भांगरभूंय | प्रतिनिधी
दिवचल: फक्त 12 वर्सां पिराय आशिल्ल्या स्वरा शिरोडकार हे गोंयकार चलयेन ‘हे सुरांनो चंद्र व्हा’ सारकी कठीण पदां मेकळ्या सुरांत गावन रसिकांचेर मोनेळ घाली. मयें चिमुलवाड्यार श्रीगोयंगणकर देवस्थानांत वर्सुकी श्रावण मासा निमतान 29 वेर दुसऱ्या मंगळारा निमतान देवस्थान सभाघरांत भाविकांचे आनी रसिकांचे मनरिजवणे खातीर संगीत रजनीचें आयोजन केल्लें त्या वेळार स्वरान आपली कला सादर केली.
येजमान विष्णू दिनानाथ शिरोडकार आनी कुटुंबा वतीन स्वरा क्रियेशन प्रस्तूल ‘स्वर भाव’ ही खास सुगम संगिताची कार्यावळ आयोजीत केल्ली. हातूंत गायिका स्वरा शिरोडकार हाणें ‘हे सुरांनो चंद्र व्हा’, ‘सुर निरागस हो’, ‘माझे माहेर पंढरी’, ‘अवघे गरजे पंढरपूर’ आदीं गितां सादर करून रसिकांची मनां जिखलीं. ‘नको वाजवू काना मुरली रे’ ही गौळण आनी, ‘कवैल्याच्या चांदण्याला’ ह्या भैरवीन ताणें कार्यावळीचो शेवट केलो.
ताका संवादिनीचेर शैलेश शिरोडकार, तबल्यार दिगंबर वेळगेंकार, पखवाजार प्रथमेश सावंत आनी टाळ विजय शिरोडकार हांणी साथ संगत केली. ह्या कार्यावळीचें निवेदन संजय गांवकार हांणी केलें.
श्रावण मासा निमतान आयोजीत केल्ले हे कार्यावळीक भावीक, रसीक व्हड संख्येन हाजीर आशिल्ले.
ही कार्यावळ येसस्वी करपा खातीर श्रीगोयंगणकर देवस्थान, श्रीगोयंगणकर कला खेळां आनी सांस्कृतीक मंडळाचे अध्यक्ष विशांत पेडणेंकार, सचीव विष्णू शिरोडकार, भांडारी अमीत दाभोळकर आनी येजमान आयोजक शिरोडकार कुटुंबान खर कश्ट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
