भांगरभूंय | प्रतिनिधी
रमेश तवडकारः ‘श्रमधाम’ खाला 500 कार्यकर्ते करतले श्रमदान
भांगरभूंय । प्रतिनिधी
दिवचलः सैमीक आपत्ती आनी हेर कारणांक लागून गरीब लोकांचीं घरां उध्वस्त जाल्यांत. तांकां ती बांदून दिवचे खातीर मतदारसंघांत सुमार 500 कार्यकर्ते श्रमदान करतले. श्रमधाम येवजणे खाला मयें मतदारसंघांत गरजेवंतांक पांवड्या पांवड्यान घरां बांदून दिवपाचो निश्चेव सभापती रमेश तवडकार हांणी मयां केलो.
आमदार प्रेमेंद्र शेट हांचे विनवणे वयल्यान सभापती तवडकार हांणी मयां शेट हांच्या घरा हे संबंदांत विशेश बसका घेतली. ह्या वेळार भाजप कार्यकर्ते हाजीर आशिल्ले.
बसकेंत मतदारसंघांतल्या कांय घरां बांदपाचो निश्चेव केलो. तशेंच दरेकल्यान आदार करून श्रमदानान कांय काळा भितर घरां बांदून दिवपाचो निश्चेव ह्या वेळार आमदार शेट आनी सभापती तवडकार हांणी केलो.
जांकां खऱ्यांनीच शक्य ना, अश्या गरीब लोकांक वेंचून तांच्या घराची परिस्थिती पळोवन आमी श्रमदान खाला विवीध वाठारांनी घरां बांदपाचो निश्चेव केला. हे आदींय अशी खूबशीं घरां बांदून दिल्यात. मयें मतदारसंघाची भोंवडी करून मुळाव्या पांवड्याचेर शिरगांव, मयें, नार्वें ह्या वाठारांत लुकसाण जाल्लीं घरां परतून पांवड्या पांवड्यान बांदून दितले, अशें तवडकार हांणी सांगलें.
रमेश तवडकार हांचो हो उपक्रम खऱ्यांनीच सेवाभावी आसा. खूबश्या जाणांचे मजतीन एकाद्याक घर बांदून दिवप हो एके तरेन दैवी निश्चेव आसा. मयें मतदारसंघांत गरजेवंतांक घरां बांदून दितना सुमार 500 कार्यकर्ते श्रमदान करतले. पयल्या पांवड्यार शिरगांवां एके बायलेचे घर कोसळिल्लें. तें परतून बांदून दिवपाचो निश्चेव केला. डिसेंबरा उपरांत कामात हात घालतले, अशेंय आमदार शेट हांणी स्पश्ट केलें.
सभापती तवडकार हांणी मयें, शिरगांव, नार्वे ह्या वाठारांत भेट दिवन पळोवणी केली. तशेंच तांणी श्रीदेवी लयराईचें दर्शन घेवन नवरात्र उत्सवा निमतान प्रार्थना केली. ह्या वेळार प्रेमानंद म्हांब्रे, आरती बांदोडकार, दयानंद कारबोटकार, विवीध सरपंच, पंच हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
