भांगरभूंय | प्रतिनिधी
दिवचलः उत्तर गोंय जिल्हो पंचायत फंडांतल्यान तीन कामांची सुरवात मयें मतदारसंघाचे आमदार प्रेमेंद्र शेट हांचे हस्तुकी जाली.
कुमारवाड्या वयले सरकारी मुळावे शाळेचें सोबितीकरण, गाळवान वाठारांत क्रिकेट पिचीच्या कामाची सुरवात तशेंच देवूस- भटवाडीच्या प्रवेशदाराचें बांदकाम (माडयांनी) ह्या येवजण्यांचो आस्पाव आसा.
ह्या वेळार जिल्हो पंचायत वांगडी शंकर चोडणकार, सरपंच सुवर्णा चोडणकार, पंच विद्यानंद कारबोटकार, रवीन्द्र किनळकार, मंडळ अध्यक्ष दयानंद कारबोटकार, मयें भाजपा सचीव विश्वास चोडणकार, आदले सरपंच, पंच आनी कार्यकर्ते हाजीर आशिल्ले.
मयें मतदारसंघ उदरगतीचो रोल मॉडल करपाचो आमचो हांवेस आसा. सरकाराच्या विवीध निधींतल्यान तशेंच जिल्हो पंचायत निधींतल्यानूय लोकांक अपेक्षीत आशिल्लीं कामां करतात. मुळाव्यो गरजेच्यो सुविधा, मानवी उदरगत तशेंय स्वयंरोजगार हाचे सयत आत्मनिर्भर स्वयंपूर्ण मतदारसंघाचें आमचें सपन आसा. तें पुराय करचे खातीर सगळ्यांनी आदार करचो, असो उलो आमदार शेट हांणी मारलो. जिल्हो पंचायत निधींतल्यान दरेका पंचायत विभागांत लोकांक आनी आमदाराक विस्वासांत घेवन येवजण्यांक चालना दितात. फुडारांतूय खूबशे प्रकल्प मंजूर जावपाचे आसात, अशें शंकर चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
