भांगरभूंय | प्रतिनिधी
भांगरभूंय । प्रतिनिधी
दिवचलः कारापूर हांगा आयोजीत केल्ले एके खाशेल्या कार्यावळींत मयें मतदारसंघातल्या वेगवेगळ्या पक्षांतल्या सुमार देडशें वावुरप्यांनी भारतीय जनता पक्षांत प्रवेश केलो. प्रदेशाध्यक्ष आनी राज्यसभा खासदार सदानंद शेट तानावडे, मयांचो आमदार प्रेमेंद्र शेट, आदलो खासदार विनय तेंडुलकार, दयानंद कारबोटकार हाणी तांकां उर्बेभरीत येवकार दिलो.
पंतप्रधान नरेंद्र मोदी हांच्या सक्षम फुडारपणा खाला फाटल्या धा वर्सांत भारतांत उदरगतीची गंगा व्हांवपाक लागल्या. मानवी उदरगती वांगडाच देशाक संवसारीक पंवड्यार अग्रणी सुवात मेळोवन दिवपाक मोदीजींचें व्हड योगदान आसा. हे फावट लोकसभा वेंचणुकेंत चारशें परस चड सुवातो मेळोवन मोदीजी देशाची धुरा सांबाळपाक सज्ज आसात. गोंयांतल्यो लोकसभेच्यो दोनून सुवातो भाजपा जिखतलो. ताका लागून भाजपांत प्रवेश करपा खातीर हेर पक्षांतल्या वावुरप्यांची गर्दी जाता अशें सदानंद तानावडे हांणी सांगलें.
विनय तेंडुलकार हाणे सांगलेंकी भाजपा व्हो संवसारांतलो व्हडलो पक्ष आसून देशाचो कायापालट जालो तो पळयल्यार फुडाराक विरोधक बाकी उरतले कांय ना अशे तरेचें वातावरण देश भरयां आसा. गोंयांत लेगीत ताची लाट आसा असो दावो ताणी केलो. भाजपाच्या कामान प्रभावीत जावंन लोक ताचे कडेन आकर्शीत जातात अशें प्रेमेंद्र शेट हांणी सांगलें. भाजपांत प्रवेश केल्ल्या सरपंच, उपसरपंच आनी पंच वांगड्यांक गुलाब भेटोवन पक्षांत येवकार दिलो. कार्यावळीचें सूत्रसंचालन विश्वास तोडणकारान केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
