भांगरभूंय | प्रतिनिधी
पॅरीस ऑलिम्पीक खेळां सर्त भारताची 22 वर्सां पिरायेची नेमबाज मनू भाकर हिचे खातीर येसस्वी थारल्या. हे सर्तींत तिणें अजून मेरेन दोन पदकां जिखल्यात आनी आतां तिसऱ्या पदका वटेन तिणें पावलां उबारल्यांत.
तिणें बायलांच्या 25 मिटर पिस्तूल प्रकाराचे निमाणे फेरयेंत सुवात मेळयल्या. 25 मिटर क्वॉलिफायर्सांत तिणें दुसरी सुवात मेळोवन निमाणे फेरये खातीर पात्रताय मेळयली.
तिणें हे क्वॉलिफायर्सांत प्रिसीजन स्टेजींत 294 गुणां सयत तिसरी सुवात मेळयिल्ली. ते उपरांत तिणें रॅपीड स्टेजींत 296 गूण मेळयले. हे स्टेजी उपरांत ती वट्ट 590 गुणां सयत दुसरे सुवातेर आयली.
हेच सर्तींत भारताची इशा सिंग हिणें लेगीत वांटो घेतिल्लो. पूण, क्वॉलिफायर्सांत 18वे सुवातेर उरली. तिणें प्रिसीजन स्टेजींत 291 गुणां सयत 10वी सुवात मेळयिल्ली. ते उपरांत तिका रॅपीड स्टेजींत 290 गूण मेळोवप शक्य जाले. ताका लागून वट्ट 581 गूण फावो जाले.
ह्या प्रकारांत क्वॉलिफायर्सांत प्रिसीजन आनी रॅपीड अशा दोन स्टेजींनी मेळून वट्ट 60 शॉट्स दरेक खेळगड्याक मारपाचे आसतात. ते उपरांत सर्वोत्तम गूण आशिल्ल्या 8 खेळगड्यांक निमाणे फेरयेंत सुवात दितात.
मनू भाकरान पॅरीस ऑलिम्पिकांत 10 मिटर अॅर पिस्तूल प्रकारांत कांश्या पदक जिखिल्लें. ते उपरांत तिणें नेमबाज सरबज्योत सिंग हांच्या वांगडा मेळून मिश्र दोट्टी मिटर अॅर पिस्तूल प्रकारांत कांश्या पदक मेळयलें. स्वातंत्र्य भारतांत एकेच ऑलिम्पिकांत दोन पदकां जिखपी ती पयली खेळगडी थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
