भांगरभूंय | प्रतिनिधी
म्हापशें, प्रतिनिधी ः बार्देश – मयडे पुलार श्री रवळनाथ देवळाचे दार फोडून भितर घुसून चोरांनी फंडपेटी फारायली. चोरांक ती फंडपेटी फोडपाक मेळ्ळी ना. देवळा सावन कांय अंतराचेर आशिल्ल्या न्हंयेच्या पुला लागसार ही फंडपेटी सांपडली.
ही चोरयेची घडणुक आयज बिरेस्तारा सकाळीं 7 वरांचे सुमाराक उजवाडाक आयिल्ली. सदचे भशेन एक शाळेचो भुरगो देवळांत फुलां अर्पण करपाक गेल्लो. ह्या वेळार देवळाचें दार उक्तें आशिल्ल्याचें ताका दिसलें. रोखडेंच ताणें घरा वचून आपल्या पालकांक हे घडणुकेची म्हायती दिली. त्या भुरग्याचे आवय-बापूय आनी थळावे लोक रोखडेच देवळांत आयले तेन्ना तांकां भितरली फंडपेटी गायब जाल्ल्याचें दिसलें. चोरांनी देवळाच्या दाराक आशिल्लें कुलूप मोडून उडयल्लें. तें कुलूप आनी तें मोडपाक वापरिल्ली लोखणाची सळी थंयच उडयल्ली. उपरांत लोकांनी भोंवतणच्या वाठारांत चोरी केल्ले फंडपेटीचो सोद घेतलो तेन्ना तांकां ती देवळा पसून सुमार 100 मीटर अंतराचेर आशिल्ल्या न्हंयेच्या पुला लागसार ती मेळ्ळी.
चोरांक फंडपेटीवेले कुलूप तोडपाक मेळ्ळें ना. ते खातीर तांकां तांतूतले पयशे चोरपाक मेळ्ळे ना. ही घडणूक कळ्ळे बरोबर रॉबर्टाच्या जीपींतले पुलीस घडणुकेच्या सुवातेर पावले. म्हापशें पुलीस उपनिरिक्षक पंढरी चोपडेकार, सहाय्यक उपनिरिक्षक अजय गांवकार आनी तांच्या वांगड्यांनी पंचनामो केलो.
मजगतीं, आयज सकाळीं 3 वरांचे सुमाराक थळावो मनीस कामावेल्यान घरा वतालो. त्या वेळार देवळाचें दार सारकें बंद आशिल्ले तें तांणे पळयल्ले. देखून सकाळीं 3 वरां उपरांत ही घडणुक घडली आसूं येता. तशेंच सकाळ जाल्ल्यान आनी फंडपेटीचे कुलूप घट आशिल्ल्यान तें तोडपाक जमूंक ना आसूं येता असोय अदमास देवूळ समितीन उक्तायला. ही फंडपेटी पंदरा दिसां आदीं देवूळ समितीन रिती केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
