मनू भाकर फायनलींत

भांगरभूंय | प्रतिनिधी

पॅरीस ऑलिम्पिकांतल्यान भारता खातीर अखेरेक आनंदाची खबर मुखार आयली. नेमबाजीच्या दोन वेगळ्यावेगळ्या गटांनी उण्या फरकान अपेस आयल्या उपरांत 10 मिटर अॅर पिस्तूल प्रकारांत बायल नेमबाज मनू भाकर हिणें पदकाचे सर्तींतली आपली सुवात घट केली. आयज भारताच्या वेळा प्रमाण दनपारच्या 3.30 वरांचेर फायनल जातली.

नेमबाजी मिश्र गटाच्या 10 मिटर अॅर रायफल प्रकाराचे पात्रताय फेरयेंत भारताचे रमिता आनी अर्जुन बबुता हांकां एका गुणाच्या फरकान पदकाचे सर्तींतल्यान बाद जावचें पडलें. ते उपरांत 10 मिटर अॅर पिस्तूल दादल्यांच्या गटांत सरबजोत सिंगाक लेगीत समान 577 गूण आसून लेगीत उण्या फरकान फुडली फेरी चुकली. आठवे सुवाते खातीर सरबजोत आनी रॉबीन वॉल्टर हांचे मदीं 577 गुणां सयत टाय जाली. पूण, वॉल्टरान (18) सरबजोत परस (17) एक नेम 10 गुणांचेर लायलो. ह्या नेटार ताणें आठव्या क्रमांका सयत पदकाचे सर्तींत सुवात मेळयली. सरबजोताक णववे सुवातेर समाधान मानचें पडलें.

बायलांच्या 10 मिटर अॅर पिस्तूल गटांत मनू भाकर आनि रिदीम सांगवान हांच्या कडल्यान खूब आस्त आशिल्ली. ह्या दोगांयनी पयले सिरिजांत समान 97 गूण केले. पूण, मनू चवथे आनि रिदीम 8वे सुवातेर आशिल्ली. दुसरे सिरिजांत मनून पयल्या तीन यत्नांत परफॅक्ट 10 गूण घेत जबरदस्त पुनरागमन केलें. तिसऱ्या सिरिजा उपरांत मनू चवथ्या क्रमांकाचेर आशिल्ली. पूण, फुडले सिरिजांत तिची सवे सुवातेर घसरण जाली. रिदीम 19वे सुवातेर पाविल्ली.

मनून पांचवे सिरिजांत कमबॅक करतना एक सुवाताचेर उडी घेतली. सवे सिरिजांत पयल्या पांच यत्नांत 9,10, 10,10,9 असो नेम सादून पयल्या तिनांत सुवात मेळयली. दक्षीण कोरियाची 19 वर्सां पिरायेची नेमबाज ओह ये जीन हिणें सगल्यांत चड 582 गूण घेवन दुसरी सुवात घट केली. मनून 580 गुणां सयत तिसरी सुवात निश्चीत केली आनी फायनलींत सुवात मेळयली.

मनू भाकर हिणें 2018चे आयएसएसएफ संवसारीक सर्तींत भारताचें प्रतिनिधित्व केल्लें आनी दोन भांगरा पदकां लेगीत जिखिल्लीं. आयएसएसएफ संवसारीक सर्तींत भांगरा पदक जिखपी ती सगल्यांत युवा भारतीय नेमबाज आसा.