भांगरभूंय | प्रतिनिधी
पणजी : मनोहर आंतरराष्ट्रीय विमानतळार (मोपा) सुरक्षा तपासणे मजगतीं एका ब्रिटीश नागरिका कडेन बेकायदेशीर सॅटेलायट फोन जप्त केला. ताचे आड गुन्यांव नोंद केला.
सीआयएसएफच्या एएसजी युनिटांत जवान विजय यादव हांणी दिल्ले कागाळी प्रमाण, सोमारा पेडणेंच्या मोपा विमानतळार ही कारवाय केली. दुबावीत विल्यम जेम्स बुकॅनन स्मेली (६२, रा. लंडन, युनायटेड किंगडम) हो एअर इंडिया एक्सप्रेसच्या आयएक्स २३६८ ह्या मुंबय वचपी विमानान प्रवास करपाचे तयारेंत आशिल्लो.
देशां खाला सुरक्षा तपासणे मजगतीं एटीआरएस-जी स्कॅनिंग यंत्रणेंत दुबाविताच्या हातांतल्या बॅगांत ‘गार्मिन’ कंपनीचो सॅटेलायट फोन मेळ्ळो. भारतांत अशे तरेचे सॅटेलायट फोन परवानगे बगर वापरप कायद्यान बंदी आसा. तपासणे मजगतीं दुबाविता कडेन संबंदीत सक्षम प्राधिकरणाची कसलीच परवानगी वा परवानो मेळूंक ना.
ह्या प्रकरणांत भारतीय वायरलेस टेलिग्राफी कायदो, १९३३ खाला कलम ३ सयत कलम ६(१ए) खाला गुन्यांव नोंद केला. दुबाविताक बीएनएसएसच्या कलम ३५(३) खाला नोटीस दिवन चवकशे खातीर हाजीर रावपाक सांगलां. ह्या प्रकरणाचो फुडलो तपास मोपा विमानतळ पुलीस स्टेशनाचे उपनिरीक्षक सागर वझरकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
