भांगरभूंय | प्रतिनिधी
जिल्हो पंचायत वेंचणुकेंत दोनूय सुवातो लडयतले
भांगरभूंय । प्रतिनिधी
दिवचल : मयें मतदारसंघांत काँग्रेस पक्षान नवे उमेदीन उड्डाण घेवचें हे खातीर संघटणा घटमूट करपाचेर भर दिला. येता ती जिल्हो पंचायत वेंचणूक कारापूर आनी मयें ह्या मतदारसंघांत नव्या दमाचे उमेदवार उबे करतले. तांची नांवां लेगीत पक्षान निश्चीत केल्यांत. योग्य वेळार ती जाहीर करतले. तशेंच मतदारसंघांत 47 बूथ अध्यक्षांची निवड केल्या, अशी म्हायती काँग्रेसीचे युवा फुडारी आनी समाज कार्यतर्ते अॅड. अजय प्रभुगांवकार तशेंच काँग्रेस गट अध्यक्ष राजेश गांवकार, ज्येश्ठ काँग्रेस कार्यकर्ते दिलीप गांवस हांणी पत्रकार परिशदेंत दिली.
मयें मतदारसंघात आयज लेगीत खूबश्यो समस्या आसात. शेतकारांचे प्रस्न, खण कामगारांचे प्रस्न तशेंच मुळाव्यो सुविधा हे संबंदांतले खूबश्या मुद्द्यां कडेन आडनगर जाल्या. ते संबंदांत काँग्रेस सक्रीय तरेन वावर करून लोकांक न्याय दिवचे खातीर प्रामाणीक यत्न करतली, अशें अॅड. प्रभुगांवकार हांणी सांगलें.
एकादो मतदारसंघ बायलां खातीर राखीव जालो तरी लेगीत सक्षम महिला उमेदवार दिवपाची तयारी लेगीत पक्षान केल्या, अशीय म्हायती ह्या वेळार दिली.
पक्ष संघटणा अदीक घटमूट करून जिल्हो पंचायत वेंचणुकेंत दोनूय उमेदवारांक वेंचून हाडपाचो आमी निश्चेव केला. मतदार वळेरी संबंदांत मोहीम म्हयनोभर चलतली. ते खातीर लेगीत काँग्रेस पक्षा वतीन बीएलओ नेमल्यात. मतदार वळेरीचेर आमची बारीक नदर आसतली, अशें अॅड. प्रभुगांवकार हांणी सांगलें.
फाटले खेपे काँग्रेसीक कुशीक दवरून गोवा फॉरवर्डाक उमेदवारी दिल्ली. ताका लागून ह्या मतदारसंघांनी आळस आयिल्लो. आतां नव्या नेटान काँग्रेस पक्षाक उर्बा दिवचे कातीर आमचो संघटणात्मक कार्यावळीचेर भर आसा. आमी जिल्हो पंचायत वेंचणूक तशेंच विधानसभा वेंचणुके खातीर आतां सावनूच तयारी करतात, अशें अजय प्रभुगांवकार, दिलीप गांवस आनी अध्यक्ष राजेश गांवकार हांणी सांगलें.
ह्या वेळार नयें मतदारसंघ गट समिती अध्यक्ष राजेश गांवकार, सरचिटणीस विनोद धुरी, ज्येश्ठ काँग्रेस कार्यकर्ते दिलीप गांवस, महिला गट अध्यक्ष नंदिता कवठणकार, युवा अध्यक्ष गौरीश घाडी, ज्येश्ठ कार्यकर्ते नंदा सावळ, राजेंद्र मोरजकार, नागेश कवठणकार, जिल्हो वांगडी राष्ट्रीय काँग्रेस मंजुषा कवळेंकार हाजीर आशिल्ली. गोवा फॉरवर्ड, आरजी आनी हेर पक्ष एकठांय येवपाची चर्चा चल्ल्या. ते संबंदांत विचारलें तेन्ना ते संबंदांत कसलोच निर्णय जावंक ना, पक्ष घटमूट कपाचेर भर दिला, अशें अजय प्रभुगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
