भांगरभूंय | प्रतिनिधी
जिणेंत आमी जायते निर्णय घेतात; कांय ल्हान, कांय व्हड. देव बरे निर्णय घेवपाक, समस्यांक तोंड दिवपाक मार्गदर्शन करता.
हें सगळ्यांत बरें मार्गदर्शन! कारण, आदल्या काळार कितें घडलें आनी फुडाराक कितें घडटलें तें फकत आमचो रचणार सांगूंक शकता; तशेंच, आमकां जिवीत दिवपी. देखून आमकां कितें बरें तें फकत ताकाच खबर आसा. म्हाका दिसता बरें कर्तुब करपी दरेक मनीस देवा सारकोच आसता.
देव बऱ्या मनशां मदीं, दरेका बऱ्या कर्तुबांत, सकारात्मक गजालींनी आसा. देव म्हणल्यार शांती, सुख आनी मोग.. देव म्हणल्यार नेमकें कितें? देव दाखोवंक मेळटा काय, देव खंय मेळटलो, आमच्या मनांत जायते प्रस्न उप्रासतात. आमी देवळां, मशिदी, इगर्जींनी देव पळयतात अशें आमकां दिसता… पूण विश्वाची रचणूक करपी तो सगळे कडेन एकूच आसा. वेगवेगळ्या सुवातींनी, रुपांनी दिसलो तरी तो एकूच. कारण देव एक, पूण रूपां अनेक. देवाक जायत्या रुपांनी पळयतना ताच्या अवतारां प्रमाण ताची उपासना करतात, सगळे कडेन आशिल्लो खरो देव मात पुजपाचो उरता.
आधुनीक समाजांत नेटान जावपी बदल.. वेवसाय- प्रधान जिणेशैली. त्या काळांतले गरजे प्रमाण जिणेची गती वाडत आसा. लोकांची वेव्हारीक वृत्ती बदलत आसा. वाडत आसा. जाका लागून जाण्ट्यांक दुय्यम पद दितात. तांणी मेळयिल्ल्या घरांत तांच्या आलाशिऱ्याचोय प्रस्न उप्रासला, जाका लागून ते वृद्धाश्रमांत रावपाक लागल्यात. संयुक्त कुटमाचे वेवस्थेंत तांकां जेवण, कपडे, आलाशिरो दिवपाची खात्री मेळटाली, पूण आतां जायते जाण स्वताचीं स्वतंत्र कुटुंबां सुरू करतात. भोगवादी संस्कृतायेच्या वाडत वचपी प्रभावाक लागून जाण्ट्यांची समस्या आनीक वायट जाल्या. तांकां आडखळ मानप सुरू जालां.
प्रामाणीकपणान सांगपाचें जाल्यार म्हाका सदांच खरपणान दिसता की आमी मनशां मदीं देव पळोवंक जाय. घरांत टीव्ही, फ्रिज, संगणका खातीर सुवात आसा, पूण आजो-आजी जाण्टेपणांत वृद्धाश्रमांत! परिस्थिती बदलपाची गरज आसा. अशें कित्याक घडटा तें आमी सोदचें अशें म्हाका दिसता. मनशा भितरल्या देवाक जिवो दवरप गरजेचें. आयच्या तरणाट्यां मुखार हें सगळ्यांत व्हडलें आव्हान जावपाचें आसा. सगळ्यांनी एकामेकांक इतली बरी वागणूक दिवची की वृद्धाश्रम बांदपाचो वेळ येवचो ना.
मनीसपण नांवाची गजाल आयज लेगीत जिवी आसा, पूण फकत गांवगिऱ्या वाठारांनी. थंय एकामेकां विशीं आशिल्लो मोग, मोग आनी मोग म्हाका चड दिसता. शारांतले सगळे फकत धांवतात. तो खंय धांवता, कित्याक धांवता तें लेगीत कळना. पयशांच्या बळग्यान सगळें मेळोवं येता अशी कल्पना मनीसपण मेळोवपाच्या यत्नांत अपेसाक कारणीभूत जाता. कारण मनीसपण ही विकत घेवपाची वस्त न्हय. आयज लोक पयशे जोडपाक मनीसपण विसरतात. देखून पयलीं मनीस जावपाक शिकप गरजेचें.
दरेका मनशा भितर एक देव आनी एक राकेस लिपला. आर्विल्ल्या काळांत मनशा भितर राकेसाक फावो अशें दिसपी वातावरण आसा. अशा परिस्थितींत मनशा भितरलो देव जिवो दवरप म्हत्वाचें. देव मनशा भितर आसा हें सोदून काडपाचो यत्न करचो. आमी देवाक आवय-बापायंत, नात्यांतल्या आनी प्रिय व्यक्तीं मदीं पळोवंक जाय! मनशा भितरल्या देवाक वळखुपाक मेळपाक जाय.
देव ही एक शक्त, जी आमकां बळ दिता. आत्मविस्वास वाडयता. ताका लागून हारपी मनशाक जिखपाची नवी आस्त मेळटा. नवी उर्जा दिवन जिवीत जगपाक शिकयता. अशी अद्भुत शक्त म्हणल्यार देव. दरेका मनशांत ती सोदून काडात. मनशाच्या श्रमांत सोदून काडात. गरीबां मदीं सोदात. गिरेस्त लोकां मदीं सोदात. सैमांत सोदून काडात. स्वता भितर सोद घेयात. देव नक्कीच मेळटलो. कारण तो सगळे कडेन आसा.
दरेका मनशांत एक बरो मनीस आसता. आमच्यांतलें बरेंपण जिवें दवरल्यार अद्भुत जियेवंक मेळटा. विचार करात.. देव म्हणल्यार मनशांतलें बरेंपण, सकारात्मकताय. मनशा भितरलो देव खंयच्याय रुपान आदाराचो हात दिता. फकत त्या वेळार ताका वळखुपाची गरज आसा. मनशा भितरल्या देवाक जागृत दवरून जियेवंक जाय. सकारात्मक विचारांनी. गरज पडल्यार मदतीचो हात वाडोवन..
गौरी भालचंद्र
9422373926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
