भांगरभूंय | प्रतिनिधी
पणजी: कला आनी संस्कृती खातें, श्रीविजयानंद ज्ञानप्रसारक संस्था, मयें आनी श्रीमहामाया हायस्कूल आदली विद्यार्थी संघटणा, मयें हांच्या जोड पालवान रायझींग यूथ, मयेंन ‘तिसरो मयें महोत्सव’ आयोजीत केला. तो शेनवारा २४ आनी आयतारा २५ मे असो दोन दीस सांजेच्या ४.३० वरांचेर जातलो. गोमंतक गौसेवक महासंघ सिकेरी गौशाळा, सिकेरी- पैरा हांगा ताचें आयोजन केलां.
शेनवारा चोडणेंच्या सम्राट क्लबाचे नांदीन महोत्सवाची सुरवात जातली. उपरांत उक्तावण सुवाळो जातलो. ह्या वेळार मुखेल सोयरे म्हणून खासदार सदानंद शेट तानावडे, मानाचे सोयरे म्हूण मयेंचे आमदार प्रेमेंद्र शेट, हेर मानेस्त म्हूण उत्तर गोंय जिल्लो पंचायत अध्यक्ष शंकर चोडणकार, सर्वण- कारापूरचे जिल्लो पंचायत वांगडी महेश सावंत, येवकार अध्यक्ष दयानंद कारबोटकार, चोडणेंचे सरपंच सिल्वानो परेरा, नार्वेंचे सरपंच सिद्धेश पार्सेकार, मयें-वायंगिणीची उपसरपंच वर्षा गडेकार, थळावे पंच कृष्णा चोडणकार हजर रावतले.
ह्या वेळार कमलाकांत तारी हांकां मयेरत्न पुरस्कार भेटोवन सत्कार करतले. नाट्य कलाकार विजय नारायण मांद्रेंकार, रांगोळी कलाकार सुनील रामचंद्र पिळगांवकार, भजनी कलाकार सावळो चोडणकार, घुमट वाद्य कलाकार रवींद्र पांडुरंग धुरी हांचोय भोवमान करतले.
उपरांत लोककलेचें सादरीकरण जातलें. मोरुलो हो लोकनाच सर्वणचो श्रीशामपुरुष कला पंगड, चपय नाच श्रीविजयानंद हायस्कूल, तिखाजन-मयें, तालगडी नाच श्रीमहामाया हायस्कूल, अर्धवाडो- मयें, गोफ नाच आयडीयल हायस्कूल, पिळगांव, मुसळ नाच श्रीविजयानंद हायस्कूल, तिखाजन, धालो घाडवंस महिला मंडळ, केळबायवाडो- मयें, कुणबी नाच श्रीविजयानंद हायस्कूल, तिखाजन, फुगडी गुरुकृपा महिला मंडळ, सिकेरी- मयें, विरभद्र, श्री शामपुरुष कलापंगड, सर्वण हे सगळे पंगड ह्या वेळार कला सादर करतले.
महोत्सवाच्या दुसर्या दिसा लोककला प्रकारांचें सादरीकरण जातलें. ह्या वेळार पणती नाच श्रीविजयानंद हायस्कूल, तिखाजन, कुणबी नाच श्रीमहामाया हायस्कूल, तालगडी नाच श्रीदेवकीकृष्णा भुमिका मल्लीनाथ हनुमान देवस्थान, माडेल-चोडण, घुमट आरती श्रीलयराई महिला घुमट आरत मंडळ, शिरगांव, दिंडी श्रीमहामाया महिला दिंडी मंडळ, मयां सादर करतले.
समारोप सुवाळ्याक मुखेल सोयरे म्हणून मुख्यमंत्री प्रमोद सावंत, मानाचे सोयरे म्हणून भाजपा गोंय प्रदेश अध्यक्ष दामू नायक, आदले आमदार धर्मा चोडणकार, उर्जा वेलनेस सेंटराची संचालक डॉ. स्नेहा भागवत, पिळगांवची सरपंच शर्मिला वालावलकार, सर्वण-कारापुरची उपसरपंच दिव्या नायक, वन-म्हावळींगे, कुडचिरेंची सरपंच दिया गांवकार, शिरगांवची सरपंच वेदिका शिरगांवकार हीं हजर रावतलीं. मुखेल सोयर्यां हस्तुकीं किर्तनकार शिवलीलाताई पाटील, कलाकार शुभदा गांवकार, लोक कलाकार सीताराम सावंत आनी कमलावती चोडणकार हांचो भोवमान जातलो. महोत्सवाचें खाशेलें आकर्शण म्हणल्यार ह्या वेळार शिवलीलाताई पाटील हांचें किर्तन जातलें. तांकां तबल्यार शैलेश शिरोडकार आनी पेटयेर महेश गांवस साथ दितले. ह्या महोत्सवाक सगळ्यांनी व्हडा संख्येन हजर रावचें असो उलो रायझींग यूथच्या वांगड्यांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
