मन एक हारसो…

भांगरभूंय | प्रतिनिधी

मनाच्या रथांत जायते घोडे आसतात, ते आपले इत्से प्रमाण रथ ओडटात. पूण रथाची लगाम म्हळ्यार प्रज्ञा हें तितलेंच लक्षांत घेवचें पडटलें. बुध्दीक जें मान्य आसा तें मनाक मान्य ना, आनी जें मनाक मान्य तें बुध्दीक मान्य ना.

मनांतल्या विचारांक बऱ्या-वायटाच्या भिंगांतल्यान पळयल्यार कांय विचार बरे आसतात, ताका लागून सकारात्मक प्रगती
जाता, सूख निर्माण जाता आनी जिवीत समृध्द जाता. कांय विचार नकारात्मक, निराश करपी आसतात. आमी जागे जाले उपरांत दर दिसा आमी नित्यनेमाचीं, संवयींचीं कामां करतात. ती करतना विचार करतात, पूण सगलें विसरतात. पूण भावनीक विचार चड प्रबळ आसल्यार त्या मनशाक त्या विचारांचो त्रास जाता. ते विचार परत परत तकली वयर काडून मनशाच्या जिविताक हालोवन दवरतात.
तुमी तुमचे विचार तपासचे. ल्हवू ल्हवू नकारात्मक विचारांचो आंकडो उणो केल्यार तुमचें जिवीत फक्त सुखी जावचें ना, पूण हेरांचेंय जिवीत सकारात्मक विचारांनी सुखी जातलें. तुमचें मन हें रेकॉर्डींग मशीन. संवय आशिल्ले विचार तांकां परत परत आवाजां भशेन निर्माण करतात. देखून जेन्ना आमी दुसऱ्याच्या बऱ्याचो विचार करतात तेन्ना आमी प्रत्यक्षांत आमचें बरें करतात. जायते फावटीं आमकां तें लक्षांत लेगीत येना…
मनांत नकारात्मक विचारांची सांखळी काम करता तेन्ना भंय निर्माण जाता, निरशेवणी वाडटा, उमेद उणी जाता. आत्मविस्वास उणो जाता. दुसऱ्यां विशीं बरे विचार सांगचे, तांकां परबीं दिवपाचे विचार, सगल्यांक बरें जावचें. सुखी जावचें, सगले खोशी जावचे विचार मानक नेवी उमेद दिता आनी उमेद वाडयता. तुमी तुमच्या मनांत जें पेरतात तें वाडटलें तेंच सत्य आनी वास्तव अशें पुरायपणान दिसून येता.
मनाच्या रथांत जायते घोडे आसतात, ते आपले इत्से प्रमाण रथ ओडटात. पूण रथाची लगाम म्हळ्यार प्रज्ञा हें तितलेंच लक्षांत घेवचें पडटलें. बुध्दीक जें मान्य आसा तें मनाक मान्य ना, आनी जें मनाक मान्य तें बुध्दीक मान्य ना. मन आनी बुध्दी एकाच वेळार विचारांत एकमत जातात तेन्नाच खंयचेंय काम येसस्वी जाता हाचेर भर दिवंक जाय. मन बरें आसल्यार बुध्दीय बरी जातली. मन उर्बेन ताजें जालें जाल्यार बुध्दीय ताजी जाता. तेन्नाच ती चड बळिश्ट जाता.
सध्या जायते जाण गरजे परस चड विचार करतात. मनांत सेगीत गोंदळ जाता. बऱ्याच जाणांक एकाच वेळार जायतीं कामां करपाची संवय आसता. हाचे भायर तकलेंत विचारूय आसात. पूण सगल्यांक मेळना, देखून आमचो सैम चिडचिडो जाता. मेंदू थकता. देखून आपली तांक मतींत दवरून एका वेळार एक गजाल करपाचो यत्न करप योग्य थारता.
जिणेंत सूख निर्माण करपा खातीर भोंवतणच्या मनाचेर नियंत्रण दवरचें, एकामेकां कडेन आशिल्ली वृत्ती बरी आसत जाल्यार जिणेंतलें खंयचेंय कठीण काम योग्य रितीन करूं येता. विटांनी विटो घालून व्हड हवेली बांदतात, एक व्हड तळें थेंब्या थेंब्यान भरतात. विचार, गिन्यान आनी अणभव हांचो योग्य आदान-प्रदान जाल्यार सगलें शक्य जाता.
मनशाचें मन म्हळ्यार सत्तेचो भंडार. ही शक्त आमी योग्य रितीन वापरल्यार आमी जिणेंत व्हड येस मेळोवंक शकतात. परिपूर्ण मानसीक भलायकी आशिल्ल्या मनशाक ल्हान ल्हान तपशिलांनीय खोस मेळटा. तोंड सदांच ताजें आनी सुखी उरता. मानसीक शक्तीच्या भरपूर प्रमाणाक लागून मनीस सदांच उर्बेभरीत उरूंक शकता. बऱ्या विचारांचो आनी गिन्यांनाचो भंडार तकलेंत भरिल्लो आसता, देखून नकारात्मक विचारांक, दुस्वासाक, रागाक, सूड घेवपाक सुवात ना.
आमी दुसऱ्यां विशीं वा स्वता विशीं वायट विचार करीत रावल्यार ताचो अप्रत्यक्ष परिणाम आमच्या मनाचेर आनी कुडीचेर जाता. नकारात्मक उर्जा कुडींत तयार जाता आनी मानसीक ताण वाडटा. ही परिस्थिती आमी सदांच आमच्या मनांत बरे विचार हाडल्यार घडना, जितले व्हडल्यान वण्टीचेर मारतात तितले आपणाकूच लागता. कारण कृती म्हणल्यार प्रतिक्रिया. मोबायलांत इंटरनॅट चालू दवरपा प्रमाण बॅटरीचो वापर चड आसता. तेच प्रमाण जेन्ना आमच्या मनांत गरजे भायर विचार धांवतात तेन्ना आमची उर्जा फुकट वता.
दिसभरान आमी दोन प्रकारचे विचार करतात, एक सकारात्मक आनी दुसरो नकारात्मक, जिणेंत कितें तरी बरें जावपाक जाय जाल्यार पयलीं आमचे विचार बदलपाक जाय. आनी हे विचार खंयच्यान उत्पन्न जातात हाचे वयल्यान आमी मनाचेर नियंत्रण दवरपाची गरज आसा. खंय उलोवपाचें आनी खंयसर ओगी रावपाचें तें कळचे खातीर मन सदांच शांत दवरचें. मन निवळ आनी दवरल्यार भायलो संवसार खूब खूब सोबीत दिसता. आमचें मन एक हारसो. विचार मनांत घालतना प्रतिकृती भायर दिसता. मनानं जशे विचार दवरता तशेच भायर दिसता.

गौरी भालचंद्र
9422373926