भांगरभूंय | प्रतिनिधी
दिवचल : मयेंच्या नामनेच्या माया केळबाय पंचायतनाच्या कळस उत्सवाक मंगळारच्यान सुरवात जाली. फुडले ९ दीस देवीचो कळस गांवांत घराघरांनी वचून कौल दितलो. मयां गांवांत ह्या उत्सवा निमतान उमेदीचें वातावरण पातळ्ळां. उत्सव अंदूं कसलेच आडखळीं बगर पुराय जावचो, अशी आस्त लोकांनी उक्तायल्या.
शासकीय पांवड्याचेर जाल्ल्या जायत्या बसकां उपरांत मयेंच्या कळसोत्सवाचेर आशिल्लें अनिश्चीततायेचें सांवट कुशीक सरलें. उपरांत गावकरवाडो – मयेंच्या देवळांतल्यान कळस भक्तीभावान भायर काडलो. तो उपरांत केळबायवाडो मयेंच्या केळबायच्या देवळांत परंपरे प्रमाण व्हेलो. हांगच्यान कळसाचो फुडलो प्रवास सुरू जाला. हो उत्सव वट्ट णव दीस चलतलो. फुडल्या बुधवारा तो सोंपतलो.
दर वर्सा कळस उत्सवांत निर्माण जावपी वादाक लागून तो अंदूं जातलो काय ना असो दुबाव आशिल्लो. मात अधिकार्यांचे हाजेरींत देवस्थान समिती आनी विरोधी गटाच्यो स्वतंत्र बसकांनी जाल्ल्या चर्चेंतल्यान मुखार आयिल्ल्या मुद्यांची नोंद घेवन हो उत्सव मनोवपा खातीर एकमत जालें. परंपरे प्रमाण हो उत्सव मनोवचो हाचेर सगळे ठाम आशिल्ले.
काल सांजेवेळार देवळाच्या वाठारांत व्हड पुलीस बंदोबस्त दवरिल्लो. उपजिल्लोधिकारी भीमनाथ खोर्जुवेंकार, मामलेदार प्रवीण गांवस, पुलीस उपअधीक्षक जिवबा दळवी, निरीक्षक दिनेश गडेकार हांचे सयत पुलीस व्हड संख्येन हजर आशिल्ले. कळस उत्सव बरे भशेन जाले उपरांत मुखार माल्याची आनी रेड्यांची जात्रा मनयतले अशी आस्त ह्या वेळार ग्रामस्थांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
