भांगरभूंय | प्रतिनिधी
पयलीं मयेंचो प्रस्न सोडयात, मागीरूच प्रकल्प उबारात: मयें भू विमोचन नागरीक कृती समिती
दिवचले: मयेंचे मालमत्तेचो मालकी प्रस्न पुरायेन सोडोवपा खातीर बेगोबेग फाटपुरवण करची. मयेंच्या लोकांचो खंयच्याच प्रकल्पाक विरोध ना. मात जी सुवात निवडल्या तातूंत देवस्थान आनी हेर सुवातो आशिल्ल्यान सुवात योग्य ना. पयलीं मयेंचो पुराय प्रस्न निकालांत काडात, उरिल्ले सरकारी जमनींत प्रदूशण मुक्त प्रकल्प हाडात. मयें प्रस्नाचेर भाजप सरकारान सेगीत सगकार्य दिलां. हाचें आमकां भान आसा. हाका लागून कांय लोकांकूच विस्वासांत घेवन प्रकल्प हातांत घेवचो, अशी भुमिका मयें भू विमोचन नागरीक कृती समितीच्या पदाधिकार्यांनी पत्रकार परिशदेंत उक्तायली.
समितीचे अध्यक्ष सखाराम पेडणेंकार, राजेश कळंगूटकार, हरिचंद्र च्यारी, यशवंत कारबोटकार, नारायण मालवणकार हांणी मुख्यमंत्री डॉ. प्रमोद सावंत हांणी जे वक्तव्य केलें तें खटकल्ल्याचें स्पश्ट केलें. जे सुवातेर कायदो महाविद्यालय प्रकल्प उबारपाचो विचार आसा थंय जायते उपक्रम, देवूळ आनी हेर गजालींचो आसपाव आशिल्ल्यान तें योग्य ना. हाका लागून हे बाबतींत पुरायेन म्हायती घेवप गरजेचें. तशेंच थळाव्यां आमदारांनी हे विशीं योग्य म्हायती दिवप अपेक्षीत आसा, अशी म्हायती संमती वतीन दिली.
मयें मुक्तीचो लढो फाटल्या साठ वर्सां सावन सुरू आसा. भाजप सरकारान हाका खूब सहकार्य दितना, जायत्यो गजाली पुराय करपाची फाटपुरवण केल्या. मात आजूनय जायत प्रस्न आसात ते पुरायेन सोडयात. आमचीं घरां, जमनी, शेतां हांच्यो सगळ्यो सनदी मेळोवन दियात. उपरांतूच सगळ्यो उरिल्ल्यो सुवातोय सरकारा कडेन येतलो. त्या सुवातांचें योग्य नियोजन करून जाय तशे बरे प्रकल्प उबारात. आमी ताका येवकार दितले, अशें सखाराम पेडणेंकार, राजेश कळंगुटकार, यशवंत कारबोटकार हांणी स्पश्ट केलें.
प्रकल्पा खातीर जशी ताकतीक केल्या तशीच मयें प्रस्ना खातीरूय दाखयात. जे तरेन सरकार पांवड्यार प्रकल्प उबारपा खातीर नेटान कार्यवाही जाता तेच गतीन मयें प्रस्न निकालांत काडपा खातीर सरकारान युद्धपांवड्यार गती दिवप अपेक्षीत आसा. मात आमची प्रक्रिया सामकी संथ आसा, अशेंय ह्या वेळार सांगलें.
मयें प्रस्नाचेर कायद्याची अमल बजावणी जावंक ना. जायते प्रस्न तशेंच आसात. ते सगळे सोडयात. आमी सरकारा फाटल्यान खंबीरपणान रावतले. मात लोकांक गृहीत धरून, तांकां भायर मारून अशे प्रकल्प तांचेर लादचे न्हय अशेंय राजेश कळंगुटकार हांणी स्पश्ट केलें. थळाव्या आमदारांनी सरकाराक वस्तुस्थितीची कल्पना दिवन नियोजीत सुवातेवेलीं आडमेळीं स्पश्ट करच्यो, अशेंय ह्या वेळार सांगलें.
सरकारान जर लोकसहभागाचो आदर करूंक ना जाल्यार सरकाराकूय लोकसहभाग मेळचो ना, हाचें भान दवरून योग्य भुमिका घेवची अशें ह्या वेळार सांगलें. कांय राजकी फुडारी आमची मजा पळयत राजकारण करतात. तांणी तें बंद करचें. मयें गांवांत चुकीचें राजकारण करून दिकाभूल करची न्हय अशें सखाराम पेडणेंकार हांणी स्पश्ट केलें.
ह्या वेळार यशवंत कारबोटकार हांणी मयें प्रस्नाचेर ज्यो त्रुटी आसात त्यो पयलीं पयस करात आनी मागीरूच प्रकल्प उबारात अशी भुमिका मांडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
