भांगरभूंय | प्रतिनिधी
मडगाव: रिव्हॉल्युशनरी गोवन्सचे अध्यक्ष मनोज परब हांणी कॉंग्रेसीचे गोवा प्रभारी माणिकराव ठाकरे हांचेर केल्लें वक्तव्य पुरायेन चुकीचें आसा. ठाकरे हांची पिराय आनी राजकी प्रवास लक्षांत घेतना परब हांचें वक्तव्य अपमानाचें आशिल्ल्यान तांणी तें बेगोबेग फाटीं घेवन ठाकरे हांची माफी मागची, अशी मागणी कॉंग्रेस फुडारी गिरीश चोडणकार हांणी केली.
परब हांणी केल्लें विधान अपमानाचें आसा. ठाकरे हे फकत महाराष्ट्रांतूच न्हय देशांतले एक आदर्श फुडारी. ते महाराष्ट्रांत स फावटीं आमदार म्हणून आयल्यात. तांणी गृहमंत्रीपद बरे तरेन सांबाळ्ळां. तेलंगणाच्या कॉंग्रेसीच्या जैतांतूय तांचें व्हड योगदान आसा, अशें चोडणकार हांणी सांगलें.
परब हांच्या वक्तव्यांत राजकी प्रगल्भताय दिसना, उलट तांची तिडक चड पळोवपाक मेळटा. जिल्लो पंचायत वेंचणुकेंत युती जावचे खातीर ठाकरे हांणी चौकटे भायर वचून आनी कॉंग्रेस कार्यकर्त्यांचो विरोध आसतनाय यत्न केल्ले. अशें आसूनय परब हांणी सकयले पातळेवेलें वक्तव्य केल्ल्यान ताचो आमी निशेध करतात. तांणी बेगबोग हें वक्तव्य फाटीं घेवन ठाकरे हांची माफी मागची, अशें चोडणकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
