भांगरभूंय | प्रतिनिधी
पयलीं मयें गांवांक पुरायेन स्वातंत्र्य दिवपाची मागणी
दिवचल: सरकारान मयेंच्या सरकारी जमिनींत व्हड कायदो महाविद्यालय प्रकल्प उभारपाचो प्रस्ताव पंचायतीक सादर केला. आयतारा जाल्ले विशेश ग्रामसभेंत ह्या प्रस्तावाक सगल्यांनी विरोध केलो. तशेंच मयें गांव आजूनय पारतंत्र्यांत आशिल्ल्यान जायत्यो सनदी, शेतीचे प्रस्न आनी हेर जमनीचे प्रस्न सुटूंक ना. जो मेरेन मयेंचे लोक पुरायेन स्वतंत्र जायनात आनी ताकां सगळे हक्क मेळनात तो मेरेन कसलेच तरेचो प्रकल्प मयां गांवांत उबारपाचें कारस्थान कोणेंच करचें न्हय. अशे तरेचो म्हत्वाचो थाराव मयेंचे ग्रामसभेंत सगल्यांचे हजेरींत मान्य जालो. ह्या वेळार व्हडा संख्येन हजर आशिल्ल्या ग्रामस्थांनी नियोजीत प्रकल्पाक विरोध केलो. तेन्ना मयेंच्या भूंयपुतांचो प्रस्न सोडून तांकां पुराय हक्क दिवपाचो निर्धार करून ग्रामसभेंत आपली भुमिका खरपणान मांडली.
ह्या वेळार पंचायत सभाघरांत आयोजीत केल्ले बसकेक कृष्णा चोडणकार, उपसरपंच, विवीध पंचायत वांगडी सचीव महादेव नायक आनी व्हडा संख्येन ग्रामस्थ हजर आशिल्ले.
ह्या महाविद्यालयाचो जो नियोजीत प्रकल्प आसा, ताचे विशीं म्हायती दितना सरपंच कृष्णा चोडणकार हांणी सांगलें, मयेंचे सरकारी जमनींत प्रकल्प उबारपाचो विचार आशिल्ल्याचें पत्र धाडिल्लें. हे विशीं सरपंचांक आनी ग्रामसभेंत म्हायती दिली आनी हो प्रस्ताव आशिल्ल्याचें सांगून ग्रामस्थांनी हे विशीं निर्णय घेवचो अशी भुमिका उक्तायली. आमी गांवां वांगडा आशिल्ल्याचेंय तांणी स्पश्ट केलें.
ह्या वेळार सखाराम पेडणेंकार, संतोष कुमार सावंत, राजेश कळंगूटकार, कृष्णा परब, सुभाष किनळकार, कालिदास कवळेकार, बबन नायक, तुळशीदास चोडणकार, सखाराम पेडणेंकार आनी जायत्या जाणांनी ह्या प्रस्तावा विशीं आक्षेप घेतना गांवाक पुरायेन स्वतंत्र्य दिवपाचो हट्ट धरलो. ह्या वेळार जायत्या ग्रामस्थांनी आपल्यो सुचोवण्यो मांडटना, तशें सनदी दिवपाची प्रक्रिया सुरू आसतना येवपी आडमेळीं आनी निर्माण जाल्ल्यो आडखळी हे विशीं भुमिका मांडली. जो मेरेन मयेंकारांक स्वातंत्र्य मेळना तो मेरेन प्रकल्पांचो विचारूय कोणेंच करचो न्हय, असो निर्धार आनी थारावूय बसकेंत घेतलो.
संतोष कुमार सावंत हांणी सांगलें, मालमत्तेचो प्रस्न आजूनय प्रलंबीत आसा. सध्या जमीन सरकाराच्या ताब्यांत आसली तरी तांकां जाय तसो ताचो वापर करपाक मेळचो ना. गांवाचे भूंयपूत आजूनय पारतंत्र्यांत आशिल्ल्याचे भुमिकेंत वावुरतात. ताका सरकाराच्यो येवजण्यो मेळटना जायतीं आडमेळीं येतात. अशें आसतना मयेंच्या लोकांच्या माथ्यार नवो प्रकल्प मारून सरकार कितें साध्य करपाक सोदता. हे सुवातेर प्रकल्पाच्या नांवांन तांकां फटोवचे ना? हें कित्यावेल्यान सांगूं येता?
राजेश कळमकार हांणी सांगलें, उदरगतीक आमचो विरोध ना. मात नवे प्रकल्प हाडून मयेंकारांक आनीक त्रासांत सरकारान घालचे न्हय. मयेंचो प्रस्न शंभर टक्के जो मेरेन सुटना तो मेरेन हांगा हेर कसलोच प्रकल् उबारपाचो विचार सरकारान करचो न्हय. पुराय गांवचो एकवट आशिल्ल्यान ह्या प्रकल्पाक सगल्यांचो विरोध आशिल्ल्याचें तांणी स्पश्ट केलें.
ह्या वेळार हेरांनीय हे विशीं विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
