भांगरभूंय | प्रतिनिधी
मयें महोत्सव म्हणल्यार विकास आनी विरासत हांचो मिलाफ. लोककला फुडले पिळगे मेरेन कशी पावतली आनी तातुंत प्रगती कशी जातली हाची जतनाय घेतल्या हेंय दिसून आयलें.
मयें गांवचो तिसरो मयें महोत्सव फाट्ल्या शेनवार आनी आयतारा दबाज्यान रायझिंग युथच्या तरनाट्यांनी मनयलो. पयलो मयें महोत्सव देवळाच्या प्रांगणात जालो, दुसरो शिक्षणाच्या आंगणात जाल्यार तिसरो मयें महोत्सव शिकेरी गोशाळेच्या गोकुळांत जालो
ह्या महोत्सवाची तोखणाय करता तितली कमीच. महोत्सवाची बऱ्यान बरी आखणी करून त्या प्रमाण सुंदररित्या घडोवन हाडप ही एक तरेची कलाच म्हणू येता. हाची जतनाय आयोजकांनी घेतली. प्रत्येकान जर आपणाक दिल्ली जबाबदारी शंभर टक्के निभायली तर केदीय व्हडली कार्यावळ सहज पार पाडू शकता, हें खास करून रायझिंग युथाच्या बायलांनी दाखोवन दिलें. तिसरो मयें महोत्सव कला आनी सांस्कृतीक खाते, विजयानंद ज्ञानप्रसारक संस्था आनी महामाया हायस्कुल माजी विद्यार्थी संघटना हांच्या जोड पालवान घडोवन हाडटना रायझिंग युथच्या युवकांनी बरीच मेहनत घेतिल्ली ती दोन दिसाच्या महोत्सवाच्या सादरीकरणान दिसून आयली.
जर बरें काम करता जाल्यार ताका सैम पसून साथ दिता ताचो अणभव मयें महोत्सवाक पळोवपाक मेळळो. सोशल मिडियाचेर फुडले दोन दीस रेड अलर्ट आनी मागीर येलो अलर्ट अशी मॅसेज घुंवताली, तांतल्या तातुंत फोरकास्टींग विडीयो शेअर जातालो. वादळ कशें गोयांत येवन वरांदारीचो पावस कसो पडटलो ताचेविशीं विश्लेशण दाखयताले, दिसताले की असो पावस येत जालार महोत्सव कसो जातलो म्हूण? पूण जशे श्रीकृष्णान गोवर्धन पर्वत आपले करंगळीन वयर उबारून गोकुळांतल्या सवंगडी, वांगडी, गोरवां- वासरांक पावसाचे वरंदारी पासून वांचयलीं तशेंच हे गोशाळेच्या गोकुळांत घडोवन हाडिल्या महोत्सवांत दिसून आयलें. पावस, वारो, वादळ हांचे पसून गोशाळेंतल्या गोकुळांतल्या श्रीकृष्णानूच पावसाची तजवीज कितें करपाची ती केली आनी सेगीत दोन दीस महोत्सवा वेळार पावसान दडी मारून महोत्सवाकुय आपलो सांगात आसा हें दाखोवन दिलें.
मयेंं महोत्सवाच्या निमतान एक बरी गजाल घडली ती म्हणल्यार कमीत कमी हजार ते देड हजार लोकांचे पांय गोशाळे कडेन वळ्ळे. ताचें श्रेय महोत्सव हांगा आयोजित करून रायझिंग युथाचे आनी महोत्सवाचे कार्याध्यक्ष रुपेश ठाणेकार हांका वता.
गोंयांतली सगळ्यांत व्हड आनी नितळ गोशाळा ही शिकेरीत साकारल्या त्या गोशाळेचे सर्वेसर्वा कमलाकांत तारी हांणी जीं पिशेपणां केल्यांत (सुरुवातीक तांकां लोकांनी पिशान काडला आसतालो) ताका वता. सुरुवातीक दोन हेडपी गोरवांक घेवन तांणी सुरु केल्ले गोशाळेंत 5500 परस चड गोरवां वासरां आसात आनी तांची जतनाय घेवपाक शंभरा वयर लोक कामाक आसात, अशी गोशाळेची देखभाल करप आनी ती चलोवप हे येऱ्या गबाळ्याचें काम न्हय हें तारी हांणी सिद्ध केलां. तांकां पळयल्या उपरांत तांच्या सभावांतल्यान आनी तांच्या व्यक्तीमत्वान तुमकां ते इतलें काम करून पसून थकिल्लो दिसना, सदांच हांसत येवकार दिवपाक ते थंय तत्पर आसतात. तांणी शिकेरी मयें गावांची महती गोशाळेच्या निमतान राष्ट्रीय पातळीचेर पावोवपाचें काम केलां.
मयें मतदारसंघ वाठार नार्वेचें सप्तकोटेश्वर मंदिर, मयेंचें तळे, शिरगांवची जात्रा, माल्याची जात्रा, नार्वेची जात्रा, सर्वणचो मोरुलो, कारापूर विठ्ठलापूरचे विठठ्ल रखुमाई मंदिर हाका लागून फामाद आसाच, पुण ताका आता आनीक एक नवीन घटक मेळ्ळा, ती म्हणल्यार शिकेरीची गोशाळा. हांगां वेगळ्याच जाग्यार पाविल्ल्याची अनुभुती आयले बगर रावना. कमलाकांत तारी हांचें 2015 सालांत सुरु केल्ल्या कार्याचो आतां व्हड रुख जाला. फाटल्या धा वर्सान गोशाळेची जावपाक जाय ताचे परस कितलीशीच चड जाल्या, अशे म्हणल्यार अतिताय थारची ना. तांणी आपलें तन, मन आनी धन ओंपलां. शिकेरी गोकुळ अवतरलां कशें दिसता. तांणी केल्ल्या परिश्रमाचें फळ मयें रायझिंग युथान तांकां पयलो वयलो ‘मयेंं रत्न’ पुरस्कार दिवन दिले. खरे म्हणल्यार तो तारी आनी थंय वावुरपी वांगड्यांचो भोवमान. हें खरे मयेंकारांचें जैत म्हणू येता.
मयें रायझिंग युथान आनीक एक बरें काम केलें, तें म्हणजे मतदार संघांतल्या ज्या लोकांनी वेगवेगळ्या कलांनी नामना जोडल्या तांचो सन्मान केलो. नाट्य कलाकार विजय मांद्रेकार, रांगोळी कलाकार सुनील पिळगांवकार, भजनी कलाकार सावळो चोडणकार, घुमट वाद्य कलाकार रवींद्र धुरी, कीर्तनकार शिवलीला पाटील, गांवठी वखदां दिवपी वैद्य शुभदा गांवकार, लोक कलाकार सीताराम सावंत, शेतकान्न कमलावती चोडणकार हांचो सत्कार करून ह्या कलाकारांक आनी तांच्या कार्याक मयेंकार विसरुंक नात, हें दाखोवन दिलें.
तांतले तातुंत मयेंं वाठारांतल्या वेगवेगळ्या लोककलांचें सादरीकरण हे माचयेर घडोवन लोककलेचे विवीध रंग शिंवरले आनी हाची तेंगशी म्हणल्यार विजयानंद संस्था आनी महामाया हायस्कुलाच्या भुरग्यांनी कला सादर करून उपस्थितांचीं मनां जिखलीं. महोत्सव म्हणल्यार बॉलीवुड वा वेस्टर्न डान्स ना जाल्यार आॅर्केस्ट्रा आसता, पुण मयें महोत्सवाचे मुख्य आकर्शण म्हणल्यार शिवलीलाताई पाटील हांचें किर्तन दवरून एक वेगळोच पायंडो घालून दिलो. हे खातीर रायझिंग युथाची तोखणाय.
हालींच्या दिसांनी लोकांक सोशल मिडियाक लागून गजाली मारपाच्यो वा एकठांय येवन कितेंतरी विधायक गजाल करपाक वेळूच ना, पुण ह्या महोत्सवा निमतान मयेंंकारांनी एकठांय येवन विचारांचें दिवप- घेवप केलें. एकठांय येवपाक कितेंतरी कारण जाय पडटा, तें मयेंच्या रायझिंग युथान सोदुन काडलां. महोत्सवांतल्यान लोक एकठांय येतात जाल्यार ती बरी गजाल. ताचे स्रय रायझिंग युथाचे मुखेली रूपेश ठाणेकार आनी तांच्या सगल्या वांगड्यांक दिवचेंच पडटलें. मयें महोत्सव म्हणल्यार विकास आनी विरासत हांचो मिलाफ. लोककला फुडले पिळगे मेरेन कशी पावतली आनी तातुंत प्रगती कशी जातली हाची जतनाय घेतल्या हेंय दिसून आयलें. सात- आठ वर्सांच्या भुरग्या पसून ते 65 वर्सां मेरेनच्या कलाकारांनी कला सादर करून पारंपरीक दायज फुडले पिळगे कडेन उक्तें केलें.
सौ. रिधिमा ठाणेकार हांच्या मार्गदर्शना खाला बायलांच्या सांगातान सुरवेक आरती ओवाळून मुखेल सोयऱ्यांक हॉलांत प्रवेश दिलो. महोत्सावाची सुरुवातुच मयेंचें दायज मालें पेटोवन जाली. येवकार तर लयबद्ध नांदी गावन चोडणांकारांनी दिलो आनी मान्यवराक येवकार तुळशी रोपां दिवन दिलो. तातुंत कुटुन कुटुन भरिल्ले पारंपरिकतेचो दाखलो आशिल्लो. महोत्सवाक भेट दिल्या रसिकांक कसाय च्या दिवन तृप्त केले.
गोयचे मानादिक मुख्यमंत्री डॉ. प्रमोद सावंत, खासदार सदानंद शेट तानावडे, आमदार प्रेमेंद्र शेट, दयानंद कारबोटकार हांणी मयें महोत्सवाक हाजिरी लावन शुभेत्सा दिल्यो. ह्मा महोत्सवात उणीव अशी कितेंच दिसुन आयली ना. वेगळे तरेचो आस्वाद, अणभव मयेंकारांनी सगळ्यांक दिलो. ह्या तिसऱ्या मयें महोत्सवाची याद उरची म्हूण उपस्थितांनी गोरवां, वासरां फुड्यांत रावून सेल्फी काडून घेतले… आनी चवथ्या मयेंं महोत्सवा वेळार मेळचें म्हण जड पावलांनी घरची वाट धरली.
– प्रवीण सावंत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
