भांगरभूंय | प्रतिनिधी
फोंडेंः डॉ मनोहरराय सरदेसाय हे तेजस्वी प्रतिभेचे कवी आशिल्ले आनी तांणी रचिल्लीं बालगितां सांसणाचीं अज्रंवर जावन उरल्यांत अशें साहित्य अकादेमी जैतिवंत साहित्यीक आनी अनुवादक मुकेश थळी हांणी सांगलें.
ते काल फर्मागुडयेर जीव्हीएम संस्थेच्या गोपाळ गोविंद पै रायतूरकार वाणिज्य म्हाविद्यालयांत घडोवन हाडिल्ले कार्यावळींत उलयताले. मनोहरराय सरदेसाय हांचें साहित्य ह्या विशयाचेर तांचें व्याख्यान जालें.
कालच्या जनमत कौल दिसाचें म्हत्व भुरग्यांक पटोवन दितना मनोहरबाबान ह्या चळवळींत काव्य आनी गीत रचना करून जें मोलाचें योगदान दिलें ताची याद थळी हाणी केली. ह्या काळांत तांणी रामगीता रचली आनी विलीनीकरणवाद्यांक आमी खंयच कमी नात हाची जाप दिली अशें मुकेश थळी हांणी सांगलें.
कोंकणी चळवळींत तशेंच कोंकणी विश्वकोश विभागांत तांच्या मार्गदर्शना खाला काम करतना मनोहरबाबाचे सादेपणाचे, मनीसपणाचे जे म्होंवे अणभव आयले ते थळी हांणी सांगलें.
पिसोळीं आनी जायो जुयो ह्या काव्य झेल्यांतलीं तांची माणकुलीं कवनां अर्थघनतेन भारीत आसात हें तांणी देखी दिवन स्पश्ट केलें. मनोहरबाबाच्या काव्यांत ताल लय हांचो आविश्कार कसो घडटा हें सांगतना थळी हांणी मनोहरबाब हे बहुभाशाकोवीद आशिल्ले अशी माहिती दिली. गोंया तुज्या मोगा खातीर आनी अठरा जून ह्या पुस्तकांतलीं खाशेलीं सोबीत थळां मुकेश थळी हाणी सांगलीं.
जीव्हीएमचे अध्यक्ष कृष्णा शेटये हांणी मनोहरबाबांच्या कवितेंत खास कोंकणी उतरां कशीं आयल्यांत तें कोलू ह्या उतराचो सविस्तर अर्थ सांगून स्पश्ट केलें. प्राचार्य तिवतोन वाझ, डॉ. स्मिता संझगिरी हांचींय उलोवपां जालीं. कविता सर्तींतल्या जैतिवंतांक थळी हांचे हस्तुकीं प्रमाणपत्रां वांटलीं. रजत हेगडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
