भांगरभूंय | प्रतिनिधी
संघटीत गुन्यांवकारांक लागून मनीस तस्करीचो संवसारीक धोको अजून सोंपूंक ना. दर वर्सा चडांत चड बळींचो वेपार चड अंतराचेर, चड हिंसाचारान, चड काळ आनी चड लावा खातीर जाता. 2020 ते 2023 मेरेन संवसारीक पांवड्यार 2 लाखां परस चड बळी नोंद जाले, जें फक्त हिमखंडाचें तोंक. नोंद जावंक नाशिल्ल्या बळींचो प्रत्यक्ष आंकडो खूब चड आसतलो अशें मानतात.
संघटीत गुन्यांवकारीचें जाळ हें बळी आनी शोशण चालीक लायतात. स्थलांतर प्रवाह, जागतीक पुरवण सांखळी, कायदेशीर आनी अर्थीक पळवाटो आनी डिजिटल प्लॅटफॉर्म वापरून शिमे भायर मनीस तस्करीक व्हड प्रमाणांत सुलभताय दितात. तांकां जबरदस्तीन कामाक लावप, लैंगीक शोशण आनी जबरदस्तीन गुन्यांवकारी कृत्यां, जशे ऑनलायन घोटाळे आनी ड्रग्स तस्करी हातूंत वापरून फायदो जोडटात.
कांय प्रमाणांत प्रगती जाल्ली आसली तरी फौजदारी न्यायाचे हात ह्या नेटान विकसीत जावपी गुन्यांवाचेर मात करपाक उणे पडटात. मनीस तस्करी सोंपपा खातीर कायद्याची अंमलबजावणी करपाक खर कायदे चालीक लावपाक जाय, शिमे वेली तपासणी खर करची पडटली, शिमे भायर राज्यां, देश हांचे कडलो सहकार घटमूट करचो पडटलो. तेच परीन गुन्यांवकारी अर्थीक पालव नश्ट करचो पडटलो आनी वेपाराचे जाळें वळखुपाक, मोडून उडोवपाक अर्विल्ल्या तंत्रगिन्यानाचो पालव घेवचो पडटलो. तस्करी आनी लैंगिक शोशण धंद्यांतल्यान भायर हाडिल्ल्यांक न्याय सुनिश्चीत करपा खातीर गुन्यांवकारांक जापसालदार धरप आनी बळींक
संरक्षण, आदार आनी न्याय मेळोवपा खातीर बळी- केंद्रीत पद्दत चालीक लावप गरजेचें.
ह्या वर्साचे मोहिमेंत बळी- केंद्रीत पद्दत सुनिश्चीत करतना संघटीत वेपार जाळें मोडून उडोवपाक कायद्याची अंमलबजावणी आनी गुन्यांवकारी न्याय वेवस्थेची म्हत्वाची भुमिका उजवाडाक हाडल्या. एकवटीत राष्ट्रां संघटणा खासा करून कायद्याची अंमलबजावणी करपी यंत्रणांक प्रोत्साहन दितात. तातूंत पुलीस खातें, शिमेची सुरक्षा, संवसारीक यंत्रणा आनी खाशेले कार्यदळ, ऑनलायन प्लॅटफॉर्मांचो वापर करून आनी येरादारी केंद्रां सारक्या चड येरादारी आशिल्ल्या वाठारांनी व्यक्तीगतपणान संपर्क सादून सक्रिय भुमिका घेवपाक प्रोत्साहन दितात. अशे तरेन आमी व्यापक भागधारकां मेरेन पावूंक यत्न करतात, लोकां मदीं जागृताय करूंक शकतात आनी दुबावीत तस्करी प्रकरणां खातीर अहवालान दिवपाच्या चॅनलांक चालना दिवंक शकतात.
निळें काळीज कित्याक?
ब्लू हार्ट हें चिन्न बळी पडपी लोकां कडेन एकचार आनी आपल्या वांगडच्या मनशांक विकतें घेवपी आनी विकपी लोकांच्या थंड आधी निर्दय काळजाचें प्रतिनिधित्व करता. संवसारीक दिसा मनीस तस्करी सोंपोंवया हो संदेश सोशल मिडिया चेर शेअर करा, लायक करा आनी कमेंट करात. शक्य तांणी तस्करीक बळी पडपी लोकांक प्रत्यक्ष जमनीचेर मजत आनी संरक्षण दिवपी संयुक्त राष्ट्रांच्या स्वयंसेवी ट्रस्ट फंडाक दान करचें. ब्लू हार्ट कम्युनिटींत सामील जायात वा मोहिमेक कसो आदार दिवचो हाचेर विचार करात. लैंगीक शोशण, जबरदस्तीन काम करप, गुलामगिरी ह्यो गजाली हाचो वांटो.
व्यक्तींचो वेपार हो गंभीर गुन्यांव आनी मनीस हक्कांचे गंभीर उल्लंघन. दर वर्सा हजारांनी दादले, बायलो आनी भुरगीं या तस्करांच्या हातांत पडटात- देशांत आनी परदेशांत. संवसारांतल्या दर एका देशाचेर ह्या वेपाराचो परिणाम जाता, मागीर तो मूळ देश, संक्रमण वा बळी पडपी लोकां खातीर वास्तव्याचो देश म्हणून आसूं. हे तस्करींत शिंदळकी वेवसायाचे शोशण वा हेर प्रकारचें लैंगीक शोशण, जबरदस्तीन काम करून घेवप वा सेवा, गुलामगिरी वा अवयव काडून वेपार करप सारके पद्दतींचो आस्पाव आसता.
भारतांतली परीस्थिती
भारतांत 2018 ते 2022 ह्या काळांत मनीस तस्करीच्यो 10,659 केशी नोंद जाल्यात.लोकसभेचे खासदार मनीष तिवारीच्या प्रस्नाक जाप दितना गृह मंत्रालयान मांडिल्ल्या आंकड्यां प्रमाण दर वर्सा सरासरी केशींत सुमार 2,000 नी वाड जाता. 2018 ते 2022 ह्या काळांत गुन्यांवांत अटक केल्ल्या व्यक्तींचो आंकडो 26,840 आसा. आरोपपत्र दाखल केल्ल्या व्यक्तींचो आंकडो 19,821 आसा. दर वर्सा सरासरी 3,500- 4,000 व्यक्तींचेर आरोपपत्र दाखल जातात.
ह्या गुन्यांवाक लागून दोशी थारिल्ल्या आदी ख्यास्त जाल्ल्या व्यक्तींचो आंकडो मात उणो आसा- पांच वर्सांत 1,031 गुन्यांवकार, म्हळ्यार त्याच काळांत अटक केल्ल्या व्यक्तीं मदले फकत 4.8%. पांच वर्सांत वेगळ्या वेगळ्या न्यायालयांनी निरपराधी थारिल्ल्या आरोपींची संख्या 4,936 आसा. वयली आंकडेवारी नोंद जाल्ल्या केशींचेर आदारीत आसा.
आमच्या देशांत शिक्षण उणें, पुलीस आनी कायदो यंत्रणांतलो भ्रश्टाचार चड, देखून सामान्य लोकांक तांचेर विस्वासा परस तांचो दुबाव आनी भंय चड. देखून केशी नोंद जावप कठीण, आनी नोंद जाल्यारय वशिलो नाशिल्ल्यांचो सोद आनी सोडोवणूक ह्यो गजाली चड पयस. म्हणजेच धाक ना, देखून हो गुन्यांव वाडत वता.
आमच्या गोंयांतय बायलो आनी भुरगीं ह्या तस्करीक बळी पडटात. थळाव्यां परस परप्रांतीय चड. मागीर तांचो
फुडार काबार जाता. हाचे आड वास्को अन्याय रहित जिंदगी (अर्ज) ही संस्था अश्या मनशांक तातूंतल्यान सोडोवप आनी तांची पुनर्वसणूक करपाचें काम करता. तांच्या वावराक समाजान पाळो दिवंक फावो.
प्रकाश वामन कामत
94224 43093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
