भांगरभूंय | प्रतिनिधी
प्रेमेंद्र शेट: देवूस भटवाडी- मयां राखणे वण्टीचें काम सुरू
दिवचल: मयें मतदारसंघांतलें नामनेचें पर्यटन थळ आशिल्ल्या मयें तळ्याच्या रस्त्याची डागडुजी आनी आरसीसी सशक्तीकरण तशेंच ह्या तळ्याचे कुशीक एक वॉकींग ट्रेक आनी विद्युत रोशणाय अशे तरेच्या सोबितीकरण कामाचो शुभारंभ एका म्हयन्या उपरांत करतले. ह्या कामाचेर उदका स्रोत खात्या वतीन पावणेतीन कोटी रुपया खर्च करपाचे आसून ह्या वाठाराक एक वेगळीच सुंदरताय मेळटली अशी म्हायती मयेंचे आमदार प्रेमेंद्र शेट हांणी मयां दिली.
देवूसभटवाडी मयां शेती बागायती खातीर उबारिल्ल्या राखणे वण्टीच्या कामाच्या शुभारंभा वेळार आमदार शेट उलयताले. ह्या वेळार सरपंच विद्यानंद कारबोटकार, उपसरपंच सुफला चोपडेंकार, पंच वांगडी वासुदेव गांवकार, कृष्णा चोडणकार, सुवर्णा चोडणकार, सीमा आरोंदेकार, मयें भापज मंडळ अध्यक्ष दयानंद कारबोटकार, उदका स्रोत खात्याचे कार्यकारी अभियंतो के.पी. नायक, सहाय्यक अभियंतो नरेश पोकळे, कनिश्ठ अभियंतो विनोद भंडारी, शेतकार यशवंत कारभाटकार आनी हेर मानेस्त हाजीर आशिल्ले.
मयें तळ्याच्या वाठाराचें सोबितीकरण तशेंच थळावे लोक आनी हांगा येवपी पर्यटकांक बऱ्यो सुविधा मेळच्यो, हे नदरेन विवीध कामां हातांत घेतले. ह्या राखणे वण्टीच्या कामाक लागून ह्या वाठारांतल्या शेतकारांक राखण मेळटली. तशेंच ह्या बागायतींतल्यान व्हांवपी उदकाचो अखंडीत प्रवाह शेतकारांक ह्या कामा उपरांत मेळटलो अशेंय आमदार शेट हांणी सांगलें.
ह्या वाठारांतले शेतकार आनी थळाव्यांची मागणी लक्षांत घेवन ह्या कामाची प्रक्रिया हातांत घेतल्या. आनी विक्रमी काळांत ही पुराय प्रक्रिया जावन कामाचो शुभारंभ जातलो. हाचो लाव शेतकारांक जातलो अशें सरपंच विद्यानंद कारबोटकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
