भांगरभूंय | प्रतिनिधी
पणजी : मनोहर पर्रीकार हे आधुनीक गोंयचे प्रणेते आशिल्ले. तांच्या कार्यकाळांत राज्यांत खुबश्या उदरगतीच्या कामांची बुन्याद घाली. गोंयचे मुख्यमंत्री तशेंच देशाचे संरक्षण मंत्री म्हणून तांचें काम सदांच लक्षांत दवरतले, अशें मत मुख्यमंत्री डॉ. प्रमोद सावंत हांणी केलें. मंगळारा तांणी पर्रीकार हांच्या पुण्यतिथी निमतान तांच्या मिरामारच्या समाधीचे दर्शन घेवन आर्गां ओपलीं. ह्या वेळार राज्यपाल पुसापती अशोक गजपती राजू, मुख्य सचीव व्ही कांदावेलु, पर्रीकर हांचे पूत उत्पल पर्रीकार आनी हेर वरीश्ठ अधिकारी हाजीर आशिल्ले.
पर्रिकरांनी तांच्या कार्यकाळांत गोंयांत नवे प्रकल्प सुरू केल्ले. अभिनव गजाली करपाक ते मुखार आसताले. तांणी सुरू केल्ले प्रकल्प पुराय करपाचें भाग्य म्हाका मेळ्ळें. ही म्हजे खातीर अभिमानाची गजाल. आजूय देशभरचे लोक जेन्ना मिरामार दर्यादेगेर येतात ते ह्या समाधी थळाकूय भेट दितात. तांणी सदांच जनता, राज्य देशाचो विचार केलो. तांचे पुण्यतिथी निमतान गोंय सरकार, गोंयची जनता, भाजपा वतीन आमी तांकां आदरांजली अर्पण करतात. तांच्या योगदानाचो उगडास लोकांच्या मनांत कायम उरला, अशें मुख्यमंत्र्यानी सांगलें.
राज्यपालान म्हणलें, मनोहर पर्रीकार आनी हांवें कांय काळ केंद्रीय मंत्रिमंडळांत एकठांय काम केल्लें.म्हजे कडेन तांच्यो जायत्यो बर्यो यादी आसात.तेन्ना देशांत चलयांखातीर सैनीक स्कूल नाशिल्लें. पर्रीकार संरक्षण मंत्री आशिल्ल्यान आमी हे विशीं तांचे कडेन चर्चा केल्ली. अशें सैनीक स्कुल तशेंच वट्ट बायलांक संरक्षण मळार अदीक परवानगी दिवची,अशीमागणी आमी केल्ली. तांणी हे विशीं रोखडोच निर्णय घेतले अशें सांगिल्लें. उपरांत तांकां मरण आयलें. आयज संरक्षण मळार बायलां दादल्यां वांगडा आसात. हातूंत पर्रीकार हांचें व्हड योगदान आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
