठ आड तीन आनी सात आड चार अशे संमत जाल्यात. फुडल्या सप्तकांत सरपंच, उपसरपंच निवड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
