भांगरभूंय | प्रतिनिधी
तो चलोवपा खातीरची निविदा बेगीनूच
पणजी : पर्यटनाक उर्बा मेळपा खातीर मयें रेसीडेन्सीच्या जाग्यार खाजगी कंपनी वरवीं रिसॉर्ट उबारून चलोवपाचो प्रस्ताव आसा. हे विशींची निविदा गोंय पर्यटन उदरगत म्हामंडळा कडल्यान बेगीनूच जारी जातली. मयेंचे आमदार प्रेमेंद शेट हांच्या तारांकीत लेखी प्रस्नाक पर्यटनमंत्री रोहन खंवटे हांणी ही लेखी जाप दिल्या.
मयें तळ्याचें पर्यटन थळ म्हूण विकास करपाचो नवो प्रस्ताव पर्यटन खात्या कडेन येवंक ना, अशें मंत्र्यांनी स्पश्ट केलां. मयें तळ्याचेर खूब खूब वर्सां पयलीं पर्यटक व्हडा संख्येन येताले. बोटींग व्हडा प्रमाणांत चलतालें. आतां पर्यटकांचो आंकडो खूब उणो जाला. पर्यटकांक आकर्शीत करपी कसलीच कार्यावळ हांगा जायना. सरकाराची कितें येवजण आसा? असो प्रस्न आमदार प्रेमेंद शेट हांणी केल्लो. मयें रेसीडेन्सी हॉटेल/ रिसॉर्टांत बदलपाचो प्रस्ताव आसा. रिसॉर्ट उबारप, चलोवप (डेवेलोप, बील्ड, ऑपरेट, ट्रान्स्फर) ह्या तत्वाचेर निविदा जारी करतले. सध्या जीटीडीसी कडल्यान आयतारा मयें टूर आयोजीत जाता.
सप्तकोटेश्वर देवूळ, मयें तळ्याचेर पर्यटकांक उदकाच्या मार्गान व्हरप शक्य आसा, हाचेर सरकार विचार कितें करता? असोय प्रस्न आसलो. सध्या सलीम अली सुकणें अभयारण्याक उदका मार्गान भेट दिवपाची सुविधा आसा. सप्तकोटेश्वर देवळा कडेन उदकाच्या मार्गान पर्यटकांक व्हरपाचेर विचार सुरू आसा, अशें लेखी जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
