भांगरभूंय | प्रतिनिधी
मनोहर आंतरराष्ट्रीय विमानतळ, मोपा ह्या गोंय मुक्ती उपरांतच्या पयल्या विमानतळा विशीं समेस्तांक उमळशीक
आशिल्ली. विमानतळाच्या उक्तावणाचो खीण जितलो म्हत्वाचो, तितलोच विमानतळावेल्यो सुविधाय म्हत्वाच्यो. विमानतळावेल्यान फकत पर्यटक गोंयांत येनात तर गोंया भायले गोंयकार, गोंयां सावन देस- विदेसांत वचपी गोंयचे लोक, लोकप्रतिनिधी हांकांय तो गरजेचो. एका तेंपार विमानातल्यान वचप, येवप उद्येगपती, उंचेल्या पदार आशिल्ले अधिकारी, मंत्री, आमदार, खासदारां खातीर आशिल्लें. उपरांत उंचेल्या कुशळतायेंतल्यान, बुद्धिमत्तेन देस- विदेसाच्या कोनशाक बरे नोकरेंत पाविल्ले गोंयकार पर्यटकां वांगडा विमानान येवपाक- वचपाक लागले. गोंय मुक्ती आदीं 1955 वर्सा बांदिल्ल्या दाबोळी विमानतळार दीस- रात गर्दी जाता हें आदले संरक्षणमंत्री मनोहर पर्रीकार हांकां संरक्षण मंत्रालयांत अभ्यास करतना होलमल्लें आसतलें. थंयच तांचो मोपा विमानतळाचे बुन्यादीचो निश्चेव जालो. आयज 13 डिसेंबर हो तांचो वाडदीस, मोपा विमानतळाच्या पयल्या पांवड्याचें सपन तांच्या वाडदिसा आदीं पुराय जावप ही गोंयकारांक वेगळी भेट.
मोपा विमानतळ जावचो अशें आदले मुख्यमंत्री भाऊसाहेब बांदोडकार, तांची धूव शशिकलाताई काकोडकार हांकांय दिसतालें. गोंयचे चड तेंपाचे मुख्यमंत्री प्रतापसिंह राणे, भाजपाचे गोंयचे दुसरे मुख्यमंत्री लक्ष्मीकांत पार्सेकार आनी उत्तर गोंयच्या पयलींच्या, आतांच्या आमदार, खासदार, मंत्र्यांक दिसतलेंच. श्री. राणे हांचे बराबरीन पयलींचे सभापती दयानंद नार्वेकार, आदले केंद्रीयमंत्री रमाकांत खलप हाणीं ते पासत येत्नय केल्ले. मोपा विमानतळ जाल्ल्याची खोशी तांकां आसतलीच, विमानळातल्यान जेन्ना उदरगतीचीं फळां समेस्तां मेरेन पावतलीं तेन्ना तांकां खऱ्यांनी आनंद जातलो.
मोपा विमानतळाची बांदावळ करचे आदीं ते विशीं पेडणे तालुक्यांतच न्हय तर उत्तर, दक्षीण गोंयांत जाल्ले उदरगतीचो पर्रीकार हाणीं विचार केला आसतलो. ते विशीं आमदार, खासदार, पयलींच्या मुखेलमंत्र्यां कडेन तांची भासाभासय जाल्ली आसतलीच. मुखेल करून मोपा विमानतळाचे बुन्यादीची येवजण, मांडावळ करून घेवपी आमदार दिगंबर कामत हांचे कडेन ते उलयल्या आसतले. दक्षीण गोंयचे कांय खासदार, आमदार, मंत्री मोपा विमानतळाचे विरोधक. तो विरोध मोडून उडयत श्री. कामत हाणीं मुख्यमंत्री आसतना विमानतळाचे मांडावळीचो वावर करून घेतलो तो पर्रीकार हांच्या तेंक्यानच हें तेय मान्य करतले.
सपन पळोवपी खूब आसतात, पूण तें पूर्ण करपा पासत फुडें सरपी, होमखणात उडी घेवपी पर्रीकार हांचे वरी एकादरेच आसतले. तेच खातीर तांचे नांव विमानतळाक दिलें म्हणून कोणाची हरकत नासतली, पूण मनोहरबाबांचे आदर्श ताई, भाऊ आसले हें विसरूंक फावना. संरक्षण मंत्रालय म्हळ्ळ्यार होमखणच. त्या होमखणांत वतना, खातें सांबाळटना गोंयच्या आदल्या संरक्षणमंत्र्यांची घुस्मट जाल्या आसतलीच, पूण राष्ट्रसेवेचे बराबरीन गोंयचेंय ताणीं चिंतलां आसतलें. मोपा विमानतळाची बुन्याद घालपा खातीर श्री. पार्सेकार हांचे कडेन ताणीं दिल्ली वतना मुख्यमंत्रीपदाचीं सुत्रां सोपयल्लीं आसत व्हय?
मोपा विमानतळ कित्याक गरजेचो, हाचो नियाळ करतना संवसारांतल्या राष्ट्रांतल्या किजिलां विशीं समेस्तांक राजकारण्यांनी सांगचें पडटलें. आमच्या भारतांतय किजिलां आसाच, पूण फाटल्या अणभवांतल्यान राजकारणीच न्हय समेस्तय शाणे जातात, तेच खातीर बदलांक विरोध आदलेवरी जायना, मनोहरबाब तेच परंपरेतले.
बुद्दीमत्तेक गोंयां भायर वचपाक ताणीं गुंथिल्ल्यो उंचेलें शिक्षण शिष्यवृत्तीं, सायबरएज कंप्युटर येवजणच न्हय जाल्यार समाजाचें हित मतींत दवरून लाडली लक्ष्मी, गृह आधार, दयानंद समाजिक सुरक्षा आदीं येवजणी उरल्यात, उरतल्यो. कांय येवजण्यांनी बदल करतना समाजांत जाल्ल्या, फुडारांत येवपी बदलांचो, संकश्टांचो अभ्यास जावचोच.
मोपा विमानतळावेल्यांन विमान येरादारी सुरू जातकच, मोपाचे लागसल्ले भूंयेंत विमानां, हेलिकाॅप्टरां दवरपाचीं वेवस्था, सुविधांचे बांदावळीतल्यान सरकाराक येणावळ कितली मेळटली? कुशळतायेचें केंद्र जातना थंय कोण शिकयतलो? कोणांक शिकूंक मेळटलें? हाचे विशीं आदल्या मुख्यमंत्र्यांनी अदमास घेतला आसतलो.
विमानतळ ‘मनोहर’ आसा तशी पेडणेंची उदरगतय मनोहारी म्हळ्ळ्यारच पेडणें तालुक्याच्या सैम सांगातांत वचपी आसची. विमानतळ सगल्यांक पळोवपाक मेळचो ना, विमानान येरादारी करतल्यां खातीरच तो आसा. राखणे यंत्रणेक लागून समेस्तांक पयसल्यान दर्शन घडप तशें कठीणच.
मुरगाव तालुक्यांत दाबोळी विमानतळाच्या लागसल्ल्या वाठारांत जाल्ल्या अती बांदकामां विशीं संरक्षण मंत्रालयाक हुस्को आसा. मोपा विमानतळाच्या भोंवतणच्या वाठारांत बांदकामांचे, वेवसायाचें नियोजन करतना हे फुडें जतनाय घेवचीच पडटली. पर्रीकार हांकां संरक्षणमंत्री जातकीच दाबोळेचो व्हडा प्रमाणात विस्तार करूंक येवचो ना, हाची जाणवीकाय जाल्या आसतली. तेच जाणवीकायेंतल्यान ताणीं मोपाची ताकतिकेन बांदावळी पासत पावलां उखललीं. मोपा विमानतळाचेरय संरक्षण मंत्रालयाची नदर आसता हें बांदावळ करपी कंपनीक खबर आसा.
झुजा पावंड्यार मोपा विमानतळाचे फुडले दोन टप्पे पूर्ण करचेच पडटले. थंयच तो लोकां खातीर खरो मनोहर थारतलो. समाजाक बरी भलायकी, शिक्षण, साधनसुविधा, उदक, उर्जा मेळपाची मोख दवरून पर्रीकार हाणीं केल्लो वावर मोलादिक. फुडारांतय सरकारान गोंय ‘भांगरभूंय’ करपाचीं सपनां समाजांत केळोवन तांची याद करची.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
