भांगरभूंय | प्रतिनिधी
आमदार प्रेमेंद्र शेटः मयेंचे उदरगतीक सगळे वटेन गती दिवपाक येस
भांगरभूंय । प्रतिनिधी
दिवचलः मयें मतदारसंघांतल्या म्हावळींगे वाठारांत सुमार 12 लाख 24 हजार चौखण मिटर जमनीर क्रिकेट स्टेडियम बांदचे खातीर आमचे सगळे तरेचे यत्न चल्ल्यात. आयची स्थिती पळयत जाल्यार स्टेडियमा खातीर सरकार दरबारांत सकारात्मक प्रतिसाद मेळ्ळा. वट्ट म्हालाची उदरगत जावची हे नदरेन म्हावळींग्या भव्य क्रिकेट स्टेडियम बांदपाच्या यत्नांक गती दिल्या, अशें मयेंचे आमदार प्रेमेंद्र शेट हांणी सांगलें.
म्हावळिंग्या क्रिकेट स्टेडियमा खातीर पोशक वातावरण आसा. कसलीच कागाळ ना. गरजेच्यो साधन सुविधा लेगीत आसात. ताका लागून थंय क्रिकेट स्टेडियम बांदपाचे प्रक्रियेक गती मेळटली, असो विस्वास शेट हांणी उक्तायलो.
मयें मतदारसंघांतलीं विवीध खेळां मैदानां दुरुस्त करप, गरजेच्यो सुविधा निर्माण करप, खेळगड्यां खातीर विवीध येवजण्यो चालीक लावचे खातीर आमचे यत्न आसात. मतदारसंघांतल्या साबार गांवांनी मसुंडेची समस्या सोडोवचे खातीर जमीन ताब्यांत घेवपाची प्रक्रिया पुराय जाता. ताका लागून पुराय मतदारसंघांतलो मसुंडेंचो प्रस्न पुराय सुटावो जातलो, अशें शेट हांणी सांगले.
संवसारार फामाद आशिल्ल्या मयेंच्या तळ्यांतल्या उदकाची गळटी आडावचे खातीर बांद बांदपाची प्रक्रिया हातांत घेतल्या. थंय सुमार 3 कोटी रुपया खर्च करून वॉकींग पार्क आनी हेर सुविदा निर्माण करतले. तशेंच फुडारांत पीपीपी तत्वाचेर तळ्या खातीर विशेश येवजण चाली लावपाचो विचार आसा. पर्यटकांक व्हड प्रमाणांत आकर्शीत करचे खातीर सरकारान यत्न चलयल्यात, अशी म्हायती शेट हांणी दिली.
कारापूरचें कोळम तळ्याचें 5 कोटी रुपया खर्च करून सोबितीकरण करतले. पर्यावरणपूरक फ्लोटींग गार्डन तशेंच वॉकींग ट्रॅक हे सारकिल्ल्यो सुविधा उपलब्ध करून पर्यटकांक आकर्शीत करतले. हरीत आनी धवल क्रांती खातीर स्वयंपूर्ण येवजणे खाला तरणाट्यांक शेती वटेन आकर्शीत करप, फावोश्या प्रमाणांत उदक उपलब्ध करचे खातीर खूबश्या बांदांची दुरुस्ती, तशेंच आधुनीक तंत्रज्ञानाचो वापर करून शेतीक चालना दिवचे खातीर यत्न चल्ल्यात. खूबश्यो येवजण्यो चालीक लागल्यात, अशें आमदार शेट हांणी सांगलें. भुंयारी वीज केबल, सगळे कडेन फावोश्या प्रमाणांत उदकाची पुरवण, सगळया रस्त्यांचेर हॉटमिक्स डांबरीकरण, पंचायत इमारती, सुसज्ज सभाघरां तशेंच दरेका गांवांतल्या प्रभागांत उदरगतीच्यो येवजण्यो पावयतात. पिळगांव- आमोणें रस्तो गोन गांवां जोडपा वांगडाच उत्तर आनी दक्षीण गोंया खातीर बरी सुविधा निर्माण करपाचो आमचो यत्न आसा. एके कडेन ल्हान सांकव बांदीन उण्या खर्चांत हें सपन साकर करप शक्य आसा, अशें शेट हांणी सांगलें.
मयेंच्या उरिल्ल्या लोकांक रोखड्योच सनदी
मयें स्थलांतरीत मालमत्ता प्रकरणांत सरकारान खूबश्या जाणांक सनदी दिल्यात. उरिल्ल्यांक रोखड्योच सनदी वितरीत करतले. तशेंच जमनीचे जे प्रस्न आसात ते सोडोवचे खातीर पांच कागदपत्रांचो जो कटकटीचो कायदो आसा, तातूंत बदल करून एकाच कागदाचेर हो प्रस्न सुटावो करचे खातीर मुख्यमंत्र्यांनी समन्वयाची भुमिका घेतल्या. रोखडीच हे प्रक्रियेक गती मेळटली, अशें आमदार प्रेमेंद्र शेट हांणी सांगलें.
फुडल्या वर्सां भितर रो रो फेरी सेवा
रो रो फेरीचें सपन प्रत्यक्षांत हाडटले. दोन फेरी खातीर निविदा काडून प्रक्रिया सुरू केल्या. फेरी धक्याचे सुवातेर रॅम दुरुस्त केल्यात. चोडणां दोन नव्यो फेरीबोटी घातल्यात. ताका लागून फेरीसेवा सुरळीत चल्ल्या. रो रो फेरी सेवा फुडल्या वर्सां भितर सुरू केले उपरांत सगळे प्रस्न सुटावे जातले, अशें प्रेमेंद्र शेट हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
