भांगरभूंय | प्रतिनिधी
भांगरभूंय । प्रतिनिधी
म्हापशेंः मयडें पंचायत ग्रामसभेत थिवी ते साळगांव वीज उपकेंद्रा मेरेन घालपाच्या प्रस्तावीत 220 केव्ही डबल सर्कीट ट्रान्समिशन वीज वाहिन्यांच्या मुद्द्यार वीज खात्या वांगडा पळोवणी करपाचो थाराव पास केलो. शेतकारांक ह्या वाहिनीचो त्रास जावपाक शकता, शिवाय गांवांत उदका साठवण सुविधी उपलब्द करून दिवपाचो थाराव लेगीत पास केलो.
सरपंच सागर नायक हाचे येजमानके खाला ग्रामसभेचें कामकाज जालें. ग्रामस्थ व्हडा संख्येन सभेक हाजीर आशिल्ले. ह्या वेळार पोरणी झाडां मारप, पावसाचें उदक साठोवन दवोरप, गांवांतल्यान जावपी अवजड ट्रकांची येरादारी आनी हेर विशयांचेर चर्चा जाली. फाटले ग्रामसभेंत डबल सर्कीट वीज वाहिनीक विरोध करपी थाराव पास केल्लो. तिचो सुमार 67 शेतकारांक फटको बसपाची शक्यताय आशिल्ली. त्या थारावाची कॉपी पंचायतीन वीज खात्याक धाडल्ली.
वीज वाहिनी खातीर जो मार्ग थारायला तो तंत्रिक नदरेन जाता तितलो बरो आनी साबार लोकांचे मालमत्तेचें उण्यात उणे लुकसाऩ करपी आसा. तशे तरेचो आराखडो तयार केला म्हणपाचें पत्र वीज खात्यान पंचायतीक धाडलां अशें सरपंच नायकान सांगलें. ह्या वेळार ग्रामस्थांनी वीज खात्या वांगडा लायनीची पळोवणी करपाची मागणी करपी थाराव मानून घेतलो. पंचायत वाठरांत उदक साठोवन दवोरपाचो मुद्दो व्हिजिलिया डिसा आनी डॉ जी गोम्स हाणी उपस्थीत केलो. गांवांत उदकाची सारकी पुरवण जायना. गिमाच्या दिसांनी परिस्थिती सामकी वायट जाता. ते खातीर उदकाचें संवर्धन करपाची गरज आसा आनी ते खातीर पंचायत मंडळान फुडाकार घेवपाक जाय अशें तांणी सांगलें. गांवांतल्यान जावपी अवजड ट्रकांची येरादारी थांबोवपा खातीर पावला घालपाची मागणी करपी थाराव मांडलो. रस्त्या वयल्यान वचपी वाहना आमी आडावपाक शकनात मात फुडाराक गजर पडल्यार तशी वेवस्था करपाक जाता अशें सरपंचान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
