भांगरभूंय | प्रतिनिधी
बंगळुरू, खबरां संस्था ः कर्नाटकांतल्या दावणगेरे जिल्ह्यांतल्या एका मनशान रीण मेळूंक नाशिल्ल्यान बँकेंतल्यान 17 किल भांगर लुटलें. ऑगस्ट 2023 वर्सा ह्या मनशान एसबीआय बँकेत 15 लाख रुपया रिणाचो अर्ज केल्लो, पूण ताचो अर्ज न्हयकारलो. ह्याच रागान ताणें बँकेंतल्यान 13 कोटींचें भांगर लुटलें अशें पुलिसांनी सांगलें. ह्या प्रकरणांत पुलिसांनी मुखेल आरोपी विजयकुमार (30) हाचे सयत ताच्या 5 वांगड्यांक अटक केल्या.
पुलिसांनी सांगलें, स्पॅनिश क्रायम ड्रामा मालिका ‘मनी हेयस्ट’ हातुंतल्यान आरोपी विजयकुमाराक चोरीची कल्पना मेळ्ळी. हाचे उपरांत हें विशीं युट्युब व्हिडियो पळोवन ताणें 6- 9 म्हयन्यांत बँक लुटपाची येवजण आंखली. तशेंच बँक लुटपा खातीर तांणे ताचो भाव अजय कुमार, मेवणो परमानंद आनी हेर तीन वांगडी अभिषेक, चंद्रू आनी मंजुनाथ हांचीय मजत घेतली. सध्या पुलिसांनी ह्या 6 आरोपींक अटक केल्या.
बँक लुटपाची येवजण तयार केली…
पुलिसांनी सांगलें, आरोपी विजय कुमार आपल्या पांच वांगड्या सयत कितलेशेच म्हयने बँक लुटपाची येवजण आंखताले. विजय कुमार आनी चंद्रू हांणी बँकेचेर जायते फावट धाड घाली. पुलीस आनी सामान्य लोकांक हालचालींचो अदमास येवचो न्हय म्हणून रातच्या वेळार निर्जन शेतांतल्यान बँके मेरेन वचपा खातीर तांणी मॉक ड्रिल केल्यो. हाचे उपरांत ही टोळी जनेलातल्यान बँकेंत भितर सरली. सायलेंट हायड्रोलिक आयर्न कटर आनी गॅस कटिंग टूल्स वापरून बँकेचे लॉकर फोडले. कोणेंच फोन वापरलो ना. तशेंच सीसीटीव्हीचो डिजिटल व्हिडियो रेकॉर्डर (डीव्हीआर) काडून घेतलो. देखून पुलिसांक कांयच कळ्ळें ना. विजय कुमारान सुरक्षा आडखळ मोडपा खातीर वापरिल्ल्या ऑक्सिजन सिलिंडरांचे सिरियल नंबर पुसलें. पुलिसांक तपास करपाक कठीण जावचें म्हणून ह्या टोळयेन स्ट्राँग रूम आनी मॅनेजराच्या कॅबिना सयत पुराय बँकेंत मिरसांगेची पावडर पातळायली.
पुलिसांनी कितल्याशाच राज्यांनी आरोपींक सोदलें….
चोरी जाले उपरांत ह्या टोळयेन चोरिल्लें भांगर विकपाक सुरवात केली. हातूंतल्यान मेळपी पयशांनी वेवसाय आनी घर विकतें घेतलें. हांगा पुलीस तपास पंगडान नोव्हेंबर ते फेब्रुवारी ह्या काळांत गुजरात, राजस्थान, दिल्ली आनी उत्तर प्रदेशांत सोद कारवाय केल्यो. तपासांत पुलिसांक तमिळनाडूंत थळाव्या लोकांच्या सहकार्यान काम करपी एक नेटवर्क मेळ्ळें. ह्या मजतीन पुलिसांनी 6 आरोपींक अटक केली. हाचे उपरांत तमिळनाडूच्या मदुराय जिल्ह्यांतल्या उसिलमपट्टी वाठारांत चोरीचें भांगर मेळोवपा खातीर पुलिसांनी व्हड कारवाय सुरू केली. मजगतीं, तज्ञ पोंवपी लोकांच्या मजतीन पुलीस पंगडान 30 फूट खोल बांयेतल्यान एक लॉकर सोदून काडलो, तातूंत सुमार 15 किल भांगर आशिल्लें. आरोपी विजयकुमारान लॉकर बांयत लिपोवपाची येवजण आंखल्या अशें पुलिसांनी सांगलें. सध्या पुलिसांनी सगळें भांगर जप्त केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
