भांगरभूंय | प्रतिनिधी
पणजीः गोंय मनीस संसाधन विकास म्हामंडळाच्या कर्मचाऱ्यांक फुडल्या शिक्षणा खातीर 10 हजार रुपया मेरेन अर्थीक मजत दितले. कार्मीक खात्यान हालीं हे संबंदी अधिसुचोवणी जारी केल्या. ते प्रमाण 2 वर्सां परस चड काळ म्हामंडळांत काम करपी आनी दूरस्थ पद्धतीन शिक्षण (करस्पॉन्डंट कोर्स) घेवपाची इत्सा आशिल्ल्या 45 वर्सां सकयल्या कर्मचाऱ्यांक हे येवजणेचो फायदो घेवंक मेळटलो.
अधिसुचोवणे प्रमाण ही येवजण 2023-24 शिक्षणीक वर्सा सावन चालीक लायल्या. ही येवजण म्हामंडळाच्या प्रशासकीय कर्मचाऱ्यां खातीर आसची ना. अर्थीक वा हेर कारणांक लागून शिक्षण पुराय करूंक नाशिल्ल्या कर्मचाऱ्यां खातीर, ते कर्मचारी सोडल्यार, कर्मचाऱ्यांक तांच्या पुराय सेवेच्या काळांत फकत एक फावट शिक्षणा खातीर अर्थीक मजत दितले. ते प्रमाण कर्मचाऱ्यांक शिक्षणीक खर्च म्हणून 10 हजार रुपया परत दितले.
ही येवजण चालीक लावपा खातीर म्हामंडळाक स्वताचो निधी एकठांय करचो पडटलो वा गरज पडल्यार राज्य सरकारा कडल्यान मजत घेवची पडटली. येवजणेचो फायदो घेवपा खातीर कर्मचाऱ्यान फुडल्या शिक्षणा खातीर म्हामंडळा कडल्यान आदीं परवानगी घेवची पडटली. हें शिक्षण फकत दूरस्थ पद्धतीन आसूंक जाय. कर्मचाऱ्याक ज्या अभ्यासक्रमाक शिकपाक जाय, ताका केंद्र वा राज्य सरकारान मान्यताय दिवची पडटली. हातूंत धावी, बारावी, डिप्लोमा, पदवी वा पदव्युत्तर शिक्षण हांचो आस्पाव जाता.
अभ्यासक्रम पुराय जातकच कर्मचाऱ्याक येवजणेच्या अर्जा वांगडाच मार्कशीट, पूर्णतायेचें प्रमाणपत्र, आनी हेर कागदपत्रां म्हामंडळाक सादर करच्यो पडटल्यो. पयलींच परवानगी घेतिल्ल्या आनी फुडलें शिक्षण घेवपी कर्मचाऱ्यांकय हे येवजणे खातीर अर्ज करपाक मेळटले. येवजणे खातीर अर्ज मेळ्ळ्या उपरांत म्हामंडळ दोन म्हयन्यांच्या काळा भितर अर्जाचेर निर्णय घेतलें. अपूर्ण अर्ज रद्द करतले अशें अधिसुचोवणेंत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
